الحلقة 9 :
فات عام و كان أصعب عام مايا دارتلي بزاف المشاكل و الجامعة كامل سمعو بلي أنا كنت نحب صاحب مايا و اخرين قالو بلي راني كيفها و رانا نتقابضو على شكون تديه و اخرينو قالو بلي أنا حابة نسرقهولها ...... يعني شيعتني و كل مرة تخرج عليا هدرة و مام البروف كانو يحتارموني ولاو يشوفو فيا ق&&& وتبدلت شوفتهم ليا وصلت الهدرة لماما و اضطريت نحكيلها ميش كلش طبعا قلتلها بلي كنت مع نورهان في الريستو تاع وليد خالها شفتهم نثم و نورهان حكاتلي عليها روحت باه نولهو هاذا ماكان هي لي راهي تخرج عليا الدعايات ماما طبعا قاتلي وش دخلك كون خليتيه مناقشات طويلة عريضة فشلتني صح صح بصح مزيا لي كان تايغر واقف معايا عاوني بزاف وليت إنسانة قاوية واحد مايقدر يكسرني حتى أمجد بالعكس وليت حجرة باردة قدامو و ميش غير هو وليت مانحس بحتى واحد باسكو ماكفاش مايا لي نشرت هدرلت عليا و زاد كمل عليا كي وقف معاها و يقول هي ماغلطت في والو نتي لي دخلتي روحك بيناتنا تقور سحراتو
اليوم قاعدة نتفرج حتان جات طاطا سليمة دخلتها ماما للصالون بعد السلام و وش راكي صفا ؟؟......
سليمة : سعاد ختي اليوم ثاني راح نقصدك خطبت لأمجد و بزاف خدمة حصلت فيها لاكان تقدري تعاونيني قلتيلي مرة عندك ختك تفهم في القاتو حيت نشاورها في لي مودال تاع القاتو الجدد ...وراكي عارفة
سعاد : ياخاه وش راكي تهدري باينة راح نعاونك مابيناتناش المهم نتي قوليلي وش تسحقي و راني هنا
( و أنا قدامهم ماني حاسة بوالو مافرحت مازعفت و بالعكس عاونتهم في بزاف حوايج و ياريتني ماعوانتهمش كنت كي نروح لدارهم نوجدو لي بوات تاع القاتو و لي كارت و ..... كان يفوت أمجد بلعاني و يلوحلي الهدرة { إييه يا يما راح نجيبلك عروسة و عليها الكلام ....علابالك يما نلف و ندور و مانلقاش وحدة كيفها ....}
و أنا كنت نسكت و ماندير حتى ردة فعل على هاذي عاودها شحال من مرة و المرة الاخيرة قررت مانوسكتش و قتلو { اييه بصحتك أفضل عروسة في الدنيا هاذي ... تستاهل وحدة كيفها خويا – سكت شوي و كملت- ....العزيز } ذاقتلو و حس بحاجة مايش نورمال ومن ثم مازادش جبد الحكاية
و كي وصل العرس وجدت معاهم كلش بصح ماروحتش ميش كيعاد غرت باسكو مانيش حابة نشوف وجه المشرارة هاذيك و مانيش ناقصة بهادل بصح ماما راحت أنا بقيت في الدار عيطت لنورهان قسرنا و قاتلي كون روحتي خيير باه ماتباني بلي راكي غرت و تقول عليك هاذيك بلي ربحت و نتي خسرتي قلتلها أنا مايهمنيش رايهم فيا أنا علابالي بروحي مانيش حابة نكسر راسي ياختي خلي نشري راحتي خير قاتلي عندك الحق و بقينا نقسرو درت العشا ليا وحدي باسكو بابا راح تعشا معاهوم باه يجيب ماما في طريقو
أنا قعدت نتفرج في الليل و في نفس الوقت كنت مع الفيس هدرت مع تايغر سقساني وين راكي قتلو في دار قالي مليح وش ديري قتلو والو اني نتفرج برك و بقينا نهدرو حتان جات ماما و بابا ديكونيكتيت ورحت نحل الباب و سقسيتها
روان : كيفاه جاز العرس
سعاد : من جيهة التجهيزات ماخص والو بصح جا شايح مانعرف علاه
روان : هاه ماستغربتش يعني
سعاد : عييت أنا نروح نرقد غدوة عندي هدرة معاك
روان : وش من هدرة ...
سعاد : مانيش قادرة مامبا نوقف .... خليني نريح و غدوة نكون مصحصحة مليح باه ياك غدوة ماتقرايش
روان : مانقراش بصح تفاهمت مع نورهان نتلاقاو و نفطرو كيف كيف
سعاد : آآآ لالا أنولي رونديفو تاعك معاه ...نسحقك تكوني في الدار
روان : ماما فهميني وش كاين تبان الحكاية سيريو
سعاد (تثاوب) : غدوة ..غدوة تفهمي
خلاتني حايرة وبت نخمم يادرى غدوة وش يصرا
أنت تقرأ
إنتقام القدر
أدب الهواةكرونيك جزائري من تأليفي يحكي قصة طفلة حبت صديق الطفولة نتاعها بصح هو ماكانش مهتم بيها و تدخل في حياتو طفلة واحد اخرى و يولي مهبول بيها و هي تحاول دير مشاكل وشنو هي هاذ المشاكل ؟و كيفاه تطور هاذ العلاقة ؟ وين توصل ؟ راح تعرفو هذا و كثر مع الأح...
