الجزء الثاني
الحلقه ٩
مراد بعصبيه : مصيبه يا روما
روما بخضه : فى ايه ؟!
مراد : احمد المغازى اخد المناقصه مننا
روما تقوم توقف : ايه اللى بتقوله ده
مراد : المصبيه مش فى كده ,, المصبيه انه قدم السعر بتاعنا , السعر اللى كنا هنقدم بيه اتسرب لـ احمد المغازى
روما : ايه ؟!
مراد : زى ما بقولك ,, السعر اللى احنا كنا هنقدم بيه هو سبقنا وقدم بيه قبلنا بنفس السعر ونفس الميزانية يعنى كان عارف السعر وكان عارف احنا امتى هنقدم فسبقنا وقدم هو
روما تقعد فى مكانها تانى وهى مش مستوعبه اللى حصل
روما : يعنى ايه ,, طب ازاى
فى نفس الوقت يدخل شريف المكتب
شريف : شوفتو المصيبه ؟ انا مش فاهم ده ازاى حصل
تبص روما لـ شريف لحظات وتقوم من مكانها وتروح توقف قدامه وتبصله وبنظرة غضب
روما : مش فاهم ده ازاى حصل ؟!
شريف : لا مش فاهم , مش فاهم ازاى السعر بتاعنا اتشابه مع السعر بتاعه
روما : اتشابه ,, ده اتسرب يا بابا ايييه انت لسه نايم
شريف : ده مستحيل , طب ازاى اتسرب ؟!
روما بزعيق : اسأل نفسك مش الورق كان فى معاك وفى مكتبك ,, السعر اتسرب ازاى يا شريف بيه
شريف : انتى شاكه ان انا اللى سربت السعر , بتشكى فيا يا روما ,, انا اعمل كده
روما بزعيق اكتر : امال عرف السعر ازاى , فتح البخت ولا شاف الكف
شريف بصوت عالى : وانا اعرف من فين
روما بصراخ : ده على اساس انك بتكلم واحده هبله
مراد : بس فى ايه , اهدو يا جماعه مش كده اكيد فى حاجة غلط
شريف بعصبيه : انت مش شاف
فى الوقت جلال ماشى فى الممر رايح ناحيه مكتب روما لاقى باب المكتب مفتوح وصوت الخناق بين روما وشريف عالى جدا ... بسرعه جرى دخل المكتب
جلال بخضه وعدم فهم : فى ايه يا روما ؟ مالكم ؟!
روما : فى مصيبه وقعت على دماغ روما بسبب البيه اخوها
شريف : انتى بردو مصممه ان انا السبب والله ما اعرف حاجة عن اللى حصل
روما : ليييه مش عملتها زمان فيا حاجة جديده عليك
شريف : ده انتى شايله بقى اللى حصل زمان ومش ناسيه
روما : انسى ايه وانت اللى فيك فيك ,, العيب مش عليك اصلا العيب على اللى صدقت انك بيقت بنى أدم , بس ديل الكلب بيفضل عوج
شريف : اكتر من كده وبلاش غلط يا روما ,, انا مستحمل عشان عارف اللى انتى فيه لكن كفايه غلط انا حلفت بالله انى معرفش السعر اتسرب ازاى
روما : لا يا شيخ وانا المفروض بقى هصدق ,, طب ماشى انا غبيه ومش بفهم , سعر المناقصه كان معاك انت وانت اللى كنت هتقدم السعر بنفسك بقدرة قادر الشركة المنافسه تعرف السعر ومعاد التقديم وتقدم قبلنا وبالسعر بتاعنا يبقى مين اللى وصلها المعلومات ,, ايه رأيك يا جلال اديك عرفت اللى حصل احكم انت احكم يا مراد ما انت شايف كل حاجة من الاول احكمو انتو يمكن انا مجنونه وبخرف
شريف يبص لـ جلال يلاقيه ساكت يبص لـ مراد يروح مراد ينزل رأسه فى الارض ويلف وشه بعيد عن شريف
شريف : حتى انت يا مراد
روما : بعد كل اللى عملته معاك تعمل معايا كده ليه , ايه تكون يتنتقم لـ امك
شريف : انا !! انتى بدخلى الامور فى بعضها , لدرجة دى انتى شايفه انى قليل الاصل
روما : والله اسأل نفسك
شريف : على الاقل هاتى دليل على اتهامك ليا , ده احنا اخوات يا روما مش هنرجع تانى ناكل فى بعض
روما بعصبيه : ورحمة ابويا وابوك يا شريف لو اتاكد انك انت اللى عملتها لا اخليك تحصل امك وانت عارف انى اقدر اعملها ,, اااااااااه
فجأه تمسك روما رأسها وتصرخ الكل يجرى عليها وجلال يمسكها جامد
جلال برعب : مالك يا روما ؟!
روما : اه دماغى هتنفجر اااااه
مراد : انا هطلب دكتور
شريف : تعالى يا طيب ارتاحى
روما بصراخ : ابعد عنى ااااااااه ااااااه دماغى يا جلال ااااااااااه
جلال بخوف ونرفزه : انا مش هستنى دكاتره
شريف : انا هاجى معاك
جلال : لو سمحت يا شريف مفيش داعى انا هبقى اتصل بيك اطمنك
يبص شريف لـ جلال وميردش عليه وجلال يسند روما ويخرج بيها بره المكتب وهى مش مستحمله الوجع وينزل يركبها العريبه ويطلع بيها على اقرب مستشفى
_____________________
بعد ما جلال اخد روما ومشى مراد وشريف فضلو واقفين فى مكانهم وساكتين دقايق لحد ما مراد قطع السكوت ده
مراد : اقعد يا شريف واهدء
شريف : انت كمان شاكك فيا يا مراد ؟
مراد : عيب الكلام ده يا شريف انا عارف انك مالكش دخل فى اللى حصل
شريف : امال قدام روما سكت ليه ؟
مراد : عشان انت عارف روما وهى متعصبه مستحيل هتسمع كلام من حد
شريف : بس انا هتجنن ازاى ده حصل والله برج من دماغى هتطير
مراد : هنعرف , روما مش هتسيب الموضوع يعدى كده ,, بس نطمن عليها الاول
شريف : ربنا يستر انا اول مره اشوف روما تعبانه كده والله اترعبت عليها
مراد وشريف يبصو لبعض بقلق ويسكتو
_____________________
فى اوضه فى المستشفى روما قعده على سرير والدكتور واقف بيقيس ليها الضغط وجلال قاعد جنبها
الدكتور : حاولى تهدى شويه يا مدام الضغط عالى اوى
روما بألم : اعمل حاجة فى الصداع ده دماغى هتنفجر
جلال : معلش يا حبيبتى معلش اهدى
الدكتور : انا هديكى مسكن دلوقتى لحد ما الضغط ينزل شويه ,, احنا هنعملك شوية تحاليل عشان نطمن عليكى
جلال بخوف : تحاليل ليه هى مالها ؟!
الدكتور : يا فندم هى كويسه التحاليل دى عشان نطمن بس , هى هترتاح هنا شويه لحد ما الضغط ينزل ونتيجة التحاليل تطلع وممكن بعد كده تمشى على طول مفيش حاجة خطيره , عن اذنكم
يمشى الدكتور وجلال يفضل قاعد مع روما
جلال : كده بردو يا روما تخضينى عليكى كده
روما : المناقصه راحت منى يا جلال
جلال : فى ستين الف داهيه مناقصة ايه ده اللى تعمل فيكى كده
روما : اخويا يعمل فيا كده اخويا يبقى عايز يدمر شغلى دى اخرتها يا شريف
جلال : حبيبتى ممكن تهدى وتفكرى بهدوء هو شريف هيعمل معاكى كده ليه ده انتو اخوات وهو دايما شايل ليكى الشغل كله بلاش تظلميه لما نتاكد على الاقل ابقى اعملى اللى انتى عايزاه
روما : اول مره تحصلى فى شغلى , انا تبقى شركتى مكشوفه والمعلومات فيها بتطلع للمنافسين
جلال : عشان خاطرى انا اهدى يغور الشغل وتغور الشركة بس اهدى
تحاول روما تهدء وتنام على السرير وجلال يفضل جنبها ... وبعد ساعه يدخل الدكتور
الدكتور : ها حاسه بأيه دلوقتى احسن ؟
روما : اه شويه
الدكتور : تمام , التحاليل طلعت
جلال : فيها حاجة ؟
الدكتور : فيها حاجة حلو اوى , فيها ولى العهد ألف مبروك
جلال بفرحه : انت بتتكلم بجد يا دكتور
روما تبص لـ جلال وترجع تبص لـ الدكتور
روما برتبأك : مـ مبـ مبروك على ايه
الدكتور : مبروك انتى حامل
روما بذهول : حامل ؟!
الدكتور : ايوه حامل وفى الشهر التانى كمان , بس بلاش عصبيه بقى مش عايزين الضغط يعلى تانى بالشكل ده
جلال : لا عصبيه ايه مفيش الكلام ده خلاص
الدكتور : المهم مش عايزين حركة كتير الايام دى عشان الجنين يثبت وطبعا تاكلى كويس وتحاولى ترتاحى على قد ما تقدرى
كل ده وروما باصه للدكتور بصمت
جلال : حاضر يا دكتور هى هتعمل كل اللى حضرتك قولت عليه
الدكتور : دلوقتى الضغط اتظبط الحمد لله وممكن تمشى انا بس هيديها فيتامين تمشى عليه الفتره الجايه دى , عن اذنكم ألف مبروك تانى
جلال : الله يبارك فيك
يخرج الدكتور وجلال يبص لـ روما بحب ويحضنها
جلال : مبروك يا حبيبتى
وبعدين يبعد عنها ويبصلها بستغراب
جلال : مالك يا روما انتى مش فرحانه ؟!
روما : لا انا فرحانه
جلال : امال مالك ؟
روما : مستغرابه انى فرحانه ,, اصلى ماكنتش زمان عايزه اخلف لكن لما عرفت انى هخلف فرحت اوى , انا فرحانه اوى اوى يا جلال فرحانه اوى كأنى كنت مستنيه الخبر ده من زمان وانا مش حاسه
جلال بهزار : لا ده انتى شكلك هتحبى البيه اللى جاى ده اكتر منى
روما : بس هحبك انت اكتر عشان انت السبب فى انه هيجى
جلال يبتسم بفرحه ويقوم يمشى من المستشفى هو وروما
_____________________
شريف ومراد لسه قعدين فى الشركة ومش عارفين اى حاجة عن روما
شريف : لا بقى كده كتير انا اعصابى باظت انا هتصل بـ جلال اعرف ايه اللى حصل
يمسك شريف التلفون ويتصل بـ جلال
شريف : الو ايوه يا جلال طمنى على روما انت متصلتش بيا ليه ............................... طب وهى عامله ايه دلوقتى ............................ طب الحمد لله يعنى انتو فى البيت .................. خبر ايه ؟ ............... انت بتتكلم بجد ................. ألف مبروك يا جلال ............... ماشى ماشى فهمت مع السلامه
مراد : حصل ايه ؟
شريف : كان الضغط عالى شويه وجلال قالى انه كلمها فى حكايه الخناقه بتاعت النهارده دى وهنبقى نتكلم انا وهى مع بعض بكره بهدوء شويه
مراد : طب كويس الحمد لله ,, بس انت بتقوله مبروك على ايه ؟!
شريف : روما حامل
مراد يسكت شويه وبعدين يبص لـ شريف
مراد : مبروك ,, انا هروح بقى عشان اتاخرت النهارده اشوفك بكره سلام
وقبل ما شريف يرد يكون مراد يفتح باب المكتب ويمشى
يتبع ✍️✍️✍️
