صهيب رد لدان وخت التلفون في التربيزة البين سريرو وسرير فرذدق وهو فاتح الإسبيكر
-الو صهيب كيفك وحمدلله على السلامة
-الله يسلمك كيف عاملة
-تمام والله بقيت كيف انت
-كويس الحمدلله
دا كلو عشان هي فاكرة انو صهيب عمل حادث
-كنت عايزة أقول ليك اني عايزة اتكلم مع فرذدق لأني ما عارفه رقمو بتاع السودان
-طيب حديك ليهو
صهيب أدى التلفون لفرذدق وطلع من الغرفة عشان يخلي براحتو فرذدق ما كان عندو نفس يتكلم معاها كان حاسي انو ما طايقها مع انو كان بحبها شديد شال التلفون قربو من أذنو
-الو حبيبي انا اسفه والله اسفه(وهي بتبكي)ما قصدي اتكلم معاك كدا بس انت عشان وعدتني انك حتجي وما جيت وسافرت السودان دي الحاجة الخلتني ازعل منك لكن في النهاية صهيب صحبك وكان محتاج ليك وعندك حق تمشي تشوفو وتقيف جنبو بالجد أنا اسفه😪
- على فكرة صهيب ما كان عامل حادث أصلا دا كان مقلب منو عشان يخليني أجي السودان؟طيب عارفة هو عمل كدا ليه؟عشان عايزني أكون جنبو عشان هو من اليوم الجاء فيهو السودان كان متمني انا اكون معاهو في كل لحظة وحتى أشاركو في شغلو شفتي الناس ممكن تعمل شنو عشان الناس البتحبها؟مش زيك تقعدي تنكدي علي الليل والنهار وما حصل يوم راعيتي لظروفي ولا سألتيني مالك ولا حاصل عليك شنو يا فرذدق لكن لحدي هنا كفاية وأنا ما راجع عمان وقاعد هنا وحاشتغل مع صهيب يلا ارتاحي
وقفل الخط في وشها من غير ما ينتظرها تقول ولا كلمة هو كان حاسي نفسو ارتاح لما قال ليها الكلام دا لكن هو ما عارف ليه قال ليها كدا واصلا هو ما حيقعد هنا ولا حتى حيشتغل مع صهيب لكن يمكن عشان دا كلو كان في لحظة زعل وهو كان مغبون منها شديد وبس عايز يديها حقها لكن ما كان عندو الجرأة يقول ليها كدا بس لما شاف رفاء ادتو دافع انو يقول ليها الكلام دا.
صهيب دق الباب لفرذدق عشان يشوفو خلص مكالمة ولا لا
-اتفضل
صهيب خشى واترمى في السرير أو بالأصح نط في السرير😹😹
-شغالين خلط تقيل
-خلط شنو ياخ أنا البت دي بقيت ما طايقها
فجأه صهيب بقى يغني الشال قلبي سلبو ومشى خلاني مدروشة الشال قلبي سلبو مشى خلاني مدروشة
وينطط في السرير كأنو انتصر في حاجه ويعمل فيها بزغرت ايوووي ايوووي ايووي
فرذدق بقى يضحك من تصرفو وهو عارف انو صهيب بكره دان شديد لكن مستحملها عشان هي حبيبة صحبو وهو كلمو كتير انو يبعد عنها لكن فرذدق ما كان بسمع كلامو بالمرة
صهيب قام من سريرو ومشى لفرذدق وباسو في راسو
- يا طاعم يا جميل انت🤤
بقى يجضم فيهو 😹😹
- يا ود مالك قوم أمشي بعيد
-احياا من البخجل دا ايه الجمال دا؟🤤
-والله انت مجنون
-هههه ياخ أنا متين منتظر اليوم الحاتقول لي فيهو انك كرهت دان دي ياخ البنت دي فقر والله اي عليك الله خليك كدا عيش حياتك بلا دان بلا يحزنون
فرذدق قعد يضحك من كلامو وحس انو أخد القرار الصاح
-اها يا بطل بكرة تمشي معي المكتب
-لالا ياخ ما عندي نفس اشوف الشغل ولا الاوراق ولا أي شي عايز أريح راسي شوية
-اوووكي ظبوووط يلا انا عايز أتخمد
فجأه فرذدق اتذكر انو صهيب قبيل قال ليهو انو رفاء شغاله معاهم في المكتب قال أحسن يمشي عشان يشوفها وكان مبسوط خت راسو في المخدة واتنفس بمعق وهو منتظر يوم بكرة متين يجي
الصباح..
أنا الليلة كان عندي مزاج عالي صحيت بدري ما زي عادتي😹😹لبست اسكيرت ومعاهو قميص كدا مخطط لونو أسود بكحلي ولبست طرحة كحلية انا لما استغربت في لبسي لأني طوالي بلبس عبايات😹😹 وعملت روج مع اني ما قاعده اعملو لكن الليله في حاجة خلتني اظبط نفسي من غير ما أحس عاينت لنفسي في المراية كدا قلت بصوت مسموع
-ايه الجمال دا من اول الصباح😚
تاني انتبهت على نفسي ضحكت ضحكة عالية تاني سكت وقلت
-مجنونة😹
أمي سمعتني بضحك جاتني يا بت مالك في شنو من الصباح بتضحكي مع منو؟
-بضحك براي يا سروية
-سروية؟انتي الليله ما براك
-هههه ليه يا سروية مافي شي والله
طبعا هي ما متعودة على التشغيلات دي
- طيب أمشي على شغلك عشان المدير بتاعك ما يقول يعمل ليك مشكلة
فجأه اتذكرت أستاذ أمين والله اشتقت ليهو عديل كدا واشتقت لصراخو مع انو كلامو كتير لكن حباب ياخ😹😹المهم طلعت من البيت لقيت ركشة الشامي واقفة جنب بابنا وهو نايم فيها ورافع رجلينو شكلو من أمس نايم فيها وما كان في البيت بقيت أعاين لشكلو وهو نايم فاتح خشمو والريالة نازلة منو وبشخر وشعرو منكوش زي عصاية المسح والعجب السروال والفنيلة الوسخانات حسيت قدر شنو الولد دا كويس لكن الدنيا ظالماهو اي والله تابعت مشي كان عندي مزاج امشي والجو كان حلو والهواء ظريف مشيت وصلت المكتب كانو لسه هم ما جو حتى أستاذ أمين البجي قبل الشحادة وبناتها ما جاء معناها الزمن بدري عاينت للساعة لقيتها عاملة ٧ ياداب والدوام في المكتب ببدا ٨ ونص يعني فضل ساعة ونص ما كان عندي حاجه اعملها قعدت أنظم في المكتب ونظفتو كمان عدم الشغلة😹😹ومشيت ختيت القهوة في النار بقيت أعمل فيها ومندمجة بغني ساي وأنا شغالة لحدي ما جات الساعة ٨ وبرضو مافي زول منهم جاء لكن اتأكدت انو أستاذ أمين حيجي بعد شوية فجأه تلفوني ضرب لقيتو صهيب رديت ليهو
-لسه ما جهزتي؟البسي سريع عشان انا واقف ليك بره
لقيت نفسي بضحك
-ههههه
هو لما استغرب فيني مالك😹😹
- انا اسي في المكتب لي ساعة
- انتي جادة؟بسم الله مالك ماشة بدري كدا
-بعمل في القهوة😹
- يعني حاشرب قهوة حلوة من الصباح دا اية الخبر الحلو دا؟
-خلاص بطل يلا تعال انا لي ساعة قاعده براي زهجت
- طيب مسافة السكة بس يا جميل
فجأه لقيت نفسي بتكلم معاهو عادي وكأني بعرفو من زمان وكأنو أخوي او صحبي.
فرذدق طلع من باب البيت سريع وكان خايف صهيب يكون مشى وهو ما معاهو عربية ولا حتى عارف المكتب دا بوين لحق صهيب وكان بزرر في زراير القميص من الاستعجال عمل وحده غلط وكان بتنفس بصعوبة لما شاف صهيب وكأنو لحقو بعد مسافة بعيدة وهو جاري بالعربية😹😹
-الحمدلله اني لحقتك
-بسم الله في شنو ومالك عامل كدا؟
-كنت فاكر انك مشيت المكتب وفاكر اني ما حالحقك
- انت ماشي معي يعني؟امس ما قلت انك ما ماشي
-ياخ غيرت رايي فجأه لقيت اني ما حاقدر أقدر في البيت حازهج وكدا فقلت أحسن امشي معاك
-ههه طيب زرر القميص دا كويس وأركب
فرذدق انتبه لزراير القميص وبقى يضحك
أستاذ أمين جاء خاشي المكتب شافني قاعده وبنظم في الأوراق القاعده في التربيزة قام سلم لي سلام حلو وكمان معاهو حمدلله على السلامة وابتسامة لا دا ما جادي معقولة دا أستاذ أمين؟؟
بقيت محتارة لحدي مت شوية ووصل صهيب وكان معاهو فرذدق اي ياهو فرذدق زاتو لقيت أنظاري كلها بتتوجه ليهو هو كان ماشي جنب صهيب مشيتو الفروسية الكلها فخامة لقيت نفسي سرحانة معاهو.
فرذق..
ما كنت مصدق اني شايفها قدامي مع اني شفتها امس لكن كأنو دي شخصية تانية مع الاسكريت والقميص وشوية الميك اب العاملاهم في وشها حسيت انها مختلفة من الشفتها أمس لكن أجمل يالله من الجمال دا🤤
صهيب..
يمكن انا طوالي يشوفها بس بالعباية والطرحة السوداء وأول مرة اشوفها لابسه اسكيرت وكمان خاتة ميك اب شفتها أحلى وأجمل قدر شنوو البيت دي جميلة وبريئه.
