اليوم جمعـة....نضت الصبح الساعه 10 فطـرت وضميت الحوش كله وبخرته وناضت ماما توتي في الغداء.....تغدينا وكلهم رقدوا ماعدا نا قعدت مكسدة عالنقال ونحكي مع هناء....مررر الوقت وجاء وتعشينا وقعدت نقرا للساعه 12 ورن عليـا رقم انتصار....استغربت ورديت بخوف"
انا »» الو انتصار!
رد صوت غريب »» انتصار فالمستشفى!
نا انصدمت »» كيييف ومن انتي وكنهااااا انتصار؟!!!!
الصوت »» نا لجين اخت سليمان انتصار عندها حالة وضع توا وتبي تجيب بالعملية قوليها لامك
انا بارتباك »» حاضر حاضر
"مشيت نجري نوضت ماما وقلتها لها وانفجعت قعدنا الليل كله ندعو انه مايصيرلها شئ وتنوض بالسلامة....بعد ساعتين ونص من السهر والتعب رن النقال وردينا بخوف"
لجين »» لولولولولولييي انتصار جابت عيل
ماما فرحت »» الحمدلله ياربي الحمدلله وانتصار كيف حالها
لجين »» لا تمام توا راقدة من تعب العملية وبعد بكرا بيديرولها خروج
"سكرت لجين وفرررحنا وااجد ولميت دبشي في ساكو ع اساس نقعد معاها....رديت للدار لقيت رسالة"
(انسيني وفوتيني....من بكرا بنفسخ الخطبة...طلعتي متبيش تحكي معاي واتعذري ونلقاك انتظار اخر الليل)
"انصددددمت من الرسالة وقعدت نرمش بصدمة....كيييف نا وين وهوا ويين...قعدت نبكي ماوجعنيش هوا لكن وجعني الظلم من غير سبب.....قعدت نبكي وقفلت النقال بدون مانرد عليه ورقدت"
.
.
.
.
ثاني يوم....
"نـضت الصبح بدري س 8 فطرت وفتحت فوني لقيت 10 مكالمات من معتصم.....فتته ومارديتش عليه واساسا مش طايقته....ناضوا هلي كلهم ورنت انتصار وحكينا معاها شوي وقالت تبيني نجيها ونبات عندها....ع الساعه 11 وتيت روحي وقبل بنمشي وقفتني ماما"
ماما »» استأذنتي من خطيبك ولالا
انا ببرود »» اها وقالي باهي
ماما ابتسمت »» باه تمام ونحنا توا نجو بعدين
"مشيت مع سليم وطول الطريق ساكتين....وصلنا بعد وقت ولقينا سليمان فالحوش وقال ان انتصار كتبولها خروج بالغصب اليوم.....خشيت جوا الحوش وضميته كله ورتبته وعدا سليم وسليمان مشا للمستشفى....كملت ومشيت للدار اللي بتت فيها من قبل وفتحت الروشن شفت معتصم مقمعز برا ويدخن خفت وسكرت الروشن بسرعة"
"ولعت الtv وكسدت عليه وجت الساعه 1 ونص طق الباب....لبست وشاحي وصبيت"
انا »» من؟
سليمان »» انا سليمان افتحي
"فتحت الباب ومدلي غداء من المطعم"
انا باحراج »» عليش تعبت روحك
سليمان ضحك »» لالا لاتعب لاشي...نا توا راد للمستشفى وع الساعه ثلاثة تطلع انتصار
أنت تقرأ
سجينـة المـاضي
Ficção Adolescenteرواية باللهجة الليبية للكاتبة سرو الحاسي ❤✨تحكي عن بنت وحياتها بعد ماتركها اعز الناس ورحل عنها...تمر بصعوبات وعذاب في حياتها بسبب هالشخص...هل ربي حـ يعوضها بشخص غيره او مستحيل تنساه ويقعد ذكـرى خالدة في ذهنها؟..كل شي حتعرفوه مع احداث القصة💜ان شالله...
