روما

جزء ٢٥

الجزء الثاني
الحلقه ٤

تانى يوم الصبح ... فى الشركة مراد معدى يبص يلاقى شريف جاى مع روما يروح مقرب منهم عشان يسلم على شريف
مراد : ازيك يا شريف حمد لله على السلامه
شريف : الله يسلمك ازيك انت يا مراد
مراد : تمام الحمد لله , صباح الخير يا روما
روما : صباح النور , جهزت المكتب ؟
مراد : اه زى ما طلبتى بالظبط
روما : كويس , يلا يا استاذ شريف على مكتبك
شريف : على طول كده
روما : امال انت جاى ليه , ايه يا شريف ده انت طول عمرك فى الشغل يلا مراد هيوصلك لمكتبك الجديد
تمشى روما وتسيب شريف واقف مع مراد
شريف بهزار : هى عامله كده ليه
مراد : لا هى كده من زمان بس انت ماكنتش تعرف هههههه اتفضل على الشغل بقى لا تيجى تفرج علينا على الشركة كلها انا وانت
شريف : ههههههه لا وعلى ايه يلا بينا
ياخد مراد شريف على المكتب الجديد بتاعه
مراد : اتفضل , المكتب ده جهز فى ساعه على فكره يعنى لو فيه حاجة ناقصه قول
شريف : لا ده تمام اوى
مراد : طب انا همشى بقى وقت ما تحتاج حاجة قولى
شريف : متشكر يا مراد تعبتك
مراد : على ايه يا راجل احنا هنبقى زمايل واصحاب ولا انت مش عايز
شريف : ازاى بقى هو انا واطى اوى كده ولا ايه , انا مش بنسى حد وقف معايا وانت اكتر واحد وقفت معايا فى اللى حصل ليا وساعدنى رغم كل اللى كنت بعمله معاك
مراد : كل ده كان زمان ومفيش داعى نفتكره , اسيبك انا بقى
شريف : اتفضل
يمشى مراد ويقعد شريف على كرسى بهدوء ويفضل يتأمل المكتب حواليه وكأنه موظف جديد اول مره يستلم شغل ويقعد على مكتب
_____________________
روما فى مكتبها بتقرا ورق قدامها ... يخبط الباب ويدخل مراد
روما : ايه وصلت شريف مكتبه ؟
مراد : اه وصلته , بس هو انتى متاكده ان ده شريف
روما : لا والله , تصدق نسيت اتاكد
مراد : ده اتغير خاالص
روما : هو انت عايز بعد كل اللى حصله ده يفضل زى مهو ده كفايه سنين السجن
مراد : فعلا كتر خيره فى اللى شافه
روما : بقولك ايه , هاتلى ورق الصفقه بتاعت شركة الاصدقاء
مراد : حاضر
يخرج مراد وروما تفضل قصاد الورق شويه وتلاقى تلفون الشركة جنبها بيرن
روما : الو
جلال : صباح الخييير
روما : صباح النور , مين ؟
جلال : لا ازعل لالا بجد ازعل بقى مش عارفه صوت جلجل
روما بستغراب : جلجل !! هههههههه جلال ازيك
جلال : زى الفل انتى عامله ايه
روما : تمام
جلال : انا كنت قاعد فى حالى ولا بيا وعلى عليا وفجأه كده جيتى فى بالى قولت اصبح عليكى
روما : وصباحك وصل يا سيدى
جلال : طب هو ينفع اوصلك المسا كمان ؟
روما : يعنى ؟!
جلال : ممكن تتكرمى وتقبلى دعوتى على العشا النهارده
روما : الحقيقه مش هينفع معزومه على العشا عند اختى
جلال : خلاص خليها غدا تحبى تتغدى فين ؟
روما : بردو مش هينفع عندى شغل
جلال : يعنى هو انا مثلا اللى صايع انا بردو عندى شغل بس ساعه لقلبك مش كله شغل شغل شغل , ها عايزه تتغدى فين ؟
روما : يا جلال ....
جلال : خلاص انا هختار ليكى مكان على مزاجى هستناكى قدام شركتك الساعه 3 باى باى
يقفل جلال السكه بسرعه قبل ما روما ترد عليه .. روما تبص على سماعة التلفون بستغراب
روما : ده طلع مجنون
_____________________
نيللى قعدة فى بيتها بتكلم ندى فى التلفون
نيللى : اخر كلام مش هتنزلى بردو
ندى : مش هينفع بجد يمكن انزل على اخر السنه جايه
نيللى : لسه اخر السنه الجايه يابنتى وحشتينى
ندى : والله وانتى كمان وحشتينى وهموت كمان واشوف بنتك بس ظروف الجامعه , المهم طمنينى على شريف
نيللى : والله كويس يعنى انا هكدب عليكى
ندى : اصل صوته كان غريب لما كلمنى
نيللى : احنا كنا فين وبقينا فين يا ندى الحمد لله هو دلوقتى احسن كتير , ده حتى جاى هو وروما النهارده يتعشو عندى
ندى : ايوه ياعم عاملين لمه النهارده يعنى اياكم تجيبو سيرتى
نيللى : ازاى ده احنا هنجيب سيرتك بكل حاجة وحشه هههههههه
ندى : ماشى ماشى
نيللى : لالا سالم اخو عامر ومراته داليا هما كمان جاين يعنى غصب عننا هنقعد ساكتن عشان محدش غريب يعرف كوارثنا
هههههههههه
ندى : ماشى يا نيللى افتكريها هردهالك مره ههههههه يلا اقفلى كفايه عليكى كده
نيللى : ههههههه ماشى يا ستى مع السلامه
ندى : مع السلامه
_____________________
روما قعدة على مكتبها قدامها ملف بتقلب فيه شويه وتسيبه وتبص فى ساعة ايدها الساعه 3 ونص ترجع رأسها لورا وهى بتفكر وبعدين ترجع تبص فى الملف تانى ... دقايق وتلاقى السكرتيره داخله عليها
روما : فى حاجة ؟
السكرتيرة : ايوه يا فندم جلال بيه الشيمى بره وعايز يقابل حضرتك
روما : طيب خليه يتفضل
جلال يدخل مكشر وباين عليه الزعل
روما : اهلا يا جلال اتفضل
جلال : لا اهلا ولا سهلا كده بردو افضل واقف قدام الشركة نص ساعه بحالها
روما : انت عايز تفهمنى ان ليك نص ساعه واقف تحت
جلال : ايوه طبعا انتى فاكره ان موعيدى بايظه زيك انا جيت فى معادى مظبوط الساعه 3 وفضلت مستنيكى
روما باحراج : سورى يا جلال انا بس .....
جلال : انتى ماكنتش جاية صح ؟
روما : مش حكاية كده بس هو .......
جلال : لو مش صح قومى تعالى معايا دلوقتى
روما : لازم يعنى
جلال : لا مش لازم بس انا كده هفضل زعلان , طبعا عادى يعنى ازعل اتفلق مفيش مشاكل
روما وهى بتقوم : لا يا سيدى ولا تزعل ولا حاجة اتفضل هاجى معاك
جلال : ياااس
تخرج روما مع جلال من المكتب وتروح الاول على مكتب شريف
روما : شريف انا رايحه مشوار العربية معاك اسبقنى عند نيللى
شريف : ماشى , انتى هتتاخرى ؟
روما : لا , سلام
شريف : سلام
تمشى روما مع جلال وهى طلعه من الشركة يشوفها مراد اللى يفضل باصص عليها بستغراب وهى ماشيه مع جلال وبتركب معاه العربيه
_____________________
فى مطعم شيك جدا قعدة روما على ترابيزه مع جلال
جلال : ايه رأيك بقى فى المكان ده ؟
روما : حلو وشيك اوى
جلال : ده مطعمى المفضل كل يوم فيه
روما : ليه هو انت مش بتاكل فى بيتكم خالص
جلال : هاكل مع مين انا عايش لوحدى من بعد موت ولدى وولدتى اختى الوحيده عايشه مع جوزها فى باريس اكلى دايما فى المطاعم بحب اقعد وسط الناس بدل ما اقعد لوحدى
روما : اممممم
جلال : هو انتى صح مكملتش دراستك , انتى اختفيتى فجأه من الكليه مع انك كنتى لسه فى سنه اولى
روما : لا انا سبت الكلية فتره وبعدين رجعت كلمت تانى وانا قعده فى البيت لحد ما اخد الماجستير
جلال بتردد : هو , هو حقيقى ان الفتره اللى انتى اختفيتى فيها دى كانت بسبب مشاكلك مع مرات ابوكى شاهيناز التاجى
روما بستغراب : انت عرفت وجبت الكلام ده من فين ؟!
جلال : روما , احنا فى وسط مفيش فيه حاجة بتستخبى , فى وسط رجال الاعمال الحاجة بتتعرف قبل ما تحصل واكيد انتى عارفه ده كويس
روما تسكت وتبص لـ جلال بنظرة استغراب
جلال : انا دايقتك ؟! انا اسف والله ما كنت اقصد حقك عليا بجد
روما : بس بس انا مش مدايقه , انا بس بفكر اطلب ايه ولا انت مش عايز تغدينى
جلال : ده انا هجبلك المطعم كله حالا
تبتسم روما وتفضل هى وجلال يتكلمو ويهزرو
_____________________
فى بيت نيللى .. قاعد شريف وشايل لى لى على رجله بيلعبها وقدامه قاعد عامر وجنبه نيللى والناحيه التانيه قاعد سالم اخوه ومراته داليا
نيللى : انزلى بقى يا لى لى تعبتى خالو
شريف : وانتى مالك انا مش تعبان
نيللى : روما اتاخرت اوى
عامر : اه بصراحه احنا جوعنا هى فين كل ده
شريف : والله هى قالت رايحه مشوار ومش هتتاخر زمانها جايه
داليا : الا صح يا استاذ شريف هو حضرتك ما حضرتش فرح نيللى وعامر ليه ؟!
شريف يسكت وميعرفش يرد
نيللى : شريف كان مسافر بره يا داليا ولسه واصل , وعلى فكرة انا قولتلك قبل كده
داليا : اااه فعلا ده انا ناسيه
سالم بصوت واطى : ما تبطلى رغى انتى مالك حضر ولا محضرش
داليا : الله هو الكلام حرام ولا حرام ادينا بنتكلم
يسكت الكل ... شويه وجرس الباب يرن وتقوم نيللى تفتح الباب تلاقى روما
نيللى : ما لسه بدرى
روما : ما انا عارفه هه , ازيكم يا جماعه عاملين ايه
عامر : اهلا اهلا , حرام عليكى ده احنا موتنا من الجوع
روما : ههههه معلش كان عندى مشوار
نيللى : طيب اروح بقى احضر الاكل
داليا : ازيك يا مدام روما
روما تبص لـ عامر وسالم وشريف وترجع تبصلها
روما : انسه يا حبيبتى ومتهيألى انك عارفه
داليا : اصلى ليا فتره ما شوفتكش افتكرتك اتجوزتى
روما : لا والله هتجوز فى السر يعنى ما انا لو كنت اتجوزت كان الكل عرف
داليا : امممم طب وهو انتى مش ناويه ولا ايه , انتى عندك 30 سنه دلوقتى مش كده
روما تبتسم بسخريه وتطلع سيجاره تولعها بكل هدوء
روما : لا 35 سنه وكام شهر هتدخل فى 36
داليا : معقوله امال انتى عايزه تستنى لحد ما تبقى كام سنه
روما : انا عايشه احسن من احسن واحده متجوزه ده غير ان فيه بدل الراجل ألف بيحلمو بنظرة رضا منى بس انا اللى ماليش مزاج
داليا : هو الجواز دلوقتى بيقى بالمزاج
روما : اه انا احب اعمل كل حاجة بمزاجى ولو ماليش مزاج مش بعملها
تبص داليا لـ روما بغيظ وتسكت ... ويميل عامر على اخوه سالم وبيكلمه بهمس
عامر : ما تسكت مراتك بقى
سالم : يعنى اعملها ايه اقوم اضربها
عامر : لا بس خليها تلم لسانها عن الناس
سالم : نصيبى كده اتجوزت واحده حشريه تموت لو بطلت كلام تحب تدخل فى اللى مالهاش فيه
عامر : ماشى يا خويا اهى وقعت فى شر اعمالها , وبدل ما تدخل فى اللى مالهاش فيه دخلت فى روما
بعد شويه يقعد الكل على السفره يتعشو مع بعض ... وبعد العشا يقعدو يتكلمو وشوية وكل واحد يروح على بيته

يتبع ✍️✍️✍️