الحلقة 8:
روحت للدار بعد هاذ اليوم الطويل كنت تعبانة فيزيكمون و مورالمون كي العادة عاونت ماما في الشغل شوي (العشا و الماعن ..) و مبعد رحت لبيتي نخدم البروجي نتاعي و كنت حالة الفيس يعني أنا ديما نخليه محلول كي نكون في الدار بلا مانخدم بيه ... حتان وصلني ميساج من تايغر قوتلو سمحلي راني نخدم في البروجي كي نكمل نحكي معاك وكي كملت كنت عيانة بزاف رقدت ونسيتو
الغدوة رحت لل لافاك و كي وصلت لقيت البروف ماكانش حكمت بلاصتي و قعدت و مبعد جات نورهان سلمنا على بغضانا قسرنا شوي و مبعد جاو لي يقراو معانا ولاد و بنات أنا ماكنتش مداسرتهم كنت غير نسمع بصح نورهان انسجمت بزاف معاهم ونساتني وليت حليت الفيس لقيت تايغر باعث ميساج "وين رحتي ...هربتيلي "
جاوبتو " ههه نن والله ديزولي غلبت رقدت بلا مافقت " وقعدت نطلع نهبط زماان و معد جاوبني "اييه ماعليه تعوضيني اليوم " قوتلو " ههه اوكيي " وبقينا نهدرو هكا و كان جونتي بزاف معايا و يضحكني تاع الصح نحا عليا القنطة لي كنت شادتها هاذ اليومين و فجأة قاطعتني نورهان
نورهان : تبالي البروف ماكانش هيا نضربو دورا
روان : ايه هيااا
نورهان (بعد ماخرجنا ) : أهييه يا الفحلة خرجي وش عندك (مع واحد الشوفة تاع مكر)
روان : ههه وش نخرج ماكان والو
نورهان : شوفي روان ماتلعبيهاش بهلولة عليا...كي كنت نقسر معاهم تبالك ماتولهتلكش ؟؟ او راني حبيبتك و نعرفك ملييح تخبي عليا ؟؟
روان : ههه نخبي علييك ؟ لالا حاشة الحكاية و مافيها هاذا آمي في الفيسبوك مانعرفوش بعثلي أكسبتيت حكينا شوي هذا ماكان
نورهان : ههه و الإبتسامة العريضة هذيك علاااه؟
روان : السيد يضحك ...حرام نضحك؟؟
نورهان : ههه نن أضحكي صحتك .... مالا نفهم بلي عقليتو عاجباتك
روان : اييه ...مليحة ...لاباس بيها
نورهان : شتي كيفاه ربي عوضك قتلك ربي يحلك الخير
روان : اووه نورهان مايروحش بالك لبعيد أنا حاطاتو صديق برك و هو عايش في الخارج باينة شابع بنات ..
نورهان : و كيعاد عاش في الخارج زعما لي راهم هنا وش مدايرين ...ماتدري وينو ماكتوبك
روان : خلاص خلينا من هاذ الهدرة
بدلنا السوجي و كمل النهار عادي
أنت تقرأ
إنتقام القدر
Fanfictionكرونيك جزائري من تأليفي يحكي قصة طفلة حبت صديق الطفولة نتاعها بصح هو ماكانش مهتم بيها و تدخل في حياتو طفلة واحد اخرى و يولي مهبول بيها و هي تحاول دير مشاكل وشنو هي هاذ المشاكل ؟و كيفاه تطور هاذ العلاقة ؟ وين توصل ؟ راح تعرفو هذا و كثر مع الأح...
