ولاد الحومة

👴بارت83 👴

15
.#الحلقة_83:
زينب قاعدة في بيتها تبكي عينيها منشفوش مالبارح وهي تبكي وتاكل في صوابعها ندامة على الشي لي دارتو ...عارفة روحها غالطة ومخسرة بزاف ...قدما حاولت تعيطلو والو..محبش يرفد عليها ودارها ريجيتي باش متصرعوش بليميساج...
سمير فالدار هو وفاتح خوه مقلقين يستناو في احمد ماهومش عارفين واش صار خاطر هو عيط لسمير وقالو استناوني فالدار..نهدر معاكم..
احمد فالطريق يرحي  فالدخان رحيان ويمسح على وجهو مقلق من مواجهة خاوتها ودارهم وهي ...وواش راح يقوللهم على السبة يفضحها ولا يخبي عليها. .تلفتلو ...بقا يخمم طريق كامل حتى لحق لدارهم تنهد...
نزل ونزلها دوزانها كامل لزينب ...حس قهرة في قلبو ووجيعة على الحالة لي وصلت ليها علاقتهم ..رغم الحب لي كان بيناتهم مكفاش باش يعيشو مهنين ويتفاهمو..
نزل دوزانها ودقدق فالباب ...
فتحتلو فطيمة سولاتو ...سلم عليها ومن عينيه حزين..
دخل
احمد: سلام عليكم
رجعولو وعليكم السلام..
فطيمة: اقعد احمد...
قعد احمد وحشمان عمرو متمنى ينحط في موقف هذا..حتى معرفش واش يقول ولا منين يبدا..
فطيمة فاهماتو شافت فيه بنظرة حزينة
فطيمة: خير وليدي واش صار بيناتكم حتى وصلتو للطلاق ...كون حكيتو فهمتونا بلاك نلقاو حل..علاه يا وليدي زربتو للطلاق..
احمد مسح ب يدو في وجهو متحسر هو يقادر خالتي فطيمة و عارف بلي مكانش عاجبها زينب واش كانت دير معرفش واش يقوللها..
سمير قلق حس باحمد ويعرفو مليح ناس ملاح ويحشم
سمير: واش دارتلك خويا احمد...قولي والله نقتلها..
احمد : حشا مدارت والو ...
فاتح: امللا علاه طلقتها ؟!
احمد نحط في موقف الظالم مقدر يقولهم خانتني مقدر يقول والو....
احمد: حوست على دارها وانا ڨليل نخدم على دارنا وحتى وعندي لازم نقعد مع يما وخواتاتي وهي محبتش ...شهور وانا نحاول فيها ..الله غالب تحتمت هاك....كل واحد يشوف حياتو...
سمير جا يهدر تفكر سارة وبلي عندهم نفس المشكل لي فرقهم...يعني كون تزوج بيها يصرالهم هاك ...حس بغصة في قلبو .غمض عينيه بقوة...حتى فيقو صوت فاتح خوه يعيط..
فاتح: زينب...زينب.  ....ارواحي
زينب ناضت مخلوعة من صوتو...محبتش تروح خافت منهم...دارت في بالها قاللهم...
محبتش تروح حتى جات يماها داتها لعندهم...
دخلت ميتة بالحشمة وعينيها منفخين بالبكا واحمد مشافش فيها اصلا....وقهرها باهمالو ليها..
فاتح ناض وقف ليها شدها من يدها بقوة...
فاتح: واش نتي متحشميش تبهدلينا مع الناس ؟! انا علاه نسيمة ساكنة معاك ومع يماك ونتي تتكبري على الراجل ....
زينب شادة يدها وجعتها وتبكي ..
فاتح: اطلبي منو السماح وارجعي لدارك بركاي من التمسخير تاعك...ونزيد نسمع عليك حاجة شو في ...حابة تبهدلينا مع الناس ...
زينب فهمت بلي محكاش الصح زادت نقهرت كثر وكثر..
فاتح عيط : اطلبي السماح..
زينب: س....سمحلي احمد...
احمد تنهد وظم يديه لبعضاهم ..ووقف شاف فيهم..
احمد: نتلاقاو في دار الشرع نهار الاحد...
وخرج خلاها واقفة جسد بلا روح...
فاتح ضربها وسبها حتى يماها سلكتها ....
سمير واقف يشوف حاس بلي احمد مجروح بزااف وجرحو كبير في قلبو ومخبيه...
خرج احمد ركب طونوبيل ...وقلع للبحر حبس يشوف فيه وللبررد فليل والشتا طيح وهو ماهوش حاس بيه...رجع يسيل مالمطر..قلبو محروق....حتى دموعو خانوه..مقدر يبكي مقدر يدير والو....شعل قاروه حاس راسو راح يطرطق..حاب يبرد نار لي فيه..حاب ينسا ولازم ينسى...الدنيا عمرها متحبس عند انسان سيرتو اذا كان ميستاهلش...