ولاد الحومة

👼بارت89👼

الحلقة_89:
امير كان شافهم يحكو وشافها كي عنقاتو رجع يغلي هو لي خطيبها وراح يتزوج بيها يدها متحطهاش على يدو وهذا صاحبها تعنقو هي وفرحانة..
رجع ميشوف والو...يجري فالطريق ويسب...راح للبيرو تاعو وين يخدم...يتكيف ويحرق فالدخان رحيان صورتها مع سمير مزالت بين عينيه مقدرش يستوعبها ...كيفاه هو حرماتو من كلش وهذاك تعطيلو واش يحب..كيفاه هو لي عندو كلش مقدرش يشريها وهذا لي معندوش دار وقيسو قيس روحو تحبو هكا...واش دارلها باش كسب قلبها..
بقا يخمم حتى وجعو راسو مالتخمام...
امير: يعني حتى ونزوج بيها تبقى تخمم فيه...درتلها كلش والبارح عطيتها جهاز لي مداتوش غيرها ..ذهب ودراهم وحوايج..وفلخر تصبح تعنق في لوخر...
جبد جبدة تاع ڨارو ويشوف في فوطو تاعها في تليفونو ويمس فيها بيديه ويعشق فيها بعينيه...
امير تنهد: اااه ياسارة كون تعرفي شحال نحبك...راكي ظاربتلي في خاطري حتى متامنيش عقلك...علاه حارمتني...علاه ياك نويتك لداري...واش عجبك فيه..
حس بحرقة في قلبو.معرفش واش يدير..تلفلو كلش.
تكا على كورسيه طفا تليفونو ورفد روحو وخرج....ركب طونوبيلتو وقلع
....
نرجعو لسارة وسمير
سارة: سمير نروح معاك..
سمير: وين تروحي مع ر***؟؟؟
سارة: كي نكونو مع بعض خير نقدر نفهمو انا ومعاك ميلقاش واش يقول ..
سمير: اوااه لالا خليها عليا انا نفهمو اذا مفهمش بالملاحة ندوروها قباحة..
سارة: لالا سمير عيشك تفاهمو بالهدرة وتفرى نشالله.
سمير: نقولك حاجة والله معلابالي بيه...ديجا عقليتو اصلا معجبتنيش..وديجا سكتت بزااف...
وناض رايح..
سارة وقفت : عيشك سمير مدير والو..
سمير : منبعد.
وطلع فالطونوبيل
سارة لحقاتو: سمير اديني معاك..
سمير عيط: اسكتي...وين تروحي...خليني نفريها معاه اليوم قبل غدوة.
وديمارا
سارة قعدت مقلقة دخلت تقرا كوور.وهي مقلقة مقدرتش تركز.حتى عيطلها سمير فرحت رفدتلو بلعقل...
سارة: وي سمير
سمير: مكاشو فالخدمة ...بلاك يكون راح للدار خاطر لي يخدم معاه قالي كان عيان يبان
سارة: اوك ودرك واش ناوي دير؟
سمير: وين يسكن ؟؟
سارة جات تقولو تراجعت...خمت هي تروح ليه قبل
سارة: معنديش لادراس...عارفة يسكن وحدو ..مي منعرفش وين.
سمير: بفففف اوك منبعد تبان..
سارة كوبات....وخلاص الكوور جيست...خرجت ...
ماريا: وين رايحة؟؟؟
سارة: عند امير لدارو
ماريا: هبلتي ؟! تروحي ليه للدار وهو وحدو؟
سارة: ايه معنديش حل...وزيد ولد عمي ميديرلي والو..مزال مهبلش..
ماريا: اوك دبري راسك...
سارة: ادعيلي تتحل مشكلتي
ماريا: نشالله ربي يكون معاك...
راحت سارة ناوية تحل مشكلتها وماهيش عارفة واش يستنى فيها..

______________________________________

تحسبا ول مقدرتش ندخل لعشية هاني راح نحطلكم درك على ضربة

عمبالكم حاجة وصلتو لكرونيك ل 1000 فوت 😍😍 يعطيكم الصحة 😘