الجزء الثاني
الحلقه ٥
شريف قاعد فى اوضته مش عارف ينام يقوم ينفخ بزهق ويطلع يوقف فى البلكونه ... يلاقى روما قعده فى الجنينه لوحدها يبصلها بستغراب وينزل ليها
شريف : قعده لوحدك كده ليه ؟
روما : مفيش مش جايلى نوم
شريف : على فكره انتى شكلك متغير من ساعة ما رجعنا من عند نيللى
روما : تعب بس من قرف الشغل
شريف : متاكده ؟!
تبص روما لـ شريف وتفضل ساكته
شريف : ايه فى ايه ؟
روما : شريف هو انا فعلا كبرت
شريف : انتى بتهزرى هو انتى اخدى على كلام الست البارده دى اللى اسمها داليا ده انتى حتى مش بيهمك من كلام اى حد ده انتى ماشيه بمبدء اللى مش عاجبه يرزع دماغه فى الحيط
روما : بس انا حاسه فعلا انى بكبر حاسه ان كل حاجة بتتغير حواليا وانا بس اللى واقفه محلك سر
شريف : روما , انتى ومراد كنتو طول عمركم قريبين من بعض اوى ليه .....
روما : عشان مننفعش مع بعض , متجوزنش عشان لا انا انفع مراد ولا هو ينفعنى انا وهو طول عمرنا عكس عكاس
شريف : مش عارف اقولك ايه
روما وهى بتقوم : متقولش حاجة وقوم نام عندنا بكره شغل كتير
تلف روما عشان تمشى لكن ينادى عليها شريف
شريف : روما
روما : نعم
شريف : تعرفى انى لما شوفتك زعلانه ومدايقه زعلت اوى , ماكنتش اعرف انى فى يوم من الايام هعزك واخاف عليكى
روما : انا بقى ماكنتش اعرف ان احنا فى يوم من الايام هنبقى اخوات كده اصلا بس تقول ايه دنيا ومفيش حاجة فيها بتفضل على حالها , تصبح على خير
شريف : وانتى من اهله
_____________________
بعد اسبوعين ... فى الشركة مراد ماسك ورق فى ايده وماشى وهو باصص فيه بيرفع عنيه يلاقى جلال داخل الشركة يروح مقرب منه
مراد : اهلا جلال بيه
جلال : ازيك عامل ايه ؟
مراد : الحمد لله وحضرتك
جلال : انا تمام هى روما موجوده ؟
مراد : فى اجتماع
جلال : امممممم طب هتخلص امتى ؟
مراد : الحقيقه معرفش
جلال : اوكى انا هستناها
مراد : تحب حضرتك نقعد فى كفاتيريا الشركة لحد ما الاجتماع يخلص على الاقل نتعرف
جلال : مفيش مانع انا كمان احب اتعرف
مراد : اتفضل
يروح مراد مع جلال الكفاتيريا ويقعدو هما الاتنين على ترابيزه مع بعض ... يفضلو باصين الاتنين لبعض من غير كلام دقايق سكوت يقطعه جلال
جلال : انت هنا فى الشركة من زمان ؟
مراد : اكتر من 15 سنه انا اتخرجت من الكليه اشتغلت فى الشركة على طول
جلال : امممممم عشان كده واخدين على بعض اوى انت وروما
مراد : اه اصل احنا مش موظف ومديره احنا اصدقاء من زمان وكل واحد فينا يعرف التانى اكتر من نفسه
جلال يبتسم : تعرف ان علم النفس بيقول ان من المستحيل انك تعرف اللى قدامك معرفه حقيقه مهما عرفته وده لأن مخ الانسان فى تطور دائم من يوم ما بيتولد لحد ما بيموت بيغير فى طبعه وتصرفاته ألف مره
مراد بتحدى : تعرف ان ممكن علم النفس ده يمشى على اى حاجة غير روما طبعها واحد سابت مش بيتغير هى على استعداد تغير اللى قدامها لكن هى متتغيرش
جلال : يمكن لسه ما قابلتش اللى يستحق انها تتغير علشانه وانا متاكد ان لما روما تقابله هتتغير كتير
مراد يبص لـ جلال بنظره استغراب وشك وميعلقش على كلامه
جلال : يا ترى الاجتماع يكون خلص
؟
مراد : اتفضل نشوف خلص ولا لسه
يقوم مراد وجلال ويروحو فى اتجاه مكتب روما ... يشوفو روما لسه راجعه من الاجتماع
روما : اهلا اهلا ازيك يا جلال
جلال : جلال زعلان منك اغيب الفتره دى كلها وتسألي عليا ولا تقولى اشوفه مختفى فين يا شيخه ده انا سافرت ورجعت
روما : على فكره لو جاى تتخانق انا محدش يغلبنى فى الخناق
جلال : خلاص تعالى نتخانق ونشوف مين يغلب
روما : طب اتفضل ادخل الاول ونشوف حكايه الخناق دى
مراد : عايزه منى حاجة يا روما ؟
روما : لا يا مراد شكرا اتفضل انت
تدخل روما المكتب ومعاها جلال اللى يبص على مراد وهو ماشى ويبتسم ليه أبتسامه هاديه يرد عليها مراد بنص أبتسامه ويمشى
_____________________
هاله قعده على الارض بتلعب مع شادى وعلى جنب قاعد مراد سرحان ومش باصص عليهم ... تبص هاله لـ مراد وتقوم تروح تقعد قدامه
هاله : مراد , مراد
مراد : ها ايوه يا هاله
هاله : مالك ؟
مراد : لا حاجة مالى
هاله : انت من ساعة ما رجعت وانت قاعد ساكت وسرحان فى ايه ؟
مراد : لا ابدا ده انا بفكر فى حاجة فى الشغل
هاله : اااه بتفكر فى الشغل , الا هى روما عامله ايه ؟
مراد : كويسه بتسألى ليه ؟
هاله : ايه مش عايزنى اسأل عليها
مراد : لا بس مش بعاده
هاله : مهو ميصحش تبقى انت بتفكر فيها وانا لا
مراد : هو احنا هنبدء نخرف ولا ايه
هاله : يا مراد انا مراتك افهمك من عنيك من نظرتك
مراد : هاله احنا مش كل ما نقفل الموضوع ده ترجعى تفتحيه تانى انتى خلتينى اندم انى قولتلك عن حياتى قبل الجواز
هاله : ليه هو انت ماكنتش عايز تقولى انك كنت بتحب روما وطلبتها للجواز فى يوم من الايام
مراد : لا كنت عايز يا ستى وكنت صريح معاكى من البدايه , طلبت منها الجواز لكن فى النهايه اتجوزتك انتى وخلفت منك انتى وعايش معاكى انتى , علاقتى بيها دلوقتى الشغل وبس خرجى بقى من دماغك فكرة انى لسه بفكر فيها خرجى روما من دماغك يا هاله عشان نفضل عايشين كويس مع بعض
هاله : حاضر هخرجها من دماغى , بس لما انت الاول تخرجها من دماغك
وتقوم هاله وتسيب مراد باصص عليها بدايق وزعل
_____________________
فات اكتر شهرين ... جلال وروما فى الفتره دى بيقو اصحاب وقربو من بعض جدا وجلال كان دايما بيحاول يخرج روما من جو الشغل ودوشته والزهق بتاعه ... مراد كان شايف ده وماكانش مبسوط بيه وكان مدايق منه وفى نفس الوقت مش لاقى سبب للاحساس ده غير انه ممكن يكون غيران على روما من جلال
_____________________
جلال وروما بيتمشو مع بعض فى النادى وجلال عمال يتكلم لكن روما ماشيه ساكته
جلال : هاااااااا هو انا بكلم نفسى بقالى ساعه عمال اتكلم
روما : ما انا سمعاك
جلال : ولما انتى سمعانى مش بتردى ليه ؟
روما : هرد اقول ايه ما انت عمال تحكى فى اى كلام
جلال : انا بحكى فى اى كلام كده بردو يا رومى
روما : رومى !!!
جلال : عسل صح بذمتك عمر حد دلعك دلع حلو زى ده
روما : لا والله الحقيقه عمرها ما حصلت , بس انا عايزه اعرف حاجة هو انت هتفضل كده كل يوم تخلينى اسيب الشغل واجى اتمشى مع حضرتك ولما اقولك لا تزعل وتعمل فيها فيلم هندى
جلال : يا شيخه حرام عليكى ده انا ماصدقت القى حد من ايام وزكريات الكليه اخد وادى معاه يهون عليكى زميل الدراسه يتمشى لوحده من غير انيس ويقعد يكلم نفسه , وبعد كده ارحمى نفسك من ام الشغل هو انتى ماكينه
روما : هو انت كل ما تشوفنى تقولى الكليه الكليه ده انا فى الكليه اتكلمت معاك 3 مرات بس منهم مره كانت خناقه , وبعدين ارحم نفسى من شغلى هو انا ليا غير الشغل
جلال : طب شوفى كده الجو امممممم الله على شوية الهوى دول شغل ايه بس اتمتعى بالهوى البارد الربانى ده الله احسن من ميت تكيف فى المكتب
روما : كل ده على شوية هوى ده انت ناقص تقول فيه شعر
جلال يبص لـ روما لحظات يفضل ساكت فيها وبعدين يبتسم ويقولها
جلال : هو فى احلى من الهوى ومن جمال الهوى ورقة الهوى وعيونه اللى تسحر اى حد يشوفها
روما : هو مين ده ؟!
جلال برتباك : احم احم الهوى طبعا
روما : لا والله
جلال : روما هو انا ممكن اسألك سؤال
روما : اسأل
جلال بأبتسامه : هو انتى ورثتى جمالك من مين ؟ انا لفت بلاد كتير لكن فى جمالك عمرى ما شوفت
روما : ده انت قديم اوووى من ايام الابيض والاسود بايخه جدا وقديمه شوف غيرها يا بابا
جلال : اشوف غيرها ؟! اشوف غيرها ايه غيرها غيرها غيرها , ايوه لقيتها ,, تتجوزينى ؟
يتبع ✍️✍️✍️
