وفي القلب انت

الكاتبة#فيّد عبد الله(١٦)

مساء الخير شلونكم يا حلوين ،شنو رأيكم بالقصة واحداثهة لحد هسة،راح ابدي اسرعلكم بالاحداث شوية لان هي من ٢٠٠٧ تقريب بلشت فاحداث هواي راح ابدي اذكرلكم احلى واهم الاحداث عيشتكم التفاصيل بالبداية حتى يصير عندكم احساس بمشاعر كل الاطراف،وعسة اتركم ببارت خلو صوتووووولة ،متابعة طيبة

البارت السادس عشر
فيد عبدالله

فرح:استغربت وجمدت بدمي وقلبي وجعني كلهن حسيت بيهن من صاح فيصل باسمي طلعت من ورة النسوان وكلت ها خوية باوعلي وابتسم وكال

فيصل:بلا زحمة خوية اخذيلينة شكم صورة

فرح:حسيت متقصد يصيحني من دون هالعالم يريد يحسسني بالحس بي بس اني ابتسمت بهدوء وكتلة تتدلل خوية اخذت الكامرة جانت ام الفلم بوكتهة

سماح:جيبي اني اصور هم اعرف

فيصل:لا خوية مشكورة فرح تعرف شأريدددد

فرح: جان مركز على الكلمة الاخيرة ما باوعتلة كتلة واني مدنكة تتدلل كال يلا اخذيلنة هاي اللقطة باس هالة من راسهة واخذتلهم لقطة وبعد لقطات الهم ووية الاهل اخر شي صاح تعالي ويانة صورة باوعتلة وكتلة لا هشام ميقبل

سماح:وليش ميقبل هي بين الاهل

فرح:ميخالف ما سألتة عود عالعرس اسألة جنت مااريد اي صورة تجمعني بي اي صدفة مااريد تجمعنة خلي الله يهني بعروستة كال هو هاي هي تعبناج ابتسمت وكتلة تتدلل انتة اخوية و ان شاء الله يوم عرسك علية الكامرة والصور ودرت وجهي ومشيت كعدت على كرسي قريب الدرج والتمن الجنانين والخوات على هالة وفيصل ويركصن كلهة تهوس عادي عندهم بس اني عزلت نفسي وبقيت بمكاني وخليت بصفي عبايتي وانتظر شوكت نطلع اختنكت كلش من هوستهم كووم نسوان حسيت ايد على جتفي باوعت رقية ابتسمت بوجهة

رقية:انتي زينة

فرح:ورد شبية لعد

رقية:ان شاء الله لعد ليش كاعدة هنا

فرح:ما متعودة هيج لمة وهوسة ،شوية وسمعت صوت هشام بالمطبخ يصيح فرررح فرحتي ابتسمت وكمت الة واكو عيون علية لان يصيح فرحتي لبست عبايتي ورحتلة

هشام:اروح فدوة لام عباية وشامة يلا نرجع يردون يضلون للعشا واني كلش صدعت

فرح:علوواه والله تكسب بية اجر اني هم صدعت وهوسة صاراي شكد خاتلة عالكرسي ذاك

هشام:اروح فدوة للمؤدب حتى بغرفة النوم

فرح:هشاااام لا تخجلني طبعي هيج شسوي

هشام:شلون راح اخذهة وامشي لغرفة عمي لا تتدلعين كدامي يامرة ما اتحمل يلا روحي كلي لامي وتعالي انتظرج هنا

فرح:ماشي صدك طبيت كلت لخالتي كالت براحتكم يمة ،رحت باركت لهالة وبوستة وباركت لفيصل الي لزك يمهة اخذة الواهس خطية والله دعيت الله يسعدهم ويرتاح وياهة مشيت اريد ارجع وجلب كعب حذائي ببدلة هالة وهووب طيحة على وجهي كلت راح يتفلش بس ايد قوية لزمتني وسندتني باوعت فيصل