الحلقة 22:
فاتو شهرين و ترقيت في خدمتي و مام في علاقتي مع فهد ولينا رومانسيين كثر و نزهاو نخرجو نتعشاو برا .... الخ
واحد النهار كان عندي سوربريز لفهد لأنو كان عيد ميلادو درت عشا رومسي ورد حمر و شموع بريحة جوز الهند و لبست سواري مع مايك آب شباب و سرحت شعري مليح و سنيتو
غير دخل كنت مطفية ضو و هو كي شعلو و شاف الحالة فرح وحار و قعد يحوس عليا عنقتو من اللور و قتلو
روان : عيد ميلاد سعيد كل عام و نتا بخير
فهد ( دورني عندو ) : كل عام و حنا مع بعضانا ماتفرقنا حتى حاجة
روان : عجبك الديكور لي درتو ؟
فهد : كيفاه مايعجبنيش حبيبتي مرتي لي داراتو ....بصح وينو الكادو تاعي
روان : إيي صحح ..أصبر ( جبتلو بالون كبير حمر و عطيتهولو)
فهد : هههه وشي هذا.... هاذا هو الكادو ؟؟
روان : ههه إييه فرقعها
فهد : هههه تخدمي واحد الخداايم ....( جاب موس و فرقع البالون طاح منو شوكولا و برية هزها و سقساني) وشنو هاذا
روان : حل وشوف
حل فهد البرية ولقا تاست
فهد : وشنو هاذ ( و قعد يقلب فيه)
روان : كيفا وشنو هاذا ....هذا تاست
فهد : إييه ...بصح وش معناتو ...
روان : هههه ماعناتو ....( و قربتلو) راح تولي أب يا البهلول تاعي
فهد (قريب يبكي ): أحلفي ....ماكنش منهاا ....(حضني بالزور حتان عييت نتنفس) ...مانيش مصدق حبيبتي راح تكون أم ولادي و دجيبلي طفل .....حاس روحي راني نام ....شوفي من اليوم مانسحقكش تعيي روحك و تاكلي مليح باسكو ذرك راح تاكلي لزوج و ايه ذرك نجيب خدامة نتي ماتقيسي والو ...ايييه و الخدمة غير انساي تخدمي ....
روان : ههههه ....وش بيك أني حامل مانيش مريضة ....
فهد : هاذ الحوايج مافيهمش اللعب ماتناقشينيش شحال من وحدة هزت الثقل و طيحت البيبي ....ماعنديش استعداد نريسكي
روان : ههه اييي بصح نتا زدت فيها عندي غير شهرين الحكايات هاذو في الشهورة الأخيرة
فهد : أأأ نن عمري تعيشي ديريلي بخاطري
روان : ايي بصح هكا راح ....
فهد : ماكانش بصح ...هاذا أول طفل يجينا خليني نتهالا فيه
روان :غير فييه ؟؟
فهد : ههههه بديتي تغيري ... كي مانتهلاش في مرتي فيمن نتهلا
روان : هههه ...نكونفيرمي برك...ذرك لازم نقول لدارنا وداركم
فهد : أأ هييه لازم نتي عيطي ليماك و أنا نفريها مع دارنا ....تعرفي هذا أحسن كادو جاني في عيد ميلادي
تبسمت و رحت جبت تيليفوني عيطت لماما و فرحت بزاف و باركتلي و تمنات تجي توقف معايا بصح تكاليف السفر بزاف غاليين و زيد ماتقدرش تخلي بابا وحدو هاذ المدة الطويلة
بصح خالتي رحمة و إلينا قامو بالواجب و كثر يعطيهم الصحة ..... وفهد حكاية وحدو هبلني السيد موسوس ياي غير نشوف حاجة في لاتيلي و نقولو تبان بنينة يروح يجري يجيبها ولا يجيب وحدة تشبهلها و مايخليني نقيس والو وصلت حتان بدا يعيط عليا وأنا مقلقة باسكو خنقني ماتفاهمناش فترة بصح مبعد جا راضاني و تفاهمنا يخف شويا و هو حاول
جازت الزيادة صعيبة بزااااف و قلبي خرج بصح الحمد الله جبت طفل يهبل يشبه لباباه كي كان صغير سميتو يوسف واحد الطاير يا يما كنت نشكي من باباه جا ولدو و يتفاهمو بزاف اييه كيما قالك الإبن سر أبيه
أنت تقرأ
إنتقام القدر
Fanfictionكرونيك جزائري من تأليفي يحكي قصة طفلة حبت صديق الطفولة نتاعها بصح هو ماكانش مهتم بيها و تدخل في حياتو طفلة واحد اخرى و يولي مهبول بيها و هي تحاول دير مشاكل وشنو هي هاذ المشاكل ؟و كيفاه تطور هاذ العلاقة ؟ وين توصل ؟ راح تعرفو هذا و كثر مع الأح...
