ولاد الحومة

🤔 بارت 18 🤔

سمير خرج مالصالة فرحان..كون مدارلهاش هكاك ميبردش قلبو..خاطر كانت في خاطرو واغتنم الفرصة ودار واش قالو راسو..
فتح تليفونو شاف الفوطو خرجت تووب..تبسم..وعاود غلقو.
بقا واقف عند الباب جازت عليه سارة مهبطة راسها وحشمانة مخزرتش فيه كامل حاسة بلي ناس كامل شافوها وهو واحد مشافها..هي جاتها بيزار..متوقعتهاش
طلعت فالطونوبيل مع باباها ويماها..
ديمارو طلعت راسها شافت سمير متكي على الحيط ويتبسم..هبطت عينيها...و تخمم في واش صار حطت يديها على وجها حشمانة...
سارة: احاااي على لمهبول مزية مشافنا حتى واحد..
لحقت للدار دخلت دوشت وبدلت ودخلت في فراشها تلعب بتليفونها وتتفكر فالعرس وغايسة..
....
سمير رجع مع دارهم للدار..خلاص العرس..
متكي في فراشو فليل يتفرج فالفوطو..ويضحك..علابالو فاجئها ومكانتش متوقعتها..
سمير: هههههه مهبولة....حسبتلها تسلك مني
..
دخل للفايس ملقاهاش اون لين..
حط راسو بسيف باش رقد اليوم تقرب اكثر من سارة..ونورمالمو تفهم بلي يحبها..
سارة رقدت عيات مالعرس..حتى لصبح بعكس سمير لي طيرت عليه النوم ..هههه
. ...
غدوة منذاك الخميس الكورتاج..سارة راحت الصبح تقرا خلاصت العطلة وهذا النهار لخر.
جازت على وين يخدم سمير ملقاتوش خاطر ماهوش خدام عرس ختو..
عيطت لمريا وراحو يقراو..
لعشية رجعت للدار ...فطرت لعشية متقراش
بقات طل مالتاقة على الكورتاج تاع زينب..
حورية: داوها ولا مزال ؟
سارة: مزال ماما ..بصح والله غاضتني مسكينة ضرك يخرجوها تروح تعيش عند ناس متعرفهمش كامل..
حورية: ايه يابنتي هذي حال الدنيا وكي اليوم نخرجوك عروسة..ههه
سارة: هههه نشالله..
حورية: حقا البارح خطباتك يمات سمير لسمير
سارة حلت فمها مخلوعة..يعني صح حكاية الخطبة..وهو ناويها هي ماشي فاميلتو كيما كان يخرط عليها..
سارة: واش قلتيلها ؟!
حورية: قلتلها جوز الباك منبعد ساهل..
سارة: ممم انا ضرك هامتني قرايتي الباك نخمم غير فيه منخممش فالزواج..
حورية: عارفة وقلتلها وهي فهمت.
سارة قلبها طاير مالفرحة شعور مخلط .
سارة في قلبها: يعني هو ناويني صح..!!! ماشي كيما كنت حاسبة..وهذيك الهدرة تاع الفايس كامل خرطي في خرطي ..كان يتمسخر بيا..هذي باينة فاقلي..اععع انا شحال حمارة كيفاه مفقتش بلي عرفني وشبعني خرطي وانا كي البهلولة غير نامن...
بصح هاي بنات نيتو مدام قال ليماه عليا..
حورية: هاو رايح الكورتاج..
الطونوبيلات يصونو والنسا يزغرتو..
زينب خرجها خوها الكبير خاطر باباهم ميت..لابسة البرنوس وتبكي تودع في دارهم..
سمير واقف يتكيف متكي على الحيط..وسارة شوف فيه مالبعيد هذا البنادم مقدرتش تفهمو..
هو ينفخ فالدخان وهي عوجت فمها.
سارة: داير كي الزمر حاسب روحو..
فتحت التاقة طل على الكورتاج هي ويماها..
سمير شافها..مقدرش يهدر خاطر يماها معاها..بقا يخزر فيها باش تفهم روحها وهي شافتو وفاهماتو بصح تزكر فيه..رداتو يغلي..بقا يخزر فيها عينيه حمر راح يخرجو..وهي محبتش شوف فيه ولا علابالها..
سمير ملقاش حل راح قربعلهم فالباب..
الباب تاع الدخلة متبانش مالبالكون..
حورية: شكون هذا؟؟ نروح نشوف شكون..
هبطت شوف...
وهو رجع لسارة..رفد حجرة صغيرة ورماها عليها..
خزرت فيه مشنفة.
سمير: ادخلي نعل الراسة تاعك..
عوجت فمها ودخلت..
جات حورية
سارة: شكون ماما ؟؟
حورية: حتى واحد..دقدقو وراحو..
سارة في قلبها : هذي خدايمو باينة .بففف.
هبطت طل مالباب ..هو اصلا مقابل الباب وهو يروح لخر فالكورتاج مع وليد عمو ...وعارف خدايمها بلي ميهنيهاش خاطرها وحتى هو مهناهش خاطرو يشوفها كاش واحد..
هي شقت الباب وطل ..حتى تغلقت في وجها..
تخلعت: بففف الساامط ارهج يعيي
-----------------------------------------------------------
بووه عمبالي بلي ماشي وقت البارت مي هاد البارت حطيتو في خاطر سيسو sarah_soussita😘

ملاحظة : النهاية حتكون سعيدة يعني متخمموش رغم المشاكل بقيت سارة وتزوجت سمير 😂😂😂😂

ايا اقراو وطيرو ترقدو تصبحو...