-خالي انت جبت قروش الأدوية دي من وين؟
-رفاء انا مش جبتهم وخلاص؟مافي داعي الأسئلة
-انا بس عايزة أطمن عشان ما نعصر عليك كفاية انت بتكلف نفسك كتير عشانا
-كدا عايني لي كدا
-اها
-ماشاء الله كبرتي وبقيتي تقولي كلام زي دا انتي ما تختي في بالك حاجه وانتو ما قاعدين تكلفوني انتي زي بنتي وأمك اختي ولو سمعتك بتتكلمي كدا تاني بندمك فاهمه؟
-هههه حاضر خالي ممكن أسالك
-اها
-أبوي اتوفى متين؟
-اتوفى قبل ولادتك بشهرين
-طيب ليه اسمي ما مسجل باسمو هو
-يا رفاء انا مش الف مرة قلت ليك ما تسألي السؤال دا وبعدين أمك بتتضايق لما تسمعك بتتكلمي في الموضوع دا
-ما أنا عايزة أعرف ليه هي بتتصايق وفي شنو أنا من حقي أعرف أبوي منو واسمو منو
-هو مات وانتي بعيونك ما شفتي طيب حتستفيدي شنو لما تعرفي
-على الأقل أعرف انا بنت منو😪
-انتي بنتي أنا وكفاية كلام في الموضوع دا
خالي نغض يدو من الأكل وقام وهو زهجان من كلامي أنا الحاجه المحيراني انو هو وأمي دائما بتضايقو من الموضوع دا لما أنا أفتحو وحتى ناس عمي ما قاعدين يجيبو سيرة أبوي وكأنو ما كان موجود في يوم معاهم
مطار سلطنة عمان،،
-تتذكر أول مرة لما اتلاقينا في قضية وانت كنت طرف الدفاع وبعدين أنا كسبت القضية
-هههه ومن اليوم داك ونحنا 24 ساعة في وش بعض
-واسي انت حتمشي
صهيب عاين لفرذدق وكأنو عايز يبكي وعايز يلطف الجو
-انا حكون مبسوط لأني هناك حكون المحامي الأول ما أظن يكون في منافس يعني بدل كل مرة انت تربح علي في قضية🥺
-هههه لا وواثق انو ما حيكون عندك منافس
-واثق شديد ههه
-ان شاء الله ما آخر وداع حترجع تاني؟
-انا هنا تاني ما بجي الا انت تجيني في دنقلا
-هههه انت عايز تعجزني بس
-متأكد انك حتجي دنقلا في يوم
-ما قلت ليك انو عندك ثقة زائدة في أي شي😹😹
-طيب نشوف
الصباح..
صحيت متأخرة شديد مشيت صبحت على امي واطمنت عليها لقيتها بقت احسن ختيت ليها أدويتها جنبها لقيت خالي طلع الشغل لفحت لي عباية سريع سريع وطلعت وانا ماشة بسرعة لأنو الأستاذ حايشاكلني وين انتي يا رفاء ليه اتأخرتي كدا يا رفاء انا مستنيك ساعة امشي اعملي لي القهوة يا رفاء انتي عايزاني انقص ليك مرتبك دا ولا شنو يا رفاء😹😹انا ماشة في الشارع بحاكي فيهو عرفت انو الليله حيجلطني بتأخيري دا المكتب ما بعيد مننا شديد يعني زي 20 دقيقة كدا برجليني بكون وصلت.
وأنا ماشة كان في ركشة ماشة وراي وبتضرب لي بوري عملت لي ازعاج زهجت منها شديد اتلفت عليها لقيتو الشامي(ود عمي)اسي دا وقتو ووقت أتصبح بيهو😣
-رفاء صباح الخير
-....
-يا بت اركبي عشان تصلي المكتب سريع
-شكرا ما عايزة
-انا ماشي آكلك يعني اركبي
ركبت معاهو بس عشان ما ينق فيني كتير وعشان أصل سريع
-انتي ليه بتشميني كدا يا بنت
-عشان انت بتتشم😒
-ههههه طيب على فكرة انا ودعمك لو ما عارفة يعني
-لا عارفة شكرا على المعلومة😒
-يعني عايز أطمنك اني مسالم وما باكل
-هاااا ظريف😒
وصلنا المكتب
-المسافة دي ليه بسيطة كدا ما لحقت اتونس معاكي
-احسن😒
-هههه طيب عايني انا مش ود عمك؟
-اها
-طيب ليه ما عندي رقمك يعني؟
-وليه يكون عندك؟
-عشان انا ود عمك وعشان عايشين في بيت واحد عيب على انو ما يكون عندي رقمك اسي انتي لو احتجتي حاجه حاتكلميني كيف بس
-طيب سجل 09
ما عارفة ليه اديتو رقمي بس عشان أخلص منو هو مشى وانا خشيت المكتب لقيت الأستاذ قاعد منتظرني خاتي يدينو في خدو ومتمحن شكلو منتظرني بشكلة
-رفاء انتي وين من الصباح
-اتأخرت صاح؟انا آسفة حامشي أجيب ليك القهوة بتاعتك
-لا استني ما عايزها
دا مالو معقولة عايز يطردني ولا يقول عايز ينقص لي المرتب
-انا الليله مبسوط شديد وما عايز قهوة من الصباح
ياربي مالو
-نظفي المكتب دا لازم يكون بلمع ما تخلي فيهو ورقة طايرة
