-رفاء انا اول مرة أحس اني لقيت البنت البتشبهني البنت الممكن أعيش عمري كلو معاها من غير ما أمل أو أزهج البنت الكنت بفتش عليها من زمان لقيتها فيك انتي🖤
تفاصيل وشك حواجبك رموشك عيونك أنفك خشمك الصغير خصلك الناعمة يدينك رجلينك عنادك توترك لما تاكلي أظافرك لما تدعكي يديك لما دموعك تكون عايزة تجري وتحبسيها🥺صوتك الحنين خوفك ولما تكوني متوترة أو زهجانة بتمشي سريع لما تكوني مبسوطة او ما شايلة هم بتمشي على راحتك لما تبكي بليل وتصحي الصباح وتكون الهالات متجمعة حولين عيونك من البكاء والسهر دا كلو انا مراقبو وحافظو كل تفاصيلك الصغيرة دي بتهمني حتى ضحكتك المزيفة بعرفها فجأه لقيت نفسي براقب حركاتك لقيت نفسي مايل ليك مندمج معاك سارح فيك وفي الكحل المحلي عيونك في شفايفك الوردية ويديك الناعمة رفاء انا بحبك💜
كيف يكون في زول مركز معاك كتير كدا وعارف أي شي عني حتى الحاجات الصغيرة مع انو عرفني في فترة صغيرة بس حفظ دا كلو قدر شنو انا محظوظة.
ربنا ببسطنا بعد العذاب البنتعذبو في حياتنا وبرسل لينا الزول الحيسعدنا باقي حياتنا وبرسلو لينا في الوقت المناسب الوقت النحنا محتاجين ليهو فيهو💜
في وقفتنا دي سمعنا صوت باب المكتب فرذدق ما كان عايز يشيل يدو من كتفي بس أنا اصريت عليهو عشان عرفت انو دا صهيب الحيطلع بعدت من فرذدق لأني خفت انو تحصل مشكلة بيناتهم وأكون انا السبب بالفعل طلع دا صهيب لما شافنا واقفين بقى يعاين لفرذدق وكأنو شاكي فيهو فجأه وقف قدامي
-رفاء انا قلت ليك تعالي المكتب الليلة عشان عايز أقول ليك انو امس حصلت مشكلة بسيطة بسبب ود عمك ونحنا رجعنا وما تمينا كلامنا لكن بعدين حنجي ونتكلم في الموضوع عشان نحدد العرس
أنا بقيت أجمع في الكلمة عرس عرس عرس عرس منو؟عرسنا نحنا؟انا وصهيب؟
فجأه لقيت نفسي رديت ليهو من غير ما أحس
- عرس منو؟
-هه كيف يعني عرس منو؟عرسنا انا وانتي
- انا وانت؟طيب انت أخدت رايي؟ولا اخدت موافقتي عشان تقرر من نفسك كدا
- انا عارف انك موافقه وما عندك مانع
-ما عندي مانع؟انا قلت ليك كدا؟صهيب انت اصلا ما جيت سألتني
-رفاء انا عارف انك بتحبيني زي ما انا بحبك ودا ظاهر في تعاملك معي
-يعني لو بعاملك بطريقة حلوة يبقى انا بحبك؟يمكن تعاملي معاك دا عشان اعتبرتك أخوي ويمكن عشان ود جيرانا وبيتكم فاتح في بيتنا يمكن عشان أخو سهاد صحبتي يمكن عشان مديري ف الشغل دي كلها أسباب بتخليني اعاملك بطريقة حلوة
-يعني انتي ما بتحبيني؟يعني دا كلو كان كذب؟
- انا ما وعدتك بشي انت الكنت فاهم تعاملي غلط بتمنى انك تصلح الغلط العملتو وتفهم ناس بيتكم انو ماف شي بيناتنا لأنهم فاهمين اننا بنحب بعض تمام؟
صهيب بقى يعاين لي بنظرة كدا كلها حزن كانو انكسر شي كبير جواهو انا ما عارفة ليه قسيت عليهو كدا ليه قلت ليهو الكلام القاسي دا كلو ليه عملت كدا يمكن عشان فرذدق واقف قدامي يمكن وقوفو قدامي خلاني اكون قوية لكن هو ما خلاني اكون قوية بس خلاني اكون قاسية على واحد علاقتي معاهو كانت اقوى مما بتخيل بس شعور الحب الجواي لفرذدق خلا العلاقة دي تنكسر وما يكون عندها قيمة.
صهيب ما قدر يقول حاجة بس مسح الدمعة النزلت منو سريع لأنو ما عايز يخلي واحد مننا يشوفها بقى يداري فيها بيدو خشى المكتب بسرعة يمكن ما لقى كلام يقولو بعد القلتو انا
