حب وإجرام 3

الحلقة 67

الحلقة 67 :
الطبيبة؛ وي مدام راكي حامل
أيلول تحكي :
باقية نغزر فالفراغ .. تتردد فوذني كان حامل .. حامل؟ .. توا ؟ .. علاش؟؟ .. شباش نعمل ؟ .. نخبرو؟ .. يقبلوا؟ .. مزال متغشش مني ؟ .. زعما يسامحني ؟ .. منعرش كيفاش هزيت روحي و خرجت .. من غير حتى كلمة .. إحساس ندرا كيف .. باقية نمشي .. ضعت .. لأول مرة نضيع هكا .. تي منيش فاهمة روحي .. الناس كي تسمع خبر كيف هكا .. طير من الفرحة .. وقفت نغزر للناس .. فنفس الوقت مخي مش هنا جملة .. نزلت راسي ..  دموعي نزلوا وحدهم 
أمير يحكي :
حليت الكارو ناخو فنفس طويل .. لتوا مخرجتش من الكلينيك .. نعرف ليوم تخرج تحاليل بش تتاكد من أنو المرض مبقالوا حتى تراس .. تكيت راسي للتالي .. رغم اني بعدت .. اما مزالني غارق فتفاصيلها ..  الشي اللي متأكد منو اني مستحيل نسامحها .. تي رغم كلشي صرا .. كانت مخبية عليا .. موثقتش فيا .. طلعت راسي وقت لقيتها خارجة .. جو بارد برشا الظاهر المطر بش ينزل .. هازة الفاست فيدها .. تي متحسش بالبرد .. وقفت فالباب .. نزلت راسها .. عدلت قعدتي باش نشوف شفما .. تبكي !! .. ريت واحد كي حط يدو على كتافها يسال فيها .. تي !! .. ميكونش رجعلها المررررض !!.. فكيت السبتة .. و نطرت خرجت .. منعرش كيفاش وصلت قدامها .. نطرت يدو من على كتفها
هو: سمحني فااش تعمممل !!
أمير؛ مش قاعدلك كون نوريلك شمعنى تحط يدك على مرتي .. أيلول شفما !! .. أيلوووول ..
هزت راسها غزرتلي .. غزرتها ضايعة .. باقي نهز فيها .. فاقت من سرحتها و غزرتلي ..
أمير؛ شبيك ؟؟
أيلول؛ شتعمل هوني انتا
أمير يحكي :
للحظة فقت على روحي .. كبست روحي شوي و جبدت يديا منها .. تلفتت نغزر للعباد .. ريت اكا السخطة اللي كان حاط يدو عليها .. يغزرلنا من بعيد .. ڨحرتلوا و غزرتلها
أمير؛ كنت فايت بالكرهبة شفتك
أيلول؛ و كي شفتني فاش قام تنزل
أمير؛ شبيك تبكي طلعت حاجة فالتحاليل !
أيلول؛ ما طلع حتى شي .. لازم نمشي توا ..
مشيت من غير حتى كلمة .. منيش صافا و لازم نخمم ..
أمير يحكي :
تلفت غزرتلها .. كي ركبت الكرهبة و مشات .. اكيد فما شي ..تلفت على فرملي كي هاز فيدو ورق  و يعيط عليها .. رحت عندو .. طلعوا التحاليل متاعها بعثتهم الطبيبة وراها خاطر نساتهم .. فكيتهم منو.. باقي نقرا فيهم.. كلش طبيعي ؟ مالا شبيها .. جيت نقفلهم .. أما وقفت عالورقة اللخرة .. اختبار حمل !!!!! .. كبست عالورق كثر و نزلت بعينيا للنتيجة .. عينيا تحلوا !!! ... حامل ! .. جات بين عينيا آخر ليلة عديناها كيف كيف .. تبسمت.. و التبسيمة ولات ضحكة و انا نغزر للنتيجة .. حامل بولدي 😍😍 ..خذيت نفس طويل نحب نستوعب واش راني نشوف .. لوهلة خفت أنو الحمل باز يأثر عليها خاطر كانت مريضة .. كبست لورق و طلعت للطبيبة اللي مكتوب اسمها فالتحاليل .. طمنتني بلي ميأثرش و اللي هي حمد الله تعافات .. خرجت فرحان برشا .. تي الفرحة مش سايعتني .. خممت أني نروح نعنقها .. اما لوهلة استرجعت .. بلي سقسيتها سكتت
أمير؛****** حتى هادي كانت بش تخبيها عليا !! باهي أيلول باهي ..
أيلول تحكي :
تعداو يومين ملي سمعت الخبر .. باقية مترددة .. كل ما نجي نكلموا نتوقف .. سارة تقولي خبريه .. اما منعرش علاش متخوفة من ردة فعلوا .. تذكرت آخر مرة شفتوا .. لحيتو زادت .. أما زاد حلا أكثر .. پرفانتو اللي تضرب من عشر ميترات .. الحاصول يدوش بالپارفان مش يحط منو.. اما غزرتوا باردة .. نعرف غلطت و كان جيت فبلاصتوا شنعمل نفس الشي ..واقفة فالبالكون .. الناس الكل راقدة كان أنا .. نخمم .. ال 2 متاع الليل ..خذيت نفس طويل .. جيت نتلفت ندخل .. نطرت وقت تحط طرف قماش على فمي .. قاومت شوي .. أما طحت و ماعاد حسيت بشي...
.......
حليت عينيا بالشوي .. تلفت نغزر للبيت .. نطرت خاطر مش بيتي .. جيت نحل الباب مقفول ..
أيلول؛ ما يكونو كان خدايم المايسترو .. رحت للطاقة حليتها .. بلاكشي نجم نخرج منها .. طلعت اسوء عالية برشا .. غزرت للرجال اللي واقفين .. منحتاجش ذكاء بش نطلع بلي من المافيا ..خذيت نفس طويل ..
أيلول؛ يحبوا يرجعوني بالسيف dark ..
رميت يدي لشعري .. فكيت منو المساك .. عوجتو شوي .. و دخلتوا فالثقب متع الباب ..شوي كهو و تحل .. تبسمت على جنب ..
أيلول؛ بربي خاطفين dark. .. وحاطين قفل كيف هكا .. شوي احترام للماضي متاعي راو😏..
حليت الباب بالشوي .. و طليت مفما حتى واحد .. مش نورمال ..
باقية نتسرسب بالشوي لين وصلت للدروج .. غزرت مفما حتى حد .. طلعت راسي زادة مفما حتى كاميرا .. باقية نتسرسب لين وصلت للباب .. دوب ما رميت يدي بش نحلوا وقفني صوت من التالي ..
أمير؛ انعم لالا وين على صباح ؟😒
#حب_وإجرام
#يسرى_أمجوج👑