حب وإجرام 3

الحلقة 58

الحلقة 58 :
جيت نتعداه باش نخرج ..جبدني من يدي .. و خبط الباب ..ڨحرتلوا
أيلول؛ أمييير شتتعممل سيبببني
أمير؛ روح تقعد ميجيش تخليني نكبسك أكثر هاو يولي البيبي فخطر
باقية نفارع فيه
أيلول؛ شمدخلك انتا أصلا فيه .. تي لاه مجيبني هوووني !!!
جبدني من يدي .. و دزني عالسرير .. تخبط راسي عالحرف ..
أيلول؛ آآه
أمير يحكي:
كنت منرفز عاللخر .. قد ما نجمت نهدي فروحي شي .. منعرش قداش من كاس شربت .. أصلا كون مخليتش الاجتماع أذاكا كنت نهبل و نقتلها .. حطيت الكاس و الفلوس .. و خرجت منعرش فاش نخمم توا .. الأهم أنو نحب نراها توا .. نفهم شتقصد بحامل و منو !؟ .. مهما يكون مستحيل نسمح تكون لأي واحد .. و أذاكا اللي صار خطفتها .. أصلا كي زدت ريتها زاد ركبلي العصب .. اكاكا و باقية تستفز فيا ..جيست ما دزيتها ..حسيت كي تخبطت عالحرف .. تلفتت مفجوع .. ثانية كنت قدامها .. جبدتها من يدها و قعدت قدامها .. نحيتلها يدها .. جرح صغير في جبهتها .. حطيت يدي عليه .. فوق الدم .. قلبي وجعني ..رغم كلشي منجمش نأذيها .. نحاتلي يدي .. و حطت يدها عالجرح .. باقي تتوجع منو .. عديت يدي على وجهي و غزرتلها
أمير؛  انتي اللي حتمت عليا نأذيك
أيلول؛ هه شنوة مزال بربي شنوووة .. ياخي تفرقنا و خليتك تعيش حياتك .. شمزال تحب عندي .. هوكا عندك دارك مرتك بنتك خدمتك
وقفت .. تغزرلي .. تبكي و تحكي بالعياط
أيلول؛ حياتك كاملة و مثالية .. توا ظهرتلك تهد على حياتي .. وين كنت وقت كنت ...
غزرتلها كي سكتت
أيلول؛ هه شيهم توا فالهدرة هاذي .. من التالي علاش خطفتني  مسيو أمير
وقفت نحاول نركح روحي قد ما ننجم .. لين جيت قدامها ..
أمير؛ فما 3 أسئلة و باش تجاوبني عليهم
أيلول؛ انتا خطفتني باش .. تسقسيني .. أميييير هبلت في مخك انتا؟؟؟
حكمني من يديا .. دزني للحيط و حصرني .. طلعت راسي غزرتلوا عينيه حمر دم .. باين كان يشرب .. ريحة پارافانتو وريحة الدخان ..
أمير؛ واحد .. رميت كلشي على جالك من قبل .. آخر مرة خطفتك .  حطيت حياتي بين يديك .. كنت منستاهلش تحط حياتك انتي بين يديا؟؟
غزرتلوا فعينيه .. مفماش مسافة بيناتنا.. يحكي بوجيعة كبيرة .. ولا مرة ريتوا ..بهاذ الحالة .. مزيج بين القوة والضعف ..
أمير؛ جاااوب
أيلول؛ كنت تستاهل
تلفت يغزر لبعيد
أمير؛ امم نستااهل
تلفت غزرلي
أمير؛ علاش رجعت ؟
سؤالوا خلاني ندخل بعضي .. بلعت ريقي بالوقت .. قرب ليا أكثر .. مفماش مسافة بيناتنا..
أمير: علاش ؟
أيلول؛ ر رجعت كهو
حكا بالشوي دوب سمعتوا
أمير؛ باش توجعني أكثر هكا
أيلول؛ لا أصلا مفروزين راو .. هاني بعيدة عليك..و
أمير؛ بعيدة و كتاه بعدت انتي أه؟؟ وكتاه بعدت .. راك كل يوم هوني
حط يدي على سدرو
أمير؛ هووني تحرق فيا .. علاش حاسبتني بغلطة كانت فالماضي متاعي .. ماو خيرتك انتي مستقبلي .. هكاكا سيبتني و مشيت .. كنت نتنفسك راني .. بين ليلة ونهار .. لوحت حكايتنا للحيط و هجيت .. شعملت فالسنين هاذوما أه ؟
أيلول؛ م ميهمش برشا.. سيبني أمير .. نحب نمشي كي تصحا نحكيو
أمير؛ نصحا ؟ نصحا أيلول ؟؟ تحسب اللي باش يأثر فيا .. لا ميأثرش .. فوق اللي عملتوا شي ما يأثر فيا .. 
أيلول؛ أمير نعرف اللي غلطت .. أما هكا خير .. نجمت تريڨل حياتك
أمير؛ شكون قال لسماك انو حياتي مريڨلة هكا !!
سكتت و أنا نغزرلوا .. عينيه فيهم وجيعة.. فيهم دموع .. كل كلمة يهدرها حاسة بيها .. بلع ريقو و قدم ليا أكثر .. معادش فما مسافة بيناتنا .. حط جبهتوا على جبهتي .. خذا نفس طويل .. ترهوجت من قربوا هكا..
أمير؛ السؤال الثالث و اللخر .. مستحيييل تطلع حبلة منو قولي اللي هذا صحيح ..
جمدت فبلاصتي .. منجمتش نغزرلوا .. زادة منجمت نهدر حتى حرف..
أمير؛ بغلاوة أويس عندنا .. قولي اللي مزالك متاعي أنا .. ملكي وحدي .. كيف ما كنت .. عذبتني راك و رحمة أمي عذبتني أيلول ..
حط يدي على قلبوا .. يخبط موش نورمال ..
أمير؛ سيبت كلشي على جالك فالتالي انتي سيبتني .. كنت ننجم نتقبلها من أي حد موش منك .. راهنت عليك.. فالتالي شويتو .. لهاذا شويتو .. عجبتك الحالة اللي راني فيها توا .. ملهي روحي بالخدمة و
أيلول؛ و ببنتك و
نزلت مني دمعة سخونة .. غزرلي .. طلع يدو مسحها
أمير؛ كانت تنجم تكون بنتنا .. كانوا ينجموا يكونوا ولادنا .. كانت تنجم تكون حياتنا .. أما ..
غزرتلوا .. كي دموعو نزلوا.. طرف القوة اللي عندي طاح .. منجمتش نرا منظرو هكا .. أمير يبكي!!! .. طلعت يديا حكمت .. وجهوا جبدتوا من على جبهتي .. غزرتلوا .. كي غمض عينيه .. طلعت يديا نمسحلوا فالدموع ..نمسح و نبكي .. حل عينيه غزرلي .. جبدني لحضنوا .. طرشقت بالبكا و هو زادة .. منجمتش نحبس دموعي .. يمكن دموعنا هاذوا محصورين من عامين ..  و توا لقاو طريقهم للبرا ..جبدني .. حط يديه على وجهي يمسحلي فالدموع
أمير؛ جاوبني أيلول قول لا و معاد نحكي حتى كلمة .. انتي حبلة من أرمان بالحق ...
💥💥💥💥💥💥💥💥💥💥
#حب_وإجرام3💥
#پارت1
#يسرى_أمجوج👑