البـارت #الثـامن
.
.
.
روايـة #حـكايـتي🍁
.
.
.
عمي..يابنتي هدا حوشكم التاني ومش ضروري تجي في المناسبات بس ره في كل وقت حوشنا مفتوح
اني..صحيت يا عمي
عمي..حق الي سمعته من عمامك يابنتي!!!
اني نزلت الكاشيك وشفتله..شن سمعت😳
الكل كان منتبه معانا وياكل 😂
عمي..انك بتلزيهم من العمارة
اني..استغفر الله العظيم نبقا مش بنت اصل لو درتها
عمي..كيف به عمامك يكدبو!!!
سوسن..عمامها كانو بيلزوها
عمي نصدم
اني فنصت..سوسسسن
عمي..كييف
اني..لالا مش هكي
سوسن..مادافعيش عليهم وهما كانو بيرموك في الشارع لولا جدك كان ذكي واستعمل ذكائه راه كنتي توا برا
اني..حتى لو رموني برا عندي حوشي الي املكهولي بوي
حذيفة فنص في سوسن
عمي..احكيلي كل شي من البداية وخليني اني نتصرف
اني..ياعمي جوني اولامس قالولي بنبيعو الحوش اني قتلهم هدا الحوش ماينباعش (وحكيتله كل شي )
عمي..يعني هما كذبو عليا
اني..ايه
عمي حب يجربني..تعرفي ليك الحق انك اطلعيهم وتعيشي منه اتأجريه وتعيشي انتِ في حوشك
اني..قتلك نبقا مش بنت اصل لو درتها مش اني الي نطلع عمامي مهما كان هدم عمامي ومجبورة نحترمهم لعند اليوم ماقلتلهم اطلعو شي واحد قلته بس لانة كانو يضايقو فيا قتلهم كل واحد في حاله ولا اني نضايقكم ولا انتم تضايقوني هوا هدا
عمي..عندك حق وفعلا رباك بوك الله يرحم الي رباك ووراك وكبرك وعلمك
اني..امين الحمد لله سفرة دايمة
نضنا ضمينا الماعين وشوية وجو امالي محمد
اني..اهلا وسهلا تفضلو😊
دخلتهم للصالة وجت خويلة بدرية سلمت عليهم وقعمزت معاهم كانو امه وعمته وحناه
شوية وجت سوسن بالقهوة واني وراها بالحلويات
بدرية..هدي سوسن😊
سلمت عليهم سوسن وعطتهم القهوة واني كملت الحلويات
عمته..هدي اختها!
بدرية..لالا بنت عم راجلي بس يعتبرو زي الخوات وصحاب😊
عمته..قعمزي حتى انتِ😍
اني قعمزت بحدا سوسن
قصقصو ع كل شي كأنهم مايعرفوهاش هدي تعليمات محمد باش توصله سوسن سليمة بدون مشاكل😂
بدرية..ان شاءالله الشور توا عليها وعلى بوها ويصير خير
امه..بإذن الله
عمته..فاش تقري يانور
اني..طب بشري
عمته..مشاءالله تبارك الرحمن وماشية فيه كويس اوو
اني..ايه الحمدلله هدي رغبتي
عمته..ايه مشاءالله كم مواليدك
اني..96
عمته..باهي تقبلي لو جاك نصيب😊
اني تحشمت..الحق حالياً لا😊لين نكمل قرايتي مش مفكرة في الزواج بكل
عمته..باه حتى خطوبة
اني..لا الحق
عمته..والله عندي وليدي وندورله وعجبتيني غر زيدي فكري
اني درهت كبدي وسايرتها..ان شاءالله خير😊
نضنا اني وسوسن
سوسن ميتة عليا بالضحك ع الحصلة الي حصلتها
سوسن..حييييي تبدي مرت ولد عمت راجلي
اني..غر يولد ويسموه لالا مانبيش
سوسن..ايش بيه طرف مطرف زي جمالك
اني..وانتِ كيف تعرفيه
سوسن فتحت نت وخشت ع صفحة محمد ودورت في صور لقاته وطلعتهولي
سوسن..هوا راس ولد عند امه وعنده خوت وخوات لكن من بوه
اني..تبصري هدا هوا😳
سوسن..ايييه
اني نصدمتها صدمة مش طبيعية هوااا هوا المجهووول
اني..شن اسمممه
سوسن..اسمه طارق
اني..تذكري لما نقولك في واحد مسمياته المجهول
سوسن..ايه
اني..هوا هدا وحق ربي الا هواااا
سوسن..بري بري
اني..والله العظيم الا هوووا
سوسن..حييي معناها فرصة وجت بين يديك واافقي😍
اني اول ماقتلي وافقي ع طول جي في بالي حذيفة🖤 باه خيره حتى طارق كوييس باين انه يحبني باه وحذيفة ياربي حي معش عرفت هدا والا هدا ياربي اني😭عليك حياة ملخبطة
سوسن..خيرك سرحتي
اني..لا شي مانقدرش اني نبي نكمل قراية ونبي نكمل حياتي مستقلة شوية مانبيش نتزوج توا نندفن من توا سنة ويقولي لا بطلي معاش يمشي معاي هكي
سوسن..ايه صح مشوارك هلبا طويل خلي بالك في قرايتك بس ننصحك معاش ترفضي هلبا مش باهي
اني..خير يارب
سوسن..هو يخدم في كليتك والا
اني..من اتحاد الطلبة هوا
سوسن..حي حي والله فرصتك ياغبية معاد تتعوض وماعنده علاش بيقولك لا
اني..مش عارفة
روحو امالي محمد طلعنا احني قعمزنا مع بدرية
بدرية شبحت لبنتها وغمزتلها..سوسن😉
سوسن..ءء ننعم
بدرية..ماخشتش راسي موضوع ان شافك وعجبتيه وجابهم وجو هدا مش عارفة علاش رغم ان الموضوع عادي بس اني شاكة
اني..خيرك ياخويلة في شنو شاكة
بدرية..شاكة انها تبيه ويبيها
سوسن..ايه
بدرية..ماهو قتلك اني
سوسن..بس اهو جي وخطبني خلاص خلي الموضوع يمشي على خير يمي ارجوووك تعرفي بابا انتِ
اني..خيره بوك حسيته مش زي ماتقولي
بدرية..مايغركش المظهر😂
اني..به كيف يصير ياخويلة بتقولي لي عمي!
بدرية..حشاني علاش بنخرب ع بنيتي
سوسن فرحت..😍😍
بدرية..وخاصة انهم عيلة ونصيب مشاءالله
سوسن زادت الفرحة
اني..ربي يباركلهم يارب ويهنيهم مع بعض
بدرية..ايه
ع خشة عمي والاولاد
عمي..شن صار يا بدرية في الموضوع الي جي اليوم
بدرية..الحمد لله مشي ع خير والحق عجبوني اني وانت شوف شغلك
عمي..وانتِ يا سوسن
سوسن..متحشمة الي بديره ماشي يابابا
عمي..لا الا الحاجة هدي خليك تلاتة ايام فكري فيهم ع مهلك والي بتقوليه ماشي وخوتك تو يسئلو عليه الشاب
سوسن..به
حذيفة..شن اسمه وعيلة مني ومنين يعرفوها
اني نصدمت شن الاسئلة هدي
بدرية..قالت امه اسمه محمد الـ...
حذيفة..امممم تو نشوف اي منين يعرفوها
بدرية..شافوها في عرس احمد
حذيفة..اه
اني في خاطري وانت مالك ومالها منين عرفوها قلبت عيوني عليه وقعدت نهدرز مع عمي
بدرية ابتسمت..هوا في وحدة تانية نخطبت
عمي شاف لبدرية..منو
اني تحشششمت ووجهي والا سخوون واحمررر
بدرية..نور خطبتها عمت الولد
حذيفة شافلي ع طول
عمي تلفتلي..مشاءالله اصلا نور زي بنيتي والي بيطلبها يجي يطلبها مني اني
حذيفة تعفلق وقعد يسحن
اني تحشمت
بدرية..لكن هيا قالت لا وقرايتي
عمي..لو النصيب مايتعوضش يابنتي علاش لا تقدري تكملي عنده
اني..حنصلي الاستخارة ويصير خير ان شااءالله
عمي..ايه يصير خير
ويهدرزو وحذيفة يهز في رجله ومقعمز بالسيف
بدرية..تي ياسر ياولد وترتتتني
حذيفة ناض وركب لداره وصلفق الباب
بدرية..العفو خيره
خوه..ولعت فيه نار الغيرة وغمزلها
اني مافهمتش وماركزتش هلبا قعدت نهدرز مع سوسن ونضنا خشينا للدار
حسيت المغرب قريب يأذن نضت لبست وخديت مفاتيحي ونزلت
اني..هي بالسلامة خويلة
بدرية..خيرك اقعدي
اني..لا والله خلاص مغرب
بدرية..ايه صح باه اقعدي عندنا
سوسن..ايييه اقعدي
اني..لا والله غدوا جامعة ومش جايبة شي معاي مرة تانية
سوسن..باهي مرة تانية مادخليش
اني..حاضر
عمي..اهو نوصلك اني وراك يابنتي
حذيفة وهو نازل من دروج..خليك بوي اصلا طالع اني
اني وووه يارزيني فيك
طلعت للسيارة وركب هو سيارته ومباش يشبحلي حتى الشبح
اني..خيره هدا يطنفر😏
ركبت سيارتي وطلعت للحوش مشينا لعند وصلت حوشنا ماريتش سيارة احمد فرحت درست ونزلت وبيبلي حذيفة ومشي واني خشيت للحوش
فتحت الباب وخشيت غيرت واتكيت
فتحت الفيس وقعدت نفسفس لعند خداني النوم
ام احمد..تي هيا خيرك خايف يادرويش نفتكو منها هيا والورق😌 الي شاداته علينا ونبدو فلوس ونبيعو وناخد بالاس يحل العين المغمضة😃
عمي انغر بكلامها وطمع ومافكرش للقدام
اني نضت بنشرب اميا
شربت ووليت درت عليا المي صليت العشي وقعمزت شديت الصندوق الي مخليهولي جدي ونقرا في الرسالة ونبكي علاش خليتني حتى انت ياجدي علااش
حضنت الصندوق وقعدت نبكي شميت ريحة حاجة محروقة خديت صندوق في يدي ومشيت نشوف في الدخان يخش للحوش بنفتح الباب مباش ينفتح
اني..ياربببي بنموووت😳كيف بنططلع جيت من باب المطبخ لقيته حتى هو والعة النار وطاح الباب اني بعدت طول وبدت النار تاكل خشيت لداري طول فتحت فوني ونتصل بأحمد بس مايردددش
اني..هيااا احمممد مش وقت زعلللك😭ياناااااااااااااس سااااااعدوووني 😭😭اااااااه ياماما ويييينك بسسس😭😭😭😭😭
قعدت نكح ومش قادرة نتنفس زين
خشيت ع رقم سوسن واتصلت بيها
سوسن..ها ياحب
اني..سسسوسسسن ساااااعدووووني كح كح 😭
سوسن..شنننن في خييييرك
اني..نااااار في حوشنا ناااار تعالوووولي
وقعدت نكح نكح من الدخان
وشادة صندوق في يدي وتلفوني ونبكي ونعيط
وماعرفتش شن نديرر
اني..ياناااااااس حراااام عليييكم سااااعدووووني 😭😭😭ااااااااه بنموووت
نزلو عمامي بعد سمعو عياطي وشمو ريحة الدخان
لقو دنيا نار
عمي..البنت
بو احمد..مانقدروش نخشولها😡من بيخاطر بحياااته نسيت شن دارت فينا
عمي2..تي هدي بنت خوك وامانة عندنا
حاول عمي يخش بس ماقدرش وبحكم كبر سنه الدخان ماقدرش يقاومه وخر
عمامي..لاحول ولا قوة الا بالله مافيش كيف نخشولها وقعدو يحاولو يطفو النار من برا بس اكتر ماتزيد وصل حذيفة بأسرع وقت قبل بوه وخوته
وخش يجري
حذيفة..نوور
بو احمد تعفلق..ماقدرناش نخشووو😠وانت شن جابك
وخشو عمي الهادي واولاده
عمي..البنت وييين
بو احمد..داخل دخان هلبا فيش كيف نخشو
حذيفة خدي سطل اميا بزعه عليه وخش
فادي خوه خدي سطل تاني وبزعه وخش معاه
والتالت زين ماقدرش لانة صدره مايتحملش بكل
حذيفة يكح..نوووور نووووور
اني مغمى عليا في داري
حذيفة..يانوووور
خوه..اهيااااا
قعدو يفيقو فيا
اني فقت شوية..الصندوووق وقعدت نكح
خدي خو حذيفة الصندوق وطلعني حذيفة في غمره
بو احمد..😠😠😠
حذيفة رفعني للسيارة هوا وبوه ومشو بيا للمستشفى طول وعمامي في الي لحقني وفي الي قعد
فادي كان صندوق في يده ومش فاهم شن فيه
بو احمد..هاته هدا متع نور تو ندسهولها
فادي..لا حيقعد عندي😐 .. ايوا سوسن
سوسن..قولي ياوخيي كيف حالها شن صااار😭😭
فادي وهو راكب السيارة..لالا توا كيف رفعوها المستشفى اني اهو لاحقهم نشوف كيف حالها ونقولك هي تشاو
حط الصندوق في القجر ومشي طول لي المستشفى
خششوني واني مش حاسة بشي🖤
دخلوني للإسعافات ركبولي الاكسجين والمهم دارو شغلهم
حذيفة ماشي جاي ومش قادر يقعمز لحظة العمام الي هدا خايف وشن بيقول لو صارلها شي وكل واحد يفكر في حاجة
ع خشة احمد يجري ويدور..وينهااا وينهااا
فادي..داخل معاها الدكاترة مزال ماطلعع حد منهم
احمد..يارب خير يااارب اتصلت بيا💔ومارديييتش عليها
حذيفة كان بيتكلم بعدين سكت ومايبيش يدير مشاكل كان سامع المشكلة لما دويت لي سوسن
احمد..ياربي كون معانا
حذيفة شاف لفادي..خيره يتنوحلي زي البنت
فادي..ضم فمك وفكنا منك تحسابة الكل زيك قلبه ميت مايحسش وماتنزله دمعة😒 هدي اخته
حذيفة..😏برا ارقد والنبي
شوية وطلع الدكتور طمنهم عليا وكان حالي كويس والليلة بيخلوني تحت الملاحظة
خشولي عمامي في الاول
اني شفتلهم..منين جتكم🙄
عمي..خفنا عليك ماتقوليش هكي عاد
اني..خفتو الناس تلومكم لانكم ماصنتوش الامانة ولانكم تخلو في بنت بروحها تبات وكل واحد منخمد جنب مرته🙄اني مش لايمة عليكم
عمي..عيب عليك يابنتي والله نخافو عليك
اني..مانحبش المجاملات ومانحبش النفاااق والكذب لو تحبوني وتخافو عليا راه هدا كله مصارش وتوا دايرين روحكم واقفين جنبي وتحبوني اما حب هدا نسيتو يوم الي كنتو بتلزوني فيه لولا الي عندي
عمي..وتو كله نحرق ماعندك شي
اني رنيت ع جرس
جتني الممرضة..نعم شن في
اني نبكي..طلعيهم لوسمحتتتي طلعيييهم مانبييييش نشوووفهم😭😭انتم مششش بشششر
الممرضة..لوسمحتوو اطلعو برااا
طلعو عمامي متعفلقين والي هدا روح لحوشه
خشلي عمي عبد الهادي
اني نبكي
عبد الهادي..علاش اديري في روحك هكي يابنتي حرام عليك
اني شفتله ونبكي قعمزت وحضنته وقعدت نبكي وهو يمسح ع شعري
عبدالهادي..ابكي يابنتي ابكي وريحي روحك
اني..تعبت تعبت منها حياتي كل يوم بشي جديد كل يوم بمشكلة تعبوني بجدياات وتعبتكم معاي😭
عبدالهادي..ربي حيفرجها الله غالب وماتقوليش هكي مافيش حد تعب معاك يابنتي
اني..زهقت كبدي منهم وهما حيطلعو ورا الحريقة يبو بأي طريقة نختفي من الوجود وهما ياخدو المكان كله بيموتو ع الفلوس💔
عبد الهادي..علاش هما شن قالولك
اني..فرحو ان صارت حريقة يحسابو الورق نحرقو
عبد الهادي..وينهم هما
اني..اخر شي نذكره عطيته لفادي
عبدالهادي..معناها اكيد دسه كوني مطمنة اني معاك
اني..تعبت منهم ياعمي
عبدالهادي..خلاص ارتاحي توا والصباح رباح
ع خشة خالي خايف وراعش
صهيب ومخطوف لونه..كيف حالها توا!!!؟
احمد..الحمدلله كويسة هلبا وغدوا تطلع
صهيب..الحمدلله
فادي عطاه اميا
صهيب..صحيت
شرب الميا وقعمز من رعشة لين معاد قدر يوقف شوية وطلع عمي خلاني راقدة
احمد..كيف حالها
عبدالهادي..الحمدلله رقدت هي ياولاد
طلعو حذيفة و فادي وزين ورا بوهم
صهيب..بنخشلها نشوفها
احمد..خش اني بنقعد معاها مرافق
صهيب..باهي
خش خالي صهيب لقاني راقدة
مسح ع شعري ويتأمل فيا ودمعته ع خده
صهيب..كله مني اني خليتك ليهم المجرمين هدم حقك عليا💔من اليوم معاش ليك قعدة عندهم
باس ع راسي وطلع
صهيب..برا انت ارتاح تو نقعد معاها اني
احمد..لالا تو نقعد
صهيب..انت عندك من يراجي فيك في حوشك مرتك عيب تخليها بروحها والوقت متأخر روح والصبح تعالى
احمد تنهد..باهي تمام ماخشيتلهاش اني نخشلها ونطلع
صهيب..اوك
خشلي احمد
احمد باس ع راسي وخاناته دمعته ونزلت ع خدي..سامحيني كله مني اني مارديتش عليك كنت نحسابك تبي تتكلمي في نفس الموضوع حقك عليا ياوخيتي كله مني لاني مارديتش عليك💔
فقت اني..مسامحاتك بس معش تفكر فيا بالسوء
احمد..عمري مافكرت فيك بسوء بس لحظتها ماتحملتش انتِ اختي واني نخاف عليك من كلام الناس ومن اي حد يدوي عليك كلمة
اني..واني مسامحاتك
احمد..هي ارتاحي توا خالك بيقعد معاك اني قبل بنقعد اصر عليا نروح
اني..به برا لي منار قاعدة بروحها
احمد..اني مانشوفش فيها اصلا نرقد وناكل في المربوعة خاطي الحمام حشاك بس والباقي مانشوفش فيها بكل
اني..عطيها فرصة احمد
احمد..ماتستاهلش مش مهنية روحها
اني..ربي يهديكم
رقدت اني😴
واحمد قعمز جنبي وقعد يفكر في حياته وكيف بيصير فيها لعند خش صهيب وطلع احمد روح
نضت اني لقيت صهيب خالي حاط راسه ع السرير حطيت يدي ع شعره وقعدت انوض فيه
ناض صهيب مخلوع..ها شن في خيرك شن صار
اني..خيرك بشوية هههههه مافيا شي
صهيب..باه
خش صهيب للحمام غسل وجهه ودار عليه المي وصلى الصبح وجاني
اني..ساعدني بنخش الحمام
صهيب..حااضر
نضت وكنت مش قادرة نوقف زين تعبانة خشيت للحمام حشاكم
.
.
احمد..صباح الخير وينها
صهيب..كيف خشت الحمام
احمد..به
صهيب..اني وتيتلها كل شي في الحوش بنروح بيها
احمد..وين؟؟
صهيب..لحوشنا
احمد سكت وماعرفش شن يرد
طلعت اني ونكر في روحي كران
#يتبع
.
.
.
ان شاءالله تنال اعجابكم😍يا احلى فانز😘 #حنو
