ولاد الحومة

🙂 بارت5 🙂

سارة تمشي والناس يشوفو فيها مشمخة كامل..هي حشمت وجها رجع حمر . سارة: ياحي عليا على التبهديلة تاع اليوم مننساهاش... مرايا: معليش سارة الله غالب ..روحي للدار وبدلي وافطري ولعشية نتلاقاو.. سارة: نشالله.. راحت مريا لدارهم..وسارة مكملة طريق وحدها مهبطة راسها وتزرب باش تلحق لدارهم.. تمشي وتهدر وحدها : بفف كامل بسبة الرهج هذاك تتع سمير..قلقني حتى مشفتش الطونوبيل وتشمخت .. سمير لحقها بالطونوبيل وهي ماشافتوش خاطر تزرب باش تلخق للدار ومركزتش فالطريق واش كاين.. سمير: بسس سارة محبتش شوف كملت تمشي ومركزتش على الصوت خاطر سمعت طونوبيل وسمير معندوش طونوبيل.علاه مجاش في بالها بلي هو.. سارة: بفف شكون هذا البغل ثاني.. سمير يتبع فيها بلطونوبيل بلعقل. سمير: وشبيها القطة اليوم مراهيش تخبش راهي عاقلة . سارة حبست عرفت صوتو ...تنهدت..وخزرت فيه..شافتو بالطونوبيل تاع محمد.. سارة نخلعت: اااا ه سرقتلو طونوبيل مي نتا صح مريض ؟؟ سمير: حبيت نوصلك في بلاصتو علاه وين المشكل ؟! سارة: كامل تتشابهو كيما بعضاكم.. وهبطت راسها تمشي.. سمير نزل مالطونوبيل وقطعلها الطريق. سارة: اه يارب كمل النهار هذا على خير سمير يضحك عليها سارة: وتضحك عليا ثاان ..ااه ياربي..واش درتلك باش جاك عليا ؟! سمير: نقولك ؟؟ سارة: ايه قول .. سمير حك راسو وخزر فيها :نفحتلي عليك برك.. سارة: الله يهديك..نتا فارغ شغل ولاهي بيا ..انا مانيش فارغة شغل .. سمير: والله ماني فارغ شغل ..معنديش الوقت حتى باش نحك راسي.. سارة: شوف اسيدي وين نروح نلقاك دور مورايا..واش مالشغل عندك؟! سمير: ونتي وحدك قوووجا شغل.. سارة: حتى واحد مكلفك بيا. سمير: لاا كلفني سارة مستغربة: شكون..؟؟؟ سمير: متحوسيش تفهمي.. هوما هكاك جا محمد كان يتبع في سمير شافو حابس.. سارة شافت محمد مشمخ كامل ..مفهمت والو...خزرت في سمير لي يضحك..بقات مخلوعة فيه يعني هو خلفها ..بقات غايسة فيه مقدرتش تفهمو كيفاه يخمم ديما يسبها ويعيط عليها بصح مرات يخاف عليها ومرات يدافع عليها. . محمد لحق طونوبيلتو وخزر في سمير محمد: والله تخلصها متخافش.. وركب طونوبيل وراح سارة: علاه ؟! سمير طلع حاجبو مستغرب: وشنو لي علاه ؟؟ سارة: علاه شمختو؟! سمير شعل ڨارو وخزر فيها: فارغ شغل . وراح وخلاها واقفة مخلوعة تبع فيه بعينيها.. سمير بعد شوية وخزر فيها سمير: واش مسمار جحا تبقاي ثم ؟! راح يفوتك الحال.. سارة بقات تعوج في فمها ودخلت للدار بدلت حوايجها وفطرت ورجعت تقرا لعشية..حكات لمريا واش صار ومريا تضحك عليها.. سارة: يالبقرة انا نحكي من نيتي ونتي تضحكي؟! ماريا: والله سمير تاعك دوخني.. سارة: ماشي تاعي تاع روحو. ماريا: ههههه ايه فهمنا ماتكليناش برك.. دخل البروف تاع المات.. سارة: راني خايفة ماريا.. ماريا: اسكتي حتى انا .. سارة: سوور ندي صفر قدام خوه.. ماريا: اووه متخلعينيش ياك قلتي زعما خدمتي ؟؟ سارة : مخدمتش والله غلطت كي رحت للدار لقيت روحي هردتها.. .. اعطالهم البروف العلامات فلخر تاع الحصة ..سارة جابت 7 على 20...ولات تبكي... خرجو هي وماريا وهي عينيها باينة بلي تبكي..خاطر العام تاع الباك ومبقاش بزاف وتدي 7 برك.. لحقت قدام وين يخدم سمير ..شافها عينيها منفخين مالبكا .مفهمش واش بيها سمير: شبيك!! ؟؟ علاه راكي تبكي!! سارة: مدخلش روحك خليني في حالي سمير شدها من يدها : ساارة انطقي شبيك؟! شكون دنا ليك ؟! سارة جبدت يدها منو: حتى واحد مخدمتش فالماات.. سمير: علاه شحال جبتي ؟! سارة: 7 سمير شد ضحكتو بسيف وهي فاقتلو سارة: تضحك عليا ..انا البهلولة لي نقولك.. وهبطت راسها وراحت تمشي تزرب.. سمير: ههه متعرفيش تقراي..كون تقعدي فالدار تخدمي الشغل ماشي خير!! سارة محبتش جاوبو غاضتها قرايتها لي دارت ليكور علاجالها ومداتش مليح..محبتش حتى جاوب سمير كيما موالف ..راحت تزرب ودخلت لدارهم. سمير قلبو وجعو عليها حاس بيها.. سمير في قلبو: اتزوجي بيا نديرلك جنة فوق لرض واش ديري ب** القراية .
----------------------------------------------------------
كي شفت لي بارت قصار بزاف قررت نحط 2 بارت فنهار ولحد صباح واحد عشية 😘