ولاد الحومة

🤒بارت71🤒

.#الحلقة_71:
سارة فالطونوبيل طريق كامل تبكي عارفة راح يودعها وهي ماهيش حابة ..ومهيش حاباتو يروح اصلا
سمير بعد شوي على لافيل وحبس شاف فيها ..
سمير: سارة افهميني هذي حاجة في صالحي وصالحك..
سارة: في صالحك وحدك ..نتا حاب تهرب مني وتبعد عليا.
سمير: يالمهبولة راكي مرت راجل درك واتهلاي فيه بركاي مالهدرة الفارغة..
سارة عيطت وتبكي: مانيش مرت راجل مانيش..منحبوش نكرهو اععع نكرهو..
سمير: وكي تكرهيه علاه قبلتي بيه ؟
سارة: بسبتك..مراكش عارف علاه ؟؟
سمير: انا ؟ انا مقتلكش اقبلي بيه..كنتي ترفضيه ..
سارة غطات وجها وتبكي : منرفضش نتا سمحت فيا..انا حسبت كي نقبل بيه نتا ترجع لعقلك وترجعني ...بصح نتا سمحت فيا ومحوستش عليا ولا كيفاه راني..
..
سمير محروق من داخل عليها مي محبش يبينلها ..حابها تقنع بنصيبها وتنساه .
سمير: عارف بصح مدام مزلت قدامك..ودرك كي نبعد مع الوقت تنسايني ..وتوالفيه ..وهو مدام يحبك راح يعيشك سلطانة ..متخشنيش راسك معاه برك..نعرفك فحلة وتهنيه..
سارة: نتا هذا واش تعرف غير نروح نروح..روح حاب تبعد وتعيش حياتك الله يسهل خليني انا نموت ولا نهبل..
سمير تبسم : هههه متهبلي موالو عارف نرجع نلقاك كي الوردة ..ديري الكوراج برك نعرفك قوية ..
سارة: مانيش قوية سمير ..قلبي مقهور ..قهرتني حرام عليك..وزيد راح نتزوج براجل نكرهو..
سمير تقلق : بطلي ق*** علاه شادة فيه .نتي بهلولة علاه تقبلي بيه ونتي تكرهيه ؟؟
سارة: قتلك وفهمتك بسبتك...والمشكل ولد عمي ومنقدرش نبطل نخاف تتفرق العايلة ...ومانيش حابة نكون سبة ولا يسمع بابا والله يزوجولي بسيف..
سمير تنهد تكا على الكورسي..وشاف فيها وهي حالتها حالة...ويقول في قلبو ..
ااه ياربي كون جات ليا نديك معايا نخطفك معلاباليش بر*** ڨااع ..نخبيك عندي ويروحو يق*** كامل كيما راهم..
بصح الله غالب..
زير على يديه مالغش معندوش حل غير يقنع سارة..
سمير تنهد: سارة نعرفك شاطرة وحاولي تكسبيه ...هذا مكتوبنا ونرضاو بيه معندنا منديرو ...
سارة: ونتا ! ؟
سمير: وشنو انا ؟
سارة : راح تروح ؟
سمير:ايه مزالت ساعة هكاك نديماري ..
سارة هبطت عينيها مذبالين وقلبها مجروح وسمير حاس بيها ومقهور كثرمنها..حاب يعنقها ويبكي على صدرها ويقولها نحبك ومانيش قادر نفراقك بصح لازم يشجعها باش ترضى بنصيبها
سمير: شبيها القطة عاقلة..شمختها الشتا ههه
سارة شافت فيه : سمير عندي طلب عندك ديرولي
سمير: اطلبي لي تحبي ..
سارة: متروحش سمير...
سمير استغفر..
سارة: وانا شكون يعس عليا كي تروح..شكون يعيط عليا شكون يسبني ويبهدلني من غيرك؟؟
سمير: ههه مهبولة عندك لي يسبك ويبهدلك غير متخافيش..
سارة: يعني قررت تروح خلاص ومراحش ترجع؟
سمير: نجي ساعة ساعة نشوف يما..
سارة: وانا ؟ متشوفنيش ؟
سمير: سارة ياسارة قلبي راح يخرج افهمي ..حتى انا بسيف عليا وصعيب وبعدت غير في جال باش منبقاش نشوفك معاه ونتعذب ..علابالي منحملهاش...افهميني يابنت الناس راح نهرب منك كيفاه نجي نشوفك هذي ؟
سارة رفدت يديها وشافت فالسما
سارة: يارب اهديلي سمير..يارب رجعولي سالم ياربي ...خليه يفهم بلي انا منقدرش نعيش بلا بيه حتى ويبعد محال ننساه ولا نخمم في غيرو...ياربي اعطيلو عقلو وخليه يفهمني.
سمير يشوف فيها ..شافت فيه وقاتلو قول امين..
سمير: ههه امين
سمير : هيا امشي نوصلك لافاك..
...
مشاو وصلها لافاك يسمعو في غنية الشاب وحيد..
جاسبار تكوني غاية ماشي كيما كنتي معايا
جاسبار متكونيش مغبونة تكوني بيان ماشي محقورة
جاسبار تكوني لقيتي الحاجة لي كانت خاصتني.
خليني منك انا خليني لي فيا يكفيني روح متزيديليش..هني روحك ياعمري وانا هنيني
.
سارة تسمع وغايسة حتى لحقو لافاك دنيا شتا ..
حبس سمير وشاف فيها .
سمير: اتهلاي في روحك...
سارة جات نازلة شدها من يدها...واعطالها عفسة ديرها في يدها تاع ليكيب تاع حومتهم ..شافتها نخلعت .
سمير لبسهالها : هذي خليها عندك حق القورمات لي ديتهالك وباش تتفكريني بيها..خاطر جامي مديتلك حاجة باش متقوليش سمير كان مشحاح..
سارة هبطت ودموعها نازلين مقدرتش حتى تقولو ابقا على خير...
سمير مقهور ديمارا ديراكت محبش يشوف فيها..راح للدار ودع يماه وقلع ..
طريق كامل يخمم في سارة وهدرتها غاضتو بزااف ..ضرب يدو على الفولو تمنى كون الدنيا مكانتش هاك مي الله غالب مكتوب ربي لازم يرضاو بيه بحلاتو ومراراتو