الحلقة 14:
عيطت لفهد باه نتفاهمو و هو ماطولش وجاني خرجت من لافاك بعد السلام
روان : خممت البارح في واش قتلي و قبل مانقولك قراري حابة نهدر معاك في حاجة سع
فهد : إييه ماعليه ...نحكيو هكا على الواقف هيا نروحو لكاش بلاصة
روان : لالا اني مرتاحة هكا
فهد : ماتخافييش ..شوفي موراك ...نروحو لهاذيك لكافيتيريا راهي قريبة للجامعة
روان سكتت شوي و مبعد : إييه هيا
دخلنا و حكمنا بلاصة دوموندا جيو دو غونج و قال
فهد : أهييه وش حابة تقولي
روان : شوف من الخر إذا كتب المكتوب بيناتنا و تزوجنا راح نقوم بواجبي و نحتارمك و ندير لي عليا بصح مانكذبش عليك ماني حاسة والو من جيهتك و مانقدر نوعدك بوالو
بقى زمان و هو ساكت و في هاذ الوقت جاب الغارسون الجيو حطو و راح و مازال يشوف فيا و مبعد كسر هاذ السكات
فهد : هاذي خدمتي ... بشوي راح توالفيني و تحبيني كيما نحبك أنا مادام قلتي راح تحتارميني هاذا يكفيني
مابقالي مانقول حشمني راح نكون غبية إذا قلت لالا تكلت على ربي و قلت
روان : إييه خلاص على بركة الله ..
فهد يبتاسم : يعني نجي نخطب رسمي راكي موافقة
روان : راني موافقة
قسرنا مليح في بزاف حوايج و مبعد تفكرت بلي راني روتار على المحاضرة نضت بزربة وقتلو مبعد نحكيو و رحت
و مزيا كان البروف مداير روتار ... كي دخلت لقيت نورهان تشاورلي باه نقعد معاها و طبعا غير قعدت بدات تقرعج حكيتلها فرحت بزاف و قاتلي "قتلك فيها خير" فات باقي النهار عادي و في الليل زدنا تفاهمنا وقتاش يجي يخطب و حوايج كيما هك ....
بعد يامات خطبني و فات النهار مع حكايات الشرط و المهر و هاذ العفايس ... وبما أنو كنا متفاهمين ما صراوش مشاكل و في هاذ الفترة كانت سليمة و مام سهام معاونينا بزاف يكثر خيرهم بصح أنا كنت نتفادى نروح لدارهم لأقصى درجة باه مانحصلش مع مايا لأنو كانت عايشة معاهم بصح فيها فيها تصادم
مرة سلفنا من طاطا سليمة بلاطوات على جال القاتو و كان لازم نجعهم كي خلصنا و أنا قدام الباب راح نصوني كان أمجد طالع
أمجد : إيي شكون شفت ...غاب حسك من نهار تخطبت ماعدتيش تباني
روان : إيه مانقعدش
أمجد : ملييح ... مانعرف كيفاه دبرتي واحد و هاذ الواحد صاحبي الأنتيم إذا راكي تمكري فيا راكي غالطة أنا عايش حياتي ... راكي غير تضلمي في السيد
روان : ههه ... وش بيك ماديها في روحك أنا فت حكايتك هاذاك العام
أمجد : شوفي راكي تغلطي و راح تندمي ...فهد عايش في الخارج و البنات لهيك الوحدة تنسيك في ختها ماشافش وحدة مختلفة ... يعني نتي راكي نزوة برك كي يفيق مع روحو راح تكوني الخاسرة الوحيدة سلكي روحك مادام مازال الحال
روان : مام أنا قتلك نفس الهدرة و ماسمعتنيش .... على كل حال مانيش حابة نكثر هدرة معاك ...شد هاذو دخلهم لداركم (و عطيتلو السنيوات)
أنت تقرأ
إنتقام القدر
Fanfictionكرونيك جزائري من تأليفي يحكي قصة طفلة حبت صديق الطفولة نتاعها بصح هو ماكانش مهتم بيها و تدخل في حياتو طفلة واحد اخرى و يولي مهبول بيها و هي تحاول دير مشاكل وشنو هي هاذ المشاكل ؟و كيفاه تطور هاذ العلاقة ؟ وين توصل ؟ راح تعرفو هذا و كثر مع الأح...
