ولاد الحومة

😒بارت39😒

جازت ليلة هبال بين زينب وراجلها ...زينب فرحت وراحتلها الغمة لي كانت حاسة بيها .
احمد حتى هو فرح لفرحتها خاطر كان مقلق ومضغوط مالمشاكل هذو وكامل وتمنا الوقت يوقف وميمشيش ويبقا معاها خاطر خاف يرجع كلش حلم ويرجعو للمشاكل ونقطة الصفر ...
..
احمد: راح الحال ..نرجعو للدار نصبح خدام.
زينب: ممم والله ريحت ميرسي ليك
احمد: مهبولة ..بردتي قلبك هه
زينب: هيه ههه والله ريحت..
احمد: امشي نروحو هذاك هو..
..
رجع احمد وزينب فالطريق..
زينب شافتهم يبيعو في لاكريم فالطريق..
زينب: مممم راهو يشهي.
احمد شاف فيها وشاف وين رهي شوف .فهم ..حبس ونزل
زينب: وين رايح ؟؟
احمد: درك نرجع.
راح احمد وجابلها ورجع..
زينب شافتو فرحت.
زينب: ييي ميرسي والله كان في خاطري ...طليت على قلبي..
احمد : مم جبتو لوليدي
زينب عوجت فمها : اييه علابالي ..وليدك راهو عندي نهار يزيد جيبلو ليه وانا مجيبليش ..
احمد يضحك عليها كي تدلل عليه..
احمد: غير يكون صحيح برك علا حساب الماكلة لي مراكيش تاكلي ..يادرا..
زينب عوجت فمها وخرجتلو لسنها : ههاهاها ضحكتني ..الله غالب معندي منديرلو..
احمد يضحك عليها وهي طريق كامل تاكل وهو يسوق ويشوف فيها..لقاها كملتها ..شبع ضحك.
احمد: اااههه راكي تاكلي ..كليتيها ڨااع !!
زينب: ممم بصحتي جات في وقتها عندي شحال متشهياتو..
احمد تقلق: وعلاه مقلتليش ؟؟
زينب: مقلتش خاطر كنا مداوسين..
احمد: هذي اخر مرة تخبي حاجة متشهيتها ..المشاكل في جيه ووليدنا في جيه فهمتي!!؟
زينب: ممم فهمت..
احمد تبسم : هذا واش تشهيتي !!
زينب مشنفة: ايه
احمد قرصها من خدها ويضحك وهي تتوجع : نحي عليا التشنيفة هذي وخليني نشوف ضحكتك قبل منروح
زينب: اعععع وجعتني..
احمد: نوجعك ايه..مشفتيش شحال وجعتيني كي راكي بعيدة عليا .
زينب هبطت عينيها وشافت فيه
زينب: ياك غدوة جي تديني
احمد: كون صبت ضرك نديك ماشي حتى لغدوة بصح خلي نهدر معاهم فالدار ونفهمهم قبل وغدوة نرجعك..
زينب: نشالله..
احمد: هكا عمري انا عندي فرحتك بالدنيا
زينب تبسمت
احمد تنهد: هيا انزلي هذاك الوقت لازم نروح .
زينب: اتهلا في روحك..
احمد: نشالله ونتي ثان..
نزلت زينب دخلت لدارهم وهو يشوف فيها قلبو وجعو كان حاب يديها معاه بصح خلي غدوة وتنحل نشالله
....
غدوة منذاك الصبح احمد مع يماه باية فالكوزينة يتقهوا..
احمد: يما اليوم نجيب زينب
باية: مليح راهي طولت في دارهم..
احمد: يما انا لي خليتها قعدت وراهي مريضة ..واليوم فليل نجيبها ونتفاهم معاكم كامل كي هي كي بناتك..حتى هذيك سميرة ختي عيطيلها جي ..
باية: بووه وسميرة واش دخلها ؟؟
احمد: كيفاه واش دخلها ياك موالفة ظل هنا واليوم مجيش !!
باية: ايه نقولها جي..
....
لحق اليل رح احمد جاب مرتو من دارهم.
زينب طريق كامل ساكتة خايفة ترجع ويرجعو المشاكل وين كانو..
شاف فيها احمد عارفها مقلقة شدها من يدها يطمن فيها..
احمد: علابالي راكي نقلقة..بصح ندير لي عليا باش تتفاهمو ونتي حاولي واوقفي معايا ..نعرفك فحلة علاه حبيتك ودخلتك داري....
وراكي يمات وليدي اذا كتب ربي..
زينب تبسمت: نشالله
-------------------------------------------------------
اي كناو بلي طولت عليكم اليوم بصح معليش هدا وين نضت 🙂