الحلقة 15:
دخلت للدار و هدرتو دور في بالي ... بصح كي خممت مليح لقيت بلي ماكانش وجه شبه خلاص بين فهد و أمجد و ماخليتش روحي نتوسوس
فاتو التجهزات و فات العرس هايل ماغري ماعندي حاجة في هاذ الزواج بصح الناس الفرحانة و الزهو خلاني مام أنا فرحانة و بعد العرس حكمنا طيارة ديراكت للندن
نص الطريق و حنا ساكتين و هو يحول يكسر هاذ السكات و أنا مالقيتش وش نقول ... المهم وصلنا مع الصباح طبعا مارحناش للأوتيل باسكو عندنا دار وحدنا حطينا الفاليزات و خرجنا نتغداو برا و درنا و حوسنا جاز نهار شباب يعني و تنحالي شوي ستراس
في الليل دوشت و وجدت روحي و بقيت نسنا في البيت و كي دخل فهد تخطفت و هو ضحك كي شافني تخطفت قالي " ماتخافيش مانيش راح ناكلك " هبطت راسي و حشمت هو قعد قدامي و بقى يقسر معايا و مبعد شعل موسيقى رومانس و نوضني نشطح معاه هههه و أنا مانعرفش نشطح واحد تبهديلة و فاتت ليلة شابة ماكنتش مدايرة حسابها راح تكون هك و حسيت بانسجام معاه يعني كنا متفاهمين
صح باقي الأيام كانت عادية كان يتغزل بيا و أنا ماكنتش ندجاوب معاه حاولت بصح ماقدرتش نحي هاذ البرود و هو كان مطول بالو و صابر عليا
فات شهر على زواجنا الأمور عادية ماكانش ح كبير بيناتنا كيما ماكانش مشاكل بيناتنا .. و أنا كنت حابة نولي نكمل قرايتي أصلا مايقاش بزاف فــ...
روان : أني وجدت القهوة أرواح تفطر
فهد : أوكي ...أرواحي أربطيلي الكرافات
رحت نربطهالو حكمني من خصري و قالي
فهد : مرتي العزيزة راهي غير تزيان
طلعت راسي (هو طويل عليا ) تبسمت و قلتلو : القهوة بردت أزرب أهبط ( و هربت إن صح التعبير )
هبطت قعدت في بلاستي نشرب حليبي بين ما هبط مورايا و قعد قدامي
فهد : اليوم عندي إجتماعات بزاف قادر نطول ماتسناينيش أتعشاي قبلي
روان : ماعليه ماكانش مشكل ..... أ .أ كنت حابة نشاورك في حاجة
فهد : غير الخير ...وش كاين
روان : لالا خير ... كنت حابة برك نولي نقرا أصلا مابقاليش بزاف قراية
فهد شرب رشفة من القهوة و حط الفنجان و شاف فيا و قال : هاذا ماكان كي يبداو التسجيلات أني نسجلك
روان : مارسيي ...تعيش ربي يخليك
فهد : ههه وشنو مارسي هاذي أني راجلك ماتنسايش
روان : لالا مانسيتش ... بصح أنا مانعرفش البلايص هنا مليح كيفاه ندير ؟
فهد : أمم ماتخميش كي ينقص شوي الضغط نتاع الشغل نديك نعتلك و نعلمك الطرقات هنايا حتان توالفي ... إييه و لازملك بارمي ذرك هاذي اليامات نسجلك
روان : أأ لالا ماعندي ماندير بيه هاك ديما توصلني وين نحب
فهد: لالا لازم البلاد كبيرة و نتي جديدة فيها لازمك طوموبيل
روان : إذا شايف هك ماعليه
فهد (ناض و سلملي على جبهتي ) : أنا ذرك نروح خدمة كبيرة تسنا فيا
روان : ربي يسهلك
أنت تقرأ
إنتقام القدر
Fanfictionكرونيك جزائري من تأليفي يحكي قصة طفلة حبت صديق الطفولة نتاعها بصح هو ماكانش مهتم بيها و تدخل في حياتو طفلة واحد اخرى و يولي مهبول بيها و هي تحاول دير مشاكل وشنو هي هاذ المشاكل ؟و كيفاه تطور هاذ العلاقة ؟ وين توصل ؟ راح تعرفو هذا و كثر مع الأح...
