وفي القلب انت

الكاتبة#فيّدعبدالله(٥)

مسااء الخير شلونكم ليش التفاعل قليل ضجت😔صوتوا لان بدت الاحداث تصير احلى متابعة طيبة

البارت الخامس
فيدعبدالله

انا المايدري وين الشوك وداه
انا المتروس ناس ومحد وياه

فرح:مرت الايام ورقية بعد ما شفتهة غير مرة وحدة لان جانت سادس واجتي جايبة رسالة من فيصل كلهة حب وغرام واشتياق وبنهايتهة كاتب اصبريلي بس للعطلة ان شاء الله واتقدملج احس طرت من الفرح حتى الايام احسهة صارت تمشي ببطئ لان منتظرتة بس الماحسبت حسابة هو فاجعة هزتنة هز كعدنة الصبح على صريخ امي الهز البيت ابوية بفراشة متوفي جانت يوم٢٧/١٢/٢٠٠٦تاريخ اكرهة لحد هسة الفجر صوت العصافير تارسة الشجر وصوت عياط النسوان تارس البيت الجو بي برودة والابواب مفتحة الهوة يطب ويطلع باارد ووجوه رايحة ووجوه راجعة تعزي نص النسوان مااعرفهن الصبح وجابوا من المستشفى سبب الوفاة جان سكتة قلبية قبلهة بيوم هو تعصب عالولد وكام يصيح لان صاير عدهم اهمال للبساتين وهاي فلوس ناس نام وهو مغثوث وصبح سودة علية ميت بفراشة بس مكعد امي شارب مي بالليل وراجع نايم والنومة بعد ما كعد منهة ملخت روحي عليه صعب تخسر ابوك تحس راح السند راحت هيبتك وراح الي يوكف كدام العالم كلهة علمودك جان يحبنة وحتى لو اذونة خواني ميقبل جان ومن تمرضت هواي اتأذة علية اغلب المرات جان هو الي يتعنة يستلملي الانسولين الي اضربة من المركز عبايتة وعكالة شماغة دشداشتة اتذكرهن من يكعد يعدل بروحة كدام المراية لابسهن ويطلع يجيبلي علاجي اااه حسرة بكلبي لهسة من اتذكر شكلة وصوتة الف رحمة على روحك يابة ،خلصت ٣ ايام الفاتحة واحنة خلصنة اني كمت مااكدر اشيل لاايد ولا رجل سكري تخربط كلش وكمت مااعرف اني وين اخر شي ليث اخذني للمستشفى طبعا ليث بهالفترة جان كلية يدرس بالبصرة ونادر ميجينة بس بالعطل هو جان ومازال احن خواني هو واحمد احمد نابع حنانة من فطرة وليث من ثقافة يعرف شلون يتعامل ويانة ،بالمستشفى علكولي مغذي حلو لان طلع سكري مصفر وللعصر رجعت وطبيت البيت وحشة اختنكت العالم رايحة بس عمامي ثنين كاعدين بالصالة الي هي كل الكعدة بيهة والغرف كلهن مفتوحة عالصالة ٤ غرف جانن ومطبخ وحمام المهم عدن الايام وعدت السبعة والاربعين رقية اجتني بالفاتحة مرة ووراهة مرتين تطمن عني بالمرة الاخيرة جانت جايبة موبايل امهة وكالت فيصل يريد يسلم عليج وياخذ من خاطرج اجذب لو كلت ماجنت محتاجة اسمعة تعبانة جنت لدرجة ماهامني شي غير بس ارتاح شوية لذلك اتجرأت ورحت قفلت الباب على كيف ورديت بصوت ناصي الوو

فيصل:هلا يابعد كل ناسي البقة بعمرج ليش هيج صوتج رايح ياروحي انتي والله جاي اتكطع عليج لان تعبانة ومابيدي شي شلون اواسيج

فرح:لاتسوي بروحك هيج لخاطري

فيصل:اموت عليج وعلى خاطرج والله وداعتج لا اعوضج كل هالدموع فرح يافرحتي بهالدنيا بس ديري بالج على نفسج