البارت #الخامس_عشر
.
.
.
رواية #حكايتي🍁
.
.
.
خشيت لقيت احمد يلعب بليستيشن ضحكت عليه وخشيت للدار دخلت حجاتي وسكرتها بدلت وطلعت
احمد وهو يلعب..ترا قولي من كلمني
اني..منوو
احمد..😂منار
اني..واك شن تبي
احمد..اشبح مع من راقدة وتقولي ردني استر عليا طلعت حامل🙂
اني..لاااااع
احمد..واللهي جديات نحكي
اني..خيرها هدي
احمد..تبي تمسحها فيا زي مامسحت الاول
اني..خزززي عليهااا اللي ماتتحشم قليلة الحياة
احمد..ايه
اني..شن قتلها انت
احمد..هزبتها وماخليت حاجة في قلبي وسكرت وحطيتها في الحظر
اني..خززي مرض
احمد..ايه فكينا منها توا تلعبي!!
اني..لالا الحق في حجات نبي نقولهملك لاني مانقدرش ندرق عليك شي
احمد..هي
قعمزنا وقعدت نحكيله
احمد..واخيرا حسيتي على عمرك
اني..احمد انت خوي وبوي وامي واختي وصاحبتي الصراحة نبي نصارحك اني يا احمد نحبه ومحتارة بين ان نحبه وبين ان اني نسيبه احمد اني الفترات الي فاتو صح ضعفت شوية بس لاني خلاص مليت تعبت نبي نرتاح ونريح اعصابي نبي ناخد شوية راحة هكي قعدت نقول لكل شي باهي باش نفتك ونقعد بروحي ونستريح شوية ولما لقيت ان اني خلاص معاش نتحمل تفجرت فيه
احمد..شوفي هوا مش لدرجة تسيبيه حذيفة راجل كويس بس يبيله قرصة وذن اني مانسمحش انك تكوني لعبة بين ايديه يشكلها كيف مايبي باهي تاني شي يا نور اني محذرك من قبل وانتِ مشيتي بمسمى الحب وقضيتي ع روحك انتِ خليتيه بنفسك يتحكم فيك ويدير الحركات هدم وتوا خليه هكي ماتسيبيشي لكن نفس الوقت عاقبيه وخليه يشعف الراجل صح مرات يتعصب ويعلي صوته بس بعدين يولي وعادي لكن في حجات يكون معذور فيهم لكن في من حجات لا وهو مش ساهل عليه الي سمعه وبذات حذيفة حزاااااااااااار اني شوفي حزار وهكي لكن مش بدرجة الي فيها هوا شوفي اني خليته حتى يروح بيك يومها قلت لانكم متعاركين حتى تتصالحو وهو مش غريب اصلا وشكلي غلطت فيها ماعلينا توا خلاص الي صار صار لكن في جديد اعرفي كيف تتصرفي ومعاش تخلي حد يتحكم فيك وفي حياتك
اني..وهوا هدا الي بيصير😔
خشيت للدار قعدت متكية نستنى في اتصال ولا اتصل رقدت واني نستنى😴
وحذيفة رقد وهو يستنى😴
وجي الصبح يوم جديد وجو جديد🌞
نضت دوشت وبدلت وصليت وبعدين طلعت لقيت احمد راقد درت الفطور وفتحت الرواشن نهوي في الحوش
احمد..واااك سكرييي
اني..مانيش مسكرة نووض ياسرك ياخميرة
احمد..نجيك يافرخة
اني..برا امشي مش فاضيتلك خالاتي بيجو بعدين
احمد..علاش
اني..بعد غدوا فضانيتي شن علاش تعرف ياريت تتأجل
احمد..قبل نبي نطلعك اليوم..وفوتي ماتأجليش وتو يرضا وتتصالحو
اني..اني مانبيش نتصالح معاه ياريتك اتأجلها يا احمد
احمد..تأجيل لا يا نور نسيتي انك موتية كل شي بتخسري روحك توا !! خليها تمشي على خير وصدقيني حذيفة لما يعتذر منك😊
اني..به علاش بطلعني
احمد..تشري حجات كانا ناقصك
اني..لالا خالتي ايمان عطيتها الفلوس ومشت حجزت في اللازم تعرف انت قراية ومافضيتش بكل
احمد..وعلاش عاطية فلوس تكلمتي راه عطيتك
اني..عادي مرة تانية
احمد..به معاش تعطي اني الراجل اهني مش انتِ
اني..باااهي يا اخي
احمد..وتيلي حوايجي لبين مادوشت وطلعت
اني..وين بتمشي
احمد..شن تبيني نقعمز اهني🌚
اني..لا ماه صاحبتي سنابل جاية هيا واختها
احمد..باه شن دخلي
اني خيرني قعدت نهبك🌚..لا ماهو
احمد..قلنا سكريه الباب هوا والا
اني..اففف باااه
احمد..طيري
مشيت كملت باقي الي ندير فيه خش يدوش خشيت داره طلعتله حوايجه حددتهم وطلعت كملت الضمان
احمد..درتيلنا فطور
اني..يس هي تعالى
فطر احمد معاي وكمل وناض..تبي حاجة؟
اني..ايه نبي هدم جيبهم ضروري
احمد..باهي
مشي احمد واني درت نسكافي وشوية وجي احمد وجايبلي الي طلبته
احمد..وتيلي في الطاسة متعي لبين خشيت حمام (حشاكم) وجيت
اني..اوووك
وتيتله طاسته وطق الباب خليتها فوق طاولة وطلعت نفتح
وخشو سنابل ومسرة
اني..ياهلااا😍😍جيتو في وقتتتكم يسس
سنابل..خيرك😑
اني..😂😂نبي نرتب لعريس وعروسة شن خيرني
مسرة..اني فهمت
مسرة فهمت طول لأني حاكيتلها😂
سنابل..خلوني نخش وبعدين فهموني
خشت مسرة حطت حجات في مطبخ وشدت طاسة وبدت تشرب نسكافي وطلعت..الله يهبل لقيته فوق طاولة😍متعك وله
اني..حيييي
سنابل شرقت..خيييرك
اني..متع احمد هدي طاسته مايحبش من يشرب فيها
سنابل..اللطف شن فيا الجرب والا شنو😑عادي وهو وينه
وطلع احمد من حمام
احمد شاف سنابل وشاف طاسته في يد سنابل تعفلق وفنص
سنابل جاته طول..تفضل😅 ماشربتش😅
اني ياربي ياساتر استر
احمد..كملي عقابها وروحي بيها طاسة ماعندي شن بندير بيها بعد غطستي فيها😒
طلع احمد وسكر الباب
مسرة..بوووم بوووم
اني..طاااف في منتصف الجبهة
سنابل..ضمو افامكم😑
قعدت سنابل تكمل في نسكافيه وجوها عال العال
اني..😂😂ماريتش زيك يابنت
سنابل..اصلا نسخة وحدة
مسرة..نسختين🙂
سنابل..☺
اني..اي شن اخباركم
سنابل..مية مية
مسرة..هيا طلعي نبدو نديرو معاك لين يجو خالاتك
اني..اوك دقيقة
طلعت الباكوات وكل شي بنديروه قعمزنا في دار المعيشة وبدينا نديرو فيهم
سنابل..جعت
اني..اااه ظهري نقسم خيرهم عطلو 😑
مسرة..معقولة مرت عمك نشمو في بصلة من بكري ماتقولش تبعت حتى بالكدب
اني..لالالا مانبييش صحتين ع قلوبهم غير يخلوني في حالي بس
سنابل قامت كمامها..اني تو انوض انديرلكم بكبوكي تعبو بيها بطنكم
اني..اي حتى احمد قريب يجي يقول جيعان
سنابل..تو ندير اني
اني..لالا ضيفة واول مرة تجي خليك
سنابل شبحتلي وفنصت فيا..ضمي فمك وكملي شغلك😐
اني..ارقدي كنت مكبرة بيك مدابيا بري ديري هي
مسرة..خليها ادير مكرونتها تهبل
اني..هي بري
مشت سنابل طلعت الحجات وبدت اطيب
اني..خيرها سكتت معاش تكلمت البنت
مسرة..ديما هكي لما اطيب
اني..اطيبو ديما انتم
مسرة..وقت ماما تسافر احني الي نطيبو خواتنا متزوجات ووحدة تقرا تفوت فينا هديكا حتى نفص بالجبنة يشبعها والاولاد ضروري ماكلة ديما ينفخو الراس
اني..ايه كم خوت
مسرة..هداكا الي ريتيه معانا في طيارة وفي اكبر منه3 واحد متزوج مفتكيين منه و3 قاعدين ع قلوبنا😂
اني..خزي عليك😂ان شاءالله ياكل احمد بس
مسرة..علاش
اني..تعارك معاها بكري وتبيه ياكل منها
مسرة..تو ياكل ماتقوليلاش ان هيا
اني..ايه
طق الباب
اني..تو نجي اكيد خالاتي
فتحت الباب لقيتها مرت عمي
اني..؟؟
مرت عمي..نور بنتي سمعت من عمك ان فضانك الخميس
اني..باه؟المطلوب؟
مرت عمي..بلكي محتاجة حاجة عيب قدام ناس احني مانحضروش
اني..العيب في العيب
مرت عمي..شن قصدك؟
اني..قصدي ان مالقيتكمش وقت همي شن بندير بيكم وقت فرحي
مرت عمي..تلزي فيا
سنابل من باب المطبخ..كلامها واضح ماتلزش فيك يا اخت
مرت عمي..باهي يانور سيورك تقولي يا ندايمي
اني..اركبي لحوشك وقلت اني مانبي حد يكلمني ولا يجيني هدا اتفاقنا
مرت عمي..راكبة وحتشوفي
اني..ماتهدديش مش لصالحكم😉واللهي لولا صغار الي مقطعين كبدي راه طلعتكم لكن مش ع خاطركم ع خاطر صغار بسس
ركبت مرت عمي لحوشها وسكراته وقعمزت اني جنب مسرة ومضايقة
مسرة..ماتعدليش عليهم
اني..مانبيش نشوف حد منهم شوق مااقالو فيا ماقدرتش نسامحهم وندير روحي ولا شي
سنابل بي كاشيك اللوح..تسامحي عينككك لولا جدك راه طلعوك منه المكان الي انتِ فيه وتوا تبي تسامحي!حمارة كان سامحتي😒
اني..😂😂😂منظرك
مسرة..😂😂😂😂😂😂
سنابل..مبرد وجهكم
ولت سنابل تكمل تطييبها
وهي اطيب وترقص..اطب اطب ودلللع ليقول انا تغيرت عليييه
وينفتح باب المطبخ
احمد شافها انفلق بالضحك ع حركاتها
سنابل كانت عاطية بالظهر ومدايرة سماعات
قعد احمد واقف ويتفرج عليها
تلفتت سنابل وتلقا احمد قدامها
سنابل..اااااااا😲😳😱
وطلعت تجري عندنا
اني..خيرك تعيطي شننن في
سنابل..وووه علياااا ياحشمتي ياحشمممتي
اني..تي خيرها اختك
مسرة..مهبولة
احمد..نووور تعااالي
اني..😂😂فهمت توا
نضت مشيتله
لقيته مطفي ع طنجرة
اني..شن تبي
احمد..جاي بنتغدا قلت نخش من الباب هدا خير واذا بي الاخت الي هربت هدي ترقص وتغني واني مانندريش شافتني ناضت تعيط
اني..😂😂😂😂باه قعمز توو نحطلك تتغدا
صبيت المكرونة لي احمد ودرتله خيار وطماطم وصبيت لينا احني
اني..الله ريحتها تشهي
احمد..طلعت تعرف ادير فايدة
اني..كويسة البنت والله كان تفكر في الموضوع
احمد..ضمي واسكتي
اني..به ها
رفعت السفرة للبنات وقعمزنا نتغدو
سنابل..عليك عملة ياربي تسامحني يااارب
اني..😂😂عادي هو اصلا مادارش اهتمام ماعدلش فوتي
مسرة..ايه خلاص انسي وين تندري عليه انتِ
سنابل..اااخ ياربي لكن شن رايكم
اني..تهبلل سلم يدياتك
سنابل..صحتين
اني..خلي نكلم خالاتي وينهم
ايمان..ايوا
اني..تي وينكم يا خالتي قريب نكملو الحجات وانتم ماجيتوش
ايمان..بعتتلك مسج اني ماوصلش؟
اني..مسج شنو
ايمان..قتلك فيه ان احني في حوش جدك مانقدروش نجو
اني..اياح
ايمان..ايه تو نجو غدوا
اني تعفلقت..باهي ماشي
سكرت منها وقعدت نبكي
سنابل شافت لأختها وشافولي..خيركك؟
اني..مش حيجو😭من بيكون معاي اني رخوني في يوم زي هدا💔
سنابل جتني تغمرتني..خلاص اش معاش تبكي احني معاك
اني..هدم زعميتك خالاتي وبيكونو معاي
مسرة..خلاص فوتي ماتنكديش على روحك والله كله يتم ع خير
اني..ان شاءالله
سنابل..كملي ماكلتك
اني..لالا كملو انتم صحتين شبعت
سنابل..خلاص حتى احني شبعنا مسرة قيمي انتِ الماعين
اني..خليهم تو نقيمهم
مسرة..لالا خليك
قامت مسرة الماعين و اني وسنابل قعدنا
سنابل..اكيد صارلهم شي وماقدروش يجو ماتزعليش نفسك
اني..باه
احمد..نووور
اني..هيا جاية
مشيتله لي داره
اني..نعم
احمد..خيرك
اني..خيرني
احمد..خيره عيونك واضح كنتي تبكي
اني..شي غير اضايقت خالاتي مش جايين
احمد..تو يجو غدوا عادي
اني..يا احمد عندي ستين حاجة بنديرها
احمد..باهي والله كله يندار غير بشوية عليك
اني..باهي ان شاءالله
احمد..بري ومعاش نبيك تبكي
اني..حاضر
سنابل..نوووور تلفونك
اني..هيا هي
جيت نجري لقيته حذيفة ..فوتي
بدو البنات شادينها جرتي
اني..مافي شي بس ماخاطريش فيه
سنابل..تي غير قولي
اني..ياودي مافي شي قتلكم
مسرة..خلاص اسكتي سنابل
اني مسحت دموعي..خلاص فوتو
اتصل فوني من جديد وكان حذيفة سكرت عليه
سنابل قربتلي..شن قصتك يابنت علاش تسكري عليه
اني..قصة
سنابل ومسرة..احكي
حكيتلهم الي صار
سنابل..بس نحس فيه هوا مش قصده اني نعرف شخصيات زي حذيفة هكي غيور ويحب حب تملك حي مايقدرش يخليك لا تطلعي ولا تخشي يقعد خايف عليك من الطير الطاااير حب ممزوج مع غيرة مع عصبية حب مستحيل يكسرك بس يقويك والله نحسه ان قلبه طيب ويحبك
اني..لدرجة قررت نسيبه
سنابل..هدا عشقك وحبك ماتتخليش عليه نسيتي شن دار ع خاطرك !؟؟ نسيتي كلامه وحبه ليك الي واااضح من قلب قلبه يحاول يرضيك بكل الطرق نور اني مش جاية معاه وعندك حق تزعلي وترديش عليه وتضايقي وتكشخي وتعصبي بس ماتوصلش لدرجة انك تسيبيه
اني..توصل ياسنابل لما يهيني ويتعدا حدوده
سنابل..في الحب فس حدود الي هيا مايغلطش معاك وبس لكن في الحب هو يحبك وانتِ تحبيه تكونو شخص واحد يد وحدة تعصبي عليه ويتعصب عليك بس في نهاية تقدروش تبعدو ع بعض وتنسو بسهولة الي صار وتسامحو بعض
اني..مش عارفة ملخبطة الحق
مسرة..الصراحة معاك الحق يانور بس نفس الشي ماتقسيش عليه هلبا وعادي صارحيه وقوليله الي فس قلبك😌
اني..ان شاءالله خير
سنابل شافتله..ماتتخليش عن حبك☹👌🏻
اني شفتلها وقعدت نفكر
جي الليل وجاهم خوهم
اني..بتروحوو
سنابل..بعد غدوا عندك من صبح
مسرة وهي تتاوب..غدوا مدرسة واني خلاااص😴
سنابل..هيا مع سلامة
اني..سلامات😘
طلعو ركبو واني سكرت الباب
خشيت للمطبخ لقيته نظيف ابتسمت وطلعت لقيت احمد في دار راقد خشيت اني لداري واتكيت
رن فوني لقيته حذيفة تالت مرة يتصل ومانردش زاد في اتصالاته لأخر مرة رديت
اني..ايوا
حذيفة..وينك من بكري نتصل علاش ماترديش عليا هكي نهون عليك اني
اني..تهون وقت توصل فيا وتجرحني وتجرح كرامتي
حذيفة..لحظة غضب
اني..اوك لحظة غضب بس مش هكي عاد زودتها راك ياحذيفة شن تحسابني يعني لو يومها رضيتني بخاتم ورفعتني مطعم معناها خلاص لا راهو اني ماقدرتش نردها عليك لاننا كنا قدام صاحبك تحشمت نطيح من قدرك قدامه والمطعم ماقدرتش نردك لاني مانحبش نردك في شي ونعرف ان الردة حارة وصعبة واخييي وطاوعتك وعادي بس خلاص اني تعبت راهو
حذيفة تنهد..اوك اني اسف معاك الحق سامحيني
اني..اني لا نبيك تعتذر ولا شي بس نبيك تعرف كيف تتصرف معاي لاني مش اي شخص اني حبيبتك وحنكون خطيبتك وبعده حنكون مرتك يعني اني غيرهم كلهم يا حذيفة افهمني بالله عليك
حذيفة..باهي حاضر قتلك خلاص اسف ياروحي
اني سامحته من قلبي وطبعا ااصلا من اول مرة قالي اسف سامحته فيها بس قلت نشعفه..خلاص بنرقد اني هيا باي
حذيفة..خليك خيرنا عاد قتلك اسف تبيني نجي لحوشكم ونقولك اسف عادي ره نجيك توا ره
اني..حذيفة بلا هبال تعبانة ونبي نرقد يالله سلام
سكرت في وجهه واني نضحك وماكنتش مفكرة انه حيجي حق🤔
اتكيت ورقدت بعد ساعة ونسمع في المرش متع داري يطق فتحت لقيته رشاد
اني طبست لقيت حذيفة مداير ورد ع الستاك وشموع وكاتب بالورد نحبك اني ندوي بشوية..يامهبوول
حذيفة ابتسملي..اني مهبول بيك اسف اسف اسف اسف اسف اسسسسسسسسسسسسف
اني قعدت نضرب في خدودي..خلاااص اسكت مسامحاتك غير برا بالله عليك وووه عليا برا
حذيفة..هههههه من قلبك؟
اني..والله ممن قلبي بس معاش تعاودها😊
حذيفة..حاضر والله حاضر
طفا حذيفة الشموع والورد لمه وركب سيارته وكلكسلي ومشي
اني سكرت المرش..نحبه😢ياربي تحفظهولي😍
.
.
جي ثاني يوم وجو خالاتي وصغارهم وكملو الي خليناه اني والبنات وهدرزنا وضحكنا وباتو عندنا
جي تالت يوم يوم فضانيتنا😍
ناضو خالاتي الصبح درنا فطور
اني..صحة خالتي
خالتي..سلمك يابنتي
طلع احمد و قعد يكنس في جنان واني انظف في المربوعة ع خشة عمي الكبير
عمي..مبروك
اني تلفتت..الله يبارك فيك😌
عمي..نتمنى ان نحضرو اليوم
اني..بكيفكم اني وصيت احمد يقوللكم وانتم وجوكم
عمي..يعني انتِ تبينا
اني..انتم عمامي وماننكركمش وحتى قدام الناس يقولو اهو عندها اهل😏
عمي..احني اهلك وديما معاك
اني..لو سمحت ماديرش جو لسان اني مانبيش شي ولو انتم ماتبوش تحضرو هدا بكيفكم مش جابرتكم بس من باب الاحترام عطيتكم علم فقط ولو سمحت لا مرتك ولا التانيين يخشولي اني مانبي حد منهم هما ماجوش وماوقفوش معاي في المرة مانبيهمش في الحلوة والكلام الي يقولو فيه عليا يوصل فيا بس مدايرة ودن طرشة لاني مش عيلة زيهم وهي خليني نكمل ياعمي😒
طلع عمي وهو مهزوز ومأنبه ظميره
واني كملت تنظيف وطلعت خديت الوشق ودرته في المربوعة وخليته وخشيت
بدو خالاتي يطيبو ويديرو في الحجات واني وصغار نستفو في الصفر ونوتو باش مايجي الوقت لين يبدا كل شي واتي❤وشوية وخشو علينا البنات سنابل ومسرة
اني..هييي😍
مسرة..هيللللو😍
اني..جيتوو😍😍
سنابل..لالا قاعدين في طريق😂😂
اني..طيب فيكم😂😍هي خشو سلمو ع خالاتي
خشو البنات وسلمو عليهم وبدو يديرو معانا
وجي المغرب وبدو يجو وكمل العدد
وبدو يهدرزو ويتكلمو في الموضوع والمهم تم كل شي على خير😍💘والحمدلله روحو خالاتي بعد ماضمو كل شيي هما ومسرة وسنابل واني قعدت متكية في وسط الحوش شوية وخش احمد
احمد..اااه متهتك تعباااان
اني..احرف منك
احمد..ايه
اني نضت وجيت وراه قعدت ندلكله في رقبته وكتافه
احمد..تعرفي اليوم عمامي مستغرب فيهم منين جتهم الحنية هدي كلها والجو هوا كله
اني..ماه بنطلع وبنخلي الحوش
احمد..زعما😂
اني..تي ايه يقولولك خلاص نخلو روحنا عاديين باش تخلينا في الحوش وباش الحوش يوليلنا تي نعرفهم ونعرف خبثهمم
احمد..😂ان شاءالله خير والله
اني..ان شاءالله اني والله لو هما من الاول كانو معاي كويسين وطيبين لكنت خليتلهم كل شي بس هما كانو بيلزوني مرة وحدة😞
احمد..ايه
اني..احمد نبي نحكي معاك في موضوع
احمد..خليه غدوا الله يربحك بكري فتحو الف موضوع واني مركز في كل كلمة😂لانة اني الوكيل عليك
اني..باه خلاص ارتاح
احمد..هي تصبحي على خير
ناض احمد خش لداره غير حوايجه ورقد ع طول
واني خشيت اتكيت شوية واتصل بيا حذيفة
حذيفة..الف مبروك حبيبي
اني..الله يبارك فيك فرحاااانة هلباااااا😍
حذيفة..ههههه حتى اني ياغاليتي
اني..شن جو
حذيفة..مليحح
اني..دوووم ياربي❤
حذيفة..وانتِ معاي ياقلبي
نضت تاني يوم كان جمعة دوشت وصليت وقعدت ندعي ان ربي يكملي الي فيه الخير😌❣
نضت لقيت احمد راقد خشيت للمطبخ وتيت الفطور وكملت وخشيت بنوض احمد لقيته في الدوش طلعت فتحت الرواشن متع الحوش باش يتهوا وقعمزت ندير في ساندويتش ليا وبنحطه في التست شوية وجي احمد قعمز ..صباح الخير
اني..صباحو ورد
احمد..ديريلي زيك
اني..باش تحب تاكل هكي شن تغير🤔
احمد..قردة ديري زي ماقتلك بلا كثر دوة
اني..😑بااهي
درتله زيني وقعدنا ناكلو ع خشة عمي الكبير من باب المطبخ كنت فاتحاته ونفطرو
اسمه خالد
خالد..صحة صحة😊
اني أصبحنا وأصبح الملك لله..سلمك
احمد..تفضل عمي
خالد..لا مانبيش نزعجكم غير قلت نطل عليكم
اني ساكتة وناكل
خالد ويشبحلي..كيف حالكم اليوم
احمد..الحمد لله غير قعمز ياعمي افطر معانا
خالد..لا صحتين ياولدي فطرت
احمد..غير قعمز قعمز
جابله احمد كرسي وقعمز معانا
اني وفوق من نفسي..نديرلك حاجة؟
خالد..لا صحيتي
احمد..ديريله نفص ديري
خالد..ياولدي والله مانبي
احمد..لالا تبي
اني..خيرك متحشم ياعمي🙂
خالد..لاء اني مش متحشم تو كان نبي ناكل☺
اني ونشبحله..حسيت ان في شي تبي تقوله😞
خالد..هوا ايه في
احمد..شن في ان شاءالله خير
خالد..تبو الحق اني نادم ع كل شي درته معاكم ومعاك انتِ شخصيا
احمد..شن سبب توا شن الي تغير
خالد..هكي حسيت روحي ظلمتها ووالله مامرتاح في نومي ولا في ماكلتي ولا في تقعميزي هكي مش مرتاح بكل في حياتي
اني..طبيعي الشي هدا😏امالا بتقتلو القتيل وتمشو في جنازته تحسابوها ساهلة!!
خالد..شن قصدك؟؟!!
اني..واضح قصدي يوم الي الحوش نحرق ولا واحد فيكم اتجرأ يخشلي لو حد من صغاركم لكنتو داخل واطلعوو فيهم لكن هه حتى اني ع منو نلوم😏
خالد..يابنتي الي فات مات توا اني نقولك نادم والله نادم
اني..لو جيتني بعدها وطلبت مني نسامحك وتقولي نادم لكنت سامحتك ع طول بس جيتني بعد شنو بعد سنين تقولي نادم سامحيني بعد ما الجرح تسكر وبعد ما خلاص معاد لا نوثق فيكم ولا نقدر انأمنكم ع شي ليا نقولك شي يا عمي شوف انت عمي ع العين وع الراس وماننكركش بتجي اهلا وسهلا ماتبيش تجي عادي ره متعودين ع غيابك انت وغيرك يعني مش اول مرة نقعدو منغيركم هدي حاجة تاني حاجة لو خاش ع خبث انت وخوتك فككم الله شري لاني لما ننوي شي نديره نديره ولو خاش بي نية طيبة مش حنقدر نوثق فيك لا انت ولا خوتك لين تثبتولي انكم ع حق وهدا اخر كلام عندي🙂
نضت وخشيت لداري وقعدت نضم فيها بالغيض
احمد..سمعتها! اني مانقدرش ندير معاها شي وكله معاها الحق في كل شي
خالد..كيف تبوني نثبتلكم
احمد..هدي تعتمد ع شطارتك زي ما اثبتو انكم استغفرالله شن بنقول اني المهم هي زي ماقالتلك واني مادخليش هدا حقها وعندها الحق فيه
خالد ناض وزي الي مش عاجبه الكلام ..ماشي هي
احمد..بسلامة🙂
سكر وراه احمد الباب وسكر الرواشن وخشلي لقاني مقعمزة وفاتحة تلفوني
احمد..نخش
اني..ايه
خش احمد وقعمز جنبي..ماتعفلقيش روحك ع خاطره فوتيه
اني..والله كنت رايقة هكي مفهمتش علاش ضروري حاجة تفسدلي الجو كله
احمد..والله الا فاضية انتِ حتى درتيله قيمة وتغير جوك ع خاطره نوضي هيا البسي بنطلعو
اني..وين
احمد..وين ماتبي
اني..خلي بعد ماتصلي انت الجمعة
احمد..ايه نتغدو برا
اني..😍باه
احمد..ونشرو شوية حجات لتلبيستك
اني..😍بالحقااا
احمد..ايه هيا وتي روحك لبين مامشيت للجمعة وجيت
اني..باه😍
ناض احمد طلع للجامع واني طلعت درت المواعين وقمتهم ونظفت كل شي
وخشيت لبست وصليت وكملت لبس ودرت الوشاح وطلعت سكرت الحوش وكل شي وخديت المفاتيح سخنت السيارة وطلعتها برا الحوش وسكرته وقعدت نستنى في احمد وبعتت مسج لي حذيفة(اني طالعة مع احمد بنتغدو برا حبيبي نحبك وبعدها بنشرو حجات ليا تو نكلمك لما نروحو❤)ودرت ارسال ومشتله💌
وجي احمد ركب طول للسيارة..تلفوناتي
اني..اهما جبتهملك
احمد..شكلك ماخاطركش🤣😂
اني..ههههههه خلاص مليت عييت منه الحوش هوا نبي نطلع
احمد..ههههههه اهو طالعين هي
وطلعنا ومشينا تغدينا😍🍗🍕🍟🍔🍝🍦🍧
وكان جو يهبببل وبعدها طلعنا شريت حجات وحجزت في حجات اني نبيها وروحنا وهكي مشت الايام كل يوم نطلع ونشري لعند جي يوم التلبيسة كنا عازمين ناس و كنت مدايرتها في الحوش جبنا شركة تنسيق ديكور حفلات ونسقتلنا كل شي ودرت بياني
.
.
واني خاشة بالقفطان والناس كلها تشوفلي وبسمتي ع وجهي وفرحان نوعاً ما ان بتاخد الي نبيه ونص تاني مش فرحان وحزييين على امي الي مش حاضرة فرحتي وعلى بابا الي مفروض يكون هو الي عاطيني للناس هدم وهو فرحان ويوصي فيا خشيت واني نص دمعة بتنزل ونص فرحان قعمزت شوية وجو امالي حذيفة وجابو السوابيت طلعت اني وقدمو الحلويات والشاهي وكل شي ووليت طلعت بعد لبست قفطانهم وكان المرة هدي حذيفة خاش معاي يدي في يده وكنت كل مانتوتر نضغط ع يده ونشوفله واني فرحانة
حذيفة..نحبك يافرحة عمري😍
اني..نموت فيك
قعمزنا شوية
حذيفة..ربي يحفظك ليا ويتمملنا على خير يارب
اني..حذيفة اوعدني انك تكون معاي كول العمر ونكون اني زي ما اني ومايصيرش بيننا شي يغضبني
حذيفة..بإذن الله ماهو صاير كان الي تبيه ياروحي
اني..ربي يخليك ليا ياسندي التاني
باس ع راسي حذيفة ولبسنا لبعضنا الدبل وقصينا التورطة ووكلنا بعض والبنات يتصايحو😂
اني..من قال نور وحذيفة حذيفة ونور هههههه
حذيفة لفتني ليه وقعدنا نشبحو لبعض حط راسه ع راسي..انتِ ليا اني بس ومستحيل تكوني لغيري لو مهما طلبوك ناس انتِ تبقي ليا
اني شفتله..يطلـب الـفتـاة ألـف رجـل
حذيفة وعيونه في عيوني..ويأخذها حذيـفة😊
اني ذبت فيه وابتسمتله..ربي يحفظك ليا يارب
.
.
سنابل خشت للمطبخ بتشوف الشغالات وتكلم فيهم
ع خشة احمد من الباب الخلفي متع المطبخ
احمد قعد مستك ويشوف فيها كيف تتكلم وتعطي في تعليمات وبكل اعجاب يشوفلها ومبتسم
سنابل قامت عينها وتشوفه قدامها..هييي انت شن جاااابك ياهمي انت متعمد ادير الحركات هدي والا شنوو
وطلعت تجري من المطبخ واحمد ضحك وحط صندوق الميا وشاف للشغالة..خلاص ساد اعتقد؟
الشغالة..ايه تمام
طلع وهو سارح في جمال سنابل ويفكر فيها
.
.
عندي اني طلع حذيفة وقعدت مقعمزة جوني البنات نزلوني وقعدو يرقصو فيا معاهم نزلو نساوين عمي وتحملتهم بالسيف وكسرت الشر باش يومي يكمل ع خير وتم اليوم على خير😌
.
وفاتو ايام وليالي وبدو امتحاناتي وبدت معاناتي كنت فترة الي فاتت لاهية ومافضيتش بكل نقرا وجاني كل شي صعب وحذيفة واحمد معاي لحظة بلحظة ع هداية وع شكاليط😍
اني..احممد علاش جايب عارف عندي
احمد..عادي دسيهم
اني..باه اسمع
احمد..نعمم
اني..نبي حاجة حارة عييت من الحلوو
احمد..باهي تو لما نروح نجيبلك
اني..سلمه وخيي ياربي😍
طلع احمد واني قعمزت نقرا ونقرا لين كبدي طابت اتصل بيا حذيفة
اني..ايوا حبيبي
حذيفة..عيون حبيبك
اني..ستاحشتك😍
حذيفة..حتى اني ياروحي شن جوك
اني..اهو حال القراية😓
حذيفة..ربي يعاونك ياااارب
اني..ادعيلي بالله عليك
حذيفة..حاضر اني توا كيف بنخش الجامع نوضي صلي حتى انتِ
اني..اوك❤
سكرت منه ونضت ع طول صليت ووليت نكمل
اني..ااه ياربي مشيها ع خير هالامتحانات
وبعد فترة تميت وارتحت اخر يوم كنت مرهقة نبي نرقد بس روحت طول خشيت فراشي وسكرت تلفوني ورقدت😴احلا شعور
نضت العشية ولعت سيارتي ومشيت لحوشنا خشيت نضفته وكملته واتكيت في داري الله قداش ليا عليها
رقدت من تعب وحلمت بماما وبابا الي قداااش ليا ماحلمتش بيهم
اني..ماما اني كملت
ماما..اهلا اهلا ببنيتي هي بري خشي ارتاحي واني خلي نوتي الغدي نص ساعة وانوضك يادكتورتي😍
اني..باهي حاضر اموووااه نحبك اني ياماما
واني راكبة دروج بابا روح؟
ماما..ايه هونا في داره
اني طقيت ع الباب ..بابااا
بابا..خشي بنتي
اني..نعيماً
بابا..الله ينعم عليك كملتي اليوم عاد
اني..يس يادكتور😍😘
بابا..يادكتورتي انتِ شن جاوبتي مليح؟
اني..ايه الحمدلله
بابا..باهي كويس
خشيت داري وتلوحت رقدت
شوية وجتني ماما
ماما..نوور بنتي نووور نوور نوضي نوورر حبيبتي هي نوضي وقت
نضت فقت طول نحسابة ماما تنوض فيا حق
اني بخيبة امل..ااااه طلع حلم😔ياااربي تعبت اني ان ندرق ع ناس وفي قلبي مية حاجة نبيها ماما ونبيه بابا تعبااااااانة🤕
نضت واسيت فراشي وطلعت سكرت دار ونزلت طول شربت اميا وواسيت وشاحي وخديت مفاتيحي وطلعت سكرت الباب وسكرت الباب البراني بالمفتاح وركبت سيارة وانطلقت💨
فاتحة راديو كل مرة تجي ع اغنية ودنيا زحمة هلبا امتى بنوصل مشعارفة😞
وصلوني مسجات
فتحت تلفوني لقيته ع فايبر فتحت الفايبر لقيتهم صور وقعدو يحملو وشوية وينفتحو
كانو صور محادثات وكان الرقم رقم..... #يتبع
.
.
.
ان شاءالله ياااااارب تنال اعجابكم وتكون قد المستوى الي متعودين عليه😊دمتم في رعاية الله😘 #حنو
