حب وإجرام 3

الحلقة 56

الحلقة 56 :
قلبي رجف بالوقت .. إحساس ندرا كيف و يدي فيدو من جديد .. غزراتنا اللي مبقاتش كيف الاول .. لفني بالوقت .. تخبط ظهري على سدرو .. حطلي يديا على كرشي .. و يديهم فوقهم .. حاسة بانفاسوا كي تضرب فرقبتي من التالي .. بلعت ريقي ... جيت نجبد روحي كبس عليا ..قدم لوذني ..جيت نجبد كبس عليا لين وجعني .. طبس يوشوش فوذني ..
أمير؛ باش
لفني جا وجهي مع وجهوا .. حط يديه على وسطي و كبس عليا .. وجعتني أما محبيتش نبين ..عدا عينيه على وجهي الكل ..قدم ليا خلاص ...غزرلي في عينيا .. و غزر لشفافي .. قلبي باش يحبس .. طلع عينيه لعينيا .. وقدم لوذني ..
أمير؛ نخليك تندم و تتمنى الموت كل دقيقة ولا منكونش أمير المالكي
جبد روحو بالوقت .. باقية جامدة فبلاصتي تتعاود فراسي هدرتوا .. أول مرة يحكي معايا بالطريقة هاذي.. حتى كي كان ينتقم مني مقاليش هدرة كيف توا .. غل كبير فغزراتوا .. موش خايفة من اللي باش يعملوا .. أما اللي وجعني غزرتوا اذيكا .. أنو يعني ينجم يعمل اللي يحب عليه معادش تفرق أما .. غزراتو تبدلت .. عبد جديد واقف قدامي .. فقت من سرحتي على صوت التصفيق .. للي كانوا يشطحوا .. نزلت رحت للتابل اللي كنت فيها ..جا عندي ارمان
أرمان؛ إيجا باش يقطع التارت راو
أيلول؛ لا ميسالش تعبت و نحب نروح ..
أرمان؛ إيجا نوقفوا معاه و نهنيوه بعدها نوصلك أنا زادة عندي سفرة غدوة لواشنطن .. لازم نروح بكري ..
أيلول؛ باهي ..
قدمنا قدامو باقيين يغنيولي .. هو هاز بنتو يلعب معاها و هي تصفق .. منظر يوجع برشا .. منال تغني و تتشوحر عليا .. جيست ما كملوا
منال: أمير عزيزي اتمنى
أمير: عندي انتي و أحلى بنوتة شعندي نتمنى
الحضور كامل عجبتهم الفازة .. دورتو ليها باستوا بوسة خفيفة .. الكل صفقولهم .. بلعت ريقي و نزلت عينيا منحبش نبان ضعيفة عالأقل موش توا .. غزرتلوا كي.طبس هو و بنتوا نسفوا عالشموع .. قص طرف وكل لبنتوا.. و زاد وكلها ليها .. عاودت رجعتلوا كلا ..طلع راسو جات عيني فعينو .. جبدني أرمان من يدي .. هز طرف من الڨاتو و طلالو خشموا و ضحك
أرمان؛ ههه كل عام و انتا بخير صاحبي
أمير؛ ههه مرسي أرمان
أرمان؛ هاذي هديتي انا و أيلول باش تعجبك هانا جينا نعايدوك و نروحو
حكم عليه الكادو و غزرلوا
أمير؛ ههه لا باش تبقاو ميجيش متاكلوش من الڨاتو و زادة متنجمش ترفض خاطر عيد ميلادي و نطلب شنحب ..
أرمان؛ هههه تتمقصص توا أمير
ضحك و تلفت غزرلي بتمقصيص
أمير؛ ولا دوموزال أيلول منجمتش تتحمل ؟
أرمان؛ منجمتش تتحمل شنية !
أمير؛ الجوجمة
تلفت غزر لأرمان
أمير؛ نقصد الجو الصاخب هذا
أيلول؛ لا عادي مستانسة بالجو هذا .. متفرهدة عاللخر راني
أمير؛ أما ارمان هاي صديقتك معايدتنيش ..
غزرلي بتشوحير ..فهمت بالضبط شيقصد .. حاب يخليني نتنرفز بالسيف .. نعرفها نظرة التحدي هادي ..تبسمتلوا بتشوحير في وجهو و غزرت لمنال اللي تڨحر بتسوميم .. تلفت لأرمان و تبسمت .. قدمت عندو غزرتلوا فعينيه.. نفس غزرة التحدي اللي يغزرلي باها .. تلفت غزرت للتارت اللي قدامو .. هزيت طرف بيدي ذقت منو .. الكل مركزين معانا .. حتى بنتو .. تلفت غزرتلوا باقي يتبع فيا بعينيه ..غزرت للقاتو فيدي .. طلعتها باش نطليه باها .. جيست ما وصلت لوجهوا ..نزلت يدي لشفافو .. و طليتهم .. عينيه تحلوا حسيتوا تفاجئ من الفازة .. قدمت نسلم عليه .. همست فوذنوا ..
أيلول؛ ينعاد عليك أمير المالكي
جيت نسلم من الجيهة الثانية زدت همست
أيلول؛  بصحتك القاتو و برا اعمل اللي تحب عليه .. و اللي تنجم تعملوا اعملوا متقصرش عزيزي
جبدت روحي غزرتلوا .. باقي يغزرلي داهش .. تبسمت و حطيت يدي على شعر اكا الصغرونة فرفشتلها شعرها شوي ..
أرمان؛ ههه أيلول شنية المعايدة هاذي اللي تهمسهالو فوذني قتلني الفضول نعرف راو
جبدت روحي .. غزرت لأرمان
أيلول؛ يقولي اللي المعايدات اللي تجي فالسر تتحقق فيسع موش هكا أمير
تلفت غزرتلوا .. كي عدا لسانو عالقاتو اللي على شفافو كلاه.. و غزرلي ..
أمير؛ بالطبيعة تتحقق
جيست تبسمتلوا ..
أيلول؛ أرمان نروحو  توا
أرمان؛ بالطبيعة هيا باي أمير
أمير؛ باي
سبقتوا كي مشيت .. جيست مع خرجت .. دموعي محصورين فعينيا .. أنو صحيح يقهرني ..أما موش بيها و يبوسها قدامي .. منعرش علاش جامي خممت أنو يرقد بين يديها .. لهاد الدرجة كنت مدايرة كونفيونص فحبو ليا ..اما اللي ريتو توا خلاني نمحي أي فكرة انو مزال يحبني ولو طرف ... منعرش منين جبت القوة هاذيكا باش نتصرف بالبرود أذاكا .. عكس الحرقة اللي تخنق فيا توا .. تلفت كي حط يدو على كتفي .. رمشت بزربة باش ميبانوش الدموع ..
أرمان؛ سامحني طولت
أيلول؛ لا عادي هيا
أرمان يحكي :
ركبنا طول الثنية ساكتة ..الظاهر تاعبة .. ياسر طالعة مزيانة اليوم .. حسيت اللي فما تكهرب بينها و بين أمير.. ظهرلي متحملوش .. منعرش اما حسيت اللي فما شي .. جيست مع وصلنا قدام الدار .. نزلت وقفنا قدام الباب ..
أرمان؛ أيلول مليحة انتي
طلعت راسي غزرتلوا .. برشا تاعبة منيش منجمة نحكي ولا كلمة.. حاسة اللي نحب نبكي و اكهو .. حط يديه على كتافي يهز فيا ..
أيلول؛  م م منعرش برشا تاعبة
دموعي حابسين فعينيا .. طلع يدو عداها على شعري ..
أرمان؛ متخافش باش تتعالج و تبرا ..
أيلول؛ انشالله
أرمان؛ و هاني معاك مهما يصير هاني فظهرك
ترميت عندو عنقتوا .. 
أيلول؛ عيشك أرمان .. مرسي على وقفتك ..
أرمان؛ ههه تي يا بنتي ما عملت شي راو ...
جبدت روحي .. مسحت الدموع اللي هربوا مني .. و تبسمتلوا
أرمان؛ علاواه الدموع هاذوما .. متخافش باش تتعالج عند أفضل الأطباء..و باش تكون بخير تفاهمنا
هزيتلوا براسي إي
أيلول؛ تصبح على خير
أرمان؛ و انتي بخير باش نعيطلك غدوة بعد ما تكمل الجلسة متااعك باهي
أيلول؛ باهي
ودعتوا و دخلت للدار
أمير يحكي :
باقي واقف أما باقية تتعاود فراسي .. الفازات اللي عملتهم .. هدرتها زادة .. خرج وراها أرمان .. هزيت الكاس قدامي شربتوا الكل.. هزيت يدي لواحد من رجالي
أمير؛ وصلها هي و الطفلة للدار
منال؛ أمير مزالت الحفلة راهي
تلفت ڨحرتلها سكتت ..أمير ؛ جماعة لازم نمشي توا كملوا اتفرهدوا .. كلش على حسابي .. خليتهم يصفقوا و خرجت .. خذيت المفاتح من عند الشوفور .. و طرت بالكرهبة .. حاس روحي باش نطرشق من العصب .. ركيت قدام دارها بعيد شوي .. غزرتلها كي واقفة تحكي معاه .. مبعد عنقتوا .. طرف العقل اللي مزال فيا طار .. تي تعنق فيه !! .. خبطت الفولون
أمير؛ باهي يا أيلول بااااهي !!!!
💥💥💥💥💥💥💥💥💥💥
#حب_وإجرام3
#يسرى_أمجوج👑
#بارت1