حب وإجرام 3

الحلقة 56 بارت 2

حليت عينيا ليوم نهار جديد .. باز هاذالأيام متتعاودش .. باز يجي النهار اللي منجمش نفيق فيه .. صحيح حاطة ربي فقلبي .. أما هذا مرض كيما ننجم نتفائل و كيما ننجم نتشائم .. غزرت من البلار المطر تصب .. جو بارد برشا ..  بدلت دبشي كيما جا .. عندي موعد عالتسعة متاع الصباح .. جيست ما هزيت صاكي دخل عندي
اويس؛ بونذوور ماماتي
طبست هزيتوا ..
أيلول؛ بونجور يا احلى صغرون فالدنيا ..
باقية نبوس فيه و نشم فريحتو.. قداش بعيدة عليه و مسيبتوا ... رجعلي شعري للتالي بيديه الصغرونين ..
أويس؛ ماما أنا البالح كنت حاب نرقد معاك اما انتي طولت ننيت مع تاتا سالة
أيلول؛ سامحني يا روحي معادش نطول على صغروني
اويس؛ جوو اما عندنا بذاف مخرجناش بارك لعبو
أيلول؛ تو نروح عندي خدمة صغرونة بعدها نجي نهز ولدي يلعب متفاهمين يا بطلي
اويس؛ ياااي متفاهمين ماماتي
سارة؛ تتفاهموا وحدكم
اويس؛ لا ههه
أيلول؛ سارة معادش عليا وقت عالرونديفو ..
قدمت حطت يديها على يديا اللي حاكمة بيهم اويس و كبست عليهم ..
سارة؛ كون قوية كيف ما عرفتك
هزيتلها براسي إي .. خليتوا عند سارة و خرجت .. تعدات نص ساعة كنت فالكلينيك ..
ماكس؛ مرحبا دوموزال أيلول صافا؟
أيلول؛ حمد الله يعيشك
ماكس؛ أرمان أكدلي عليك .. هو عشيري من الصغرة و زادة ..
أيلول؛ و زادة شنية ؟
ماكس؛ بوه كان عندو مرض كونسار متاع الدم و توفى وقتها كنا مزال نقراو طب عام
أيلول؛ ش شنوة؟ تقصد اللي بوه !
ماكس؛ الظاهر محكالكش ... ماو كنا نقراو طب عام و كنا فعامنا اللخر و باش يختار طب الأمراض القلبية .. وقتها توفا باباه.. حبس القراية متاع الطب الكل .. و انا كملت تخصص هذا
نزلت راسي .. تي كيف نجم يكوراجيني و هو بذاتو .. فقد بوه بسبة هاذ المرض .. تي حتى من انا مسألتوش على حياتو .. منعرف عليه كان أرمان رجل أعمال و اكهو .. فقت على صوت الطبيب
ايلول؛ سامحني تهت شوي
ماكس؛ عادي .. أيلول
أيلول؛ نعم ؟
ماكس؛ هو صحيح المرض واعر و باش تتعذب .. أما لازم يكون عندك الدافع باش تقاوم .. باش يخليك تاقف كي تضعف .. لازم تاثق انك باش تتعافى منو .. باش تنجم تتخطاه باهي
هزيتلوا براسي إي ..
ماكس؛ نمشوا نعملوا ليزاناليز .. و الفحوصات الكل باش نقرروا طريقة العلاج
أيلول؛ ب باهي
مشيت معاه.. بدلت دبشي .. وقت دخلت لأكا الماشين متاع الأشعة قلبي خض عليا .. برشا دموع جاوني .. جيست ما كملت الفحوصات باقي يغزرلهم و تلفت غزرلي
ماكس؛ أيلول لازم نبداو فالعلاج فيسع .. الورم قاعد يتبرعم ..
أيلول؛ كيفاش يعني
ماكس؛ شنعملوا أول جلسة chimiothérapie
أيلول؛ ت ت قصد اللي لازم بيها!! هي طيح الشعر و
ماكس؛ شعرك و الوجيعة موش أهم من حياتك لازمك تقاوم
أيلول؛ ب باهي
أيلول تحكي :
أول جلسة chimiothérapies  تعدات .. حطيت يديا عالحيط سندت روحي .. وجيعة موش نورمال ..ماشية و تقوى .. باقية ساندة عالحيط .. أول ما لقيت كرسي قعدت .. نحس فجسمي باش يطرشق من الوجيعة .. نحب نعيط أما منجمش .. تاعبة و تاعبة برشا .. تكيت راسي للتالي .. حطيت يديا عليه و كبست .. باش ترخف أما شي .. دموعي نزلوا بالوقت .. زعما صح باش ننجم نتحمل جلسات خلاف .. تي طرف القوة اللي لميتوا على جال أويس .. طاح مني فأول جلسة .. شمزال يستنا .. أصلا موش مضمونة النتيجة .. فما خيط واحد مخليني نقاوم .. أويس هو و كهو .. قطرات المطر بدات طيح .. محسيتش بيها قد ما راني نحس فجسمي متقطع طرف طرف... مهدودة برشا .. الوقفة منجمتش ناقف.. وصلني ميساج بالوقت .. رميت يدي .. بالسيف حليتوا .. عينيا تحلوا و أنا نقرا فالميساج .. قمت فيسع .. أما عاودت حكمتني الدوخة .. قعدت .. كبست على سناني .. و قمت بالشوي .. هزيت بيدي للطاكسي حبست بالوقت .. منعرش كيفاش كنت قدام الباب .. دوب نجمت نحلوا .. يديا يرجفوا .. دزيت الباب برجليا .. وكبست على حرف الباب باش منطيحش .. قابلني فالصالة هازو فحملتوا ... و عاطي بالظهر ..
أمير؛ مرحبا
أيلول؛ ش شتعمل هوني أمير
أويس؛ ماما علاث مقتليث اللي پاپا ياسر مزيان هكا
تلفت غزرت لسارة اللي خايفة .. زادة منحبش نعلي فصوتي و نفجع اويس ..
أيلول؛ سارة برا طلع اويس لبيتو
أويس؛ موث وعدتيني نروحو بارك ماما
باقية نغزرلهم... دوب منجمة ناقف على ساقيا .. تيليفون باقي يصوني .. فيدي .. مدلها أويس ..طلعتوا .. و جا وقف .. طلعت راسي جات عيني فعينوا ..
أمير؛ غدوة باش نجي نديه
أيلول؛ ش شنوة اللي تديه
أمير؛ يلعب مع لينة
أيلول؛ توا اللي تفكرتوا .. من غير تعبك مسيو أمير نعرف نتلها بولدي بالقدا .. فك عليك .. دور الأب الحنون موش خارج عليك جملة ..
جبدني من يدي .. خبطني فالحيط .. حسيت مسلاني تقسم على الخبطة هاذي..
حط يديه عالحيط .. حاصرني بيهم .. غزرتلوا
أمير؛ منحتاجش نفكرك اللي الطفل على اسمي.. و ننجم نفكهولك في اي لحظة .. و نظن تعرف بالقدا نفوذي شيعمل.. ورحمة أمي يا ايلول غير ريحتو معادش تشوفها ..
أيلول؛ ههه وصلت بيك تهددني بولدي أمير .. لهاد الدرجة ياخي.. كي تحب تنتقم .. انتقم مننننني أميييييير هاااني قدااااامك
حطيت يديه على كتافي
أيلول؛ هيااا أمييير .. موش تحب تندمني و تخليني نتمنا الموت .. هاني قداااامك
باقية تعيط .. الدموع اللي محصورين فعينيها .. نعرف بالسيف حاكمتهم ..وجهها اللي أصفر .. حالتها التاعبة .. إحساس يقولي أخطف دين امها أمير .. و انسا كلشي صرا .. كيف ما عملت قبل .. غزرت للأسم اللي باقي يطلب فيها .. أرمان ... جات في بالي البارح و هي ترمات فحضنوا .. نحيت يديا من كتافها و ڨحرتلها ..
أمير؛ هه مش بالسهولة هاذي أيلول .. اللعب توا وين بدا ..
جبدت روحي.. خرجت و طربقت الباب ورايا..
ايلول تحكي :
دموعي نزلوا بالوقت .. باقية نهبط مع الحيط لين طحت فالأرض .. شهقاتي بداو يعلاو.. برشا تاعبة ..
سارة : أيلول عزيزتي شفما!!!.. عملك شي ؟؟! تي حبس البكا بربي
أيلول؛ تي يخليني نتمنا الموت .. راني فيها شمزاااال عندي حياة اه!!!! ماني فالموت .. شمزاااال يحب عندي .. توا يحب يفكلي السبب اللي راني نقاااوم على جاااالووو...