بقى يعاين لي وعيونو مليانة دموع🥺
-كنت فاكر انك ما حتطلعي
-ليه؟
-يمكن عشان عيونك بقو ما شايفين غيرو
-منو؟
- فرذدق
فجأه قلبي دق لما قال فرذدق يعني هو عارف اني بحب فرذدق وإني رفضتو بسببو يعني هو عارف؟
-رفاء انا عارف أي حاجة على فكرة لأنو الحب ما بتخبى مافي زول بقدر يدسو لأنو بكون ظاهر وانتو عيونكم فضحتكم انتي عارفه من اليوم الشافك فيه فرذدق ونظراتو ليك واللمعة الظهرت في عيونو وحتى لما سألني عنك والغيرة البتظهر فيه لما يشوفني معاك دا كلو انا كنت عارف انو وراهو حاجة وحدة بس انو فرذدق بحبك كنت ملاحظ لتصرفاتو لكلامو نظراتو حتى انتي نظراتك لي كانت بتختلف عن نظراتك لفرذدق كان ظاهر انك اخترتي منو انا كنت غبي في البداية لما فكرت انك بتديني نفس الاحساس الأنا بديك ليه بس كنت غلطان لأني انخدعت بأسلوبك الحلو وفكرت انو ممكن يكون حب بس حتى في اليوم الجبت فيه أهلي عشان أتقدم ليك كنت ملاحظ قدر شنو انك اتضايقتي وما كنتي عارفه تتصرفي كيف وتطلعي من الورطة دي بأي طريقة كنت ملاحظ لنظراتكم انتي وفرذدق وقدر شنو عيونكم كانت مليانة دموع🥺وفيها كمية من الحزن ما بتوصف😪وحتى لما دخل الشامي في الموضوع وعمل مشكلة كنتو مبسوطين كنت مدقق فيكم النظر في اللحظة دي حسيت اني حفرق بين اثنين بحبو بعض😪حسيت اني غلطان لما أخدت القرار دا غلطان لأني استعجلت🥺ولما طلبت اني أشوفك في المكتب وقلت ليك اني حجيكم بعدين عشان نحدد العرس واتعاملت مع الموضوع عادي كأنو ما كان في مشكلة عارفة ليه؟عشان أثبت لنفسي اني بالجد غلطان كنت محتاج جوابك الجارح دا عشان أقدر انسى😪💔
عشان اضغط على قلبي وأخلي ينساك أخلي يعرف انو اختار غلط💔بالجد كنت محتاج للقسوة دي منك كنت محتاج ليها شديد🥺 أنا اسي ما خليتك تطلعي عشان أديك محاضرة وأحسسك انك غلطانة لا انا عايز اقول ليك حاجة صعب الإنسان يلقى زول يبادلو شعور الحب ناس بحبو ناس ما بحبوهم ونفس الناس ديل في ناس بحبوهم لكن هم ما بحبوهم فهمتي؟عشان كدا لما تلقى الزول الإنتي حبيتيهو بادلك نفس الشعور دي نعمة من الله مفروض تشكري عليها ومفروض تحافظي على الحب دا لأنو ما بتعوض ولأنو انتي الله أداك حاجة ناس كتار محتاجين لكن ما لاقنها عشان كدا حافظي على فرذدق وحافظي على حبكم دا وأوعى تخلي يضيع💔رفاء انا بكرة راجع عمان وعايز أقول ليك العفو والعافية😇
وانا أخوك(قال الكلمة دي بصعوبة قالها وهو ببلع في ريقو ودموعو جات جارية🥺)وصحبك وزي ما كنت أول بقيف معاك اسي حقيف معاك وبوعدك انو مافي شي حيتغير وما حغير معاملتي معاك حانكون اصحاب زي أول وأكتر وانا في يوم وعدتك اني ما حاتخلى عنك وانا لسه في وعدي ووقت ما تحتاجيني حتلقيني جنبك و
فجأه سكت وما قدر يتكلم حسيت كأنو العبرة خنقتو وبقى ما قادر ينطق بكلمة لكن دموعو كانت كفاية انها تشرح لي الكلام الهو كان عايز يقولو دموعو الكانت بتنزل وهو بمسحها بسرعة عشان انا ما أشوفها كنت عايزة اتكلم معاه عايزة ارد ليه على كلامو بس ما عارفة أقول شنو ولا أبدا من وين ما عارفة أواسيهو ولا أعتذر منو ولا ولا أقول ليه شنو فجأه لقيتو انسحب من قدامي وخش بيتهم بقيت أنادي فيه صهيب صهيب بس ما لحقت وهو قفل الباب وانا دخلت البيت🥺
كنت متضايقة شديد ما قادرة أشرح حالتي لنفسي صهيب ما عندو ذنب في الحصل دا هو ما بستاهل يحصل معاه دا كلو بس انا ما بقدر أدي قلبي ما بقدر قعدت ابكي بدون صوت احساس الشعور بتأنيب الضمير دا أكتر حاجة بتوجع لما تحس انك ظلمت زول دا أكتر احساس بوجع في الدنيا😪💔
في بيت صهيب.
أنا كنت قاعد في الغرفة بفكر في رفاء وفي اللحظات الحلوة العشناها بتذكر فيها لما قالت لي بحبك يا فرذدق💜البنت دي حتقتلني في يوم كان تفكيري كلو مشغول بيها ونسيت انو صهيب قال انو حايسافر بكرة كنت عايز أتكلم معاه لكن ما عندي الجرأة ما عارف اقول ليه شنو يمكن عشان خجلان منو وعشان انا غلطان وعشان هو حيرجع عمان بسببي😪صهيب خش الغرفة من غير ما يتكلم معي كنت براقب فيه وفي عيونو المورمة من الإجهاد النفسي الهو ماري بيه كنت عايز امشي ليه اتكلم معاه اقول ليه انا جبان عشان عملت فيك كدا عملت كدا في صحبي المقرب بس رجليني ما كانو شايلني😪
هو بقى يطلع في ملابسو من الدولاب ويدخلهم في الشنطة فجأه لقيت نفسي قمت من السرير وقعدت جنبو في الأرض قلت ليه صهيب اتلفت عاين لي كدا فجأه خالتو نجلاء جات خاشة الغرفة
-صهيب انت بكرة ماشي عمان الكلام السمعتو دا صاح؟
-اي يا أمي
-كيف يعني تاخد قرار زي دا من غير ما تقول لينا كيف؟على اساس انك خلصت امورك كلها هناك وجاي تستقر هنا وتبدا وتبدا شغل وبعدين انت شغلك كويس مع أمين راجع ليه؟وانت وعدتني انك تقعد هنا في وسطنا وما حترجع تاني
-معليش يا أمي انا صاح وعدتك لكن ما حاقدر اقعد هنا لازم أرجع
-ليه لازم؟عندك منو هناك كلنا هنا مافي سبب بخليك ترجع
-لا في
اتلفت عاينت ليه لقيتو مخنوق شديد كأنو عايز يقول لي راجع عشان ما قادر اشوف البحصل دا ما قادر أشوف انو البنت الأنا حبيتها اختارت صحبي
-صهيب انت ما عندك رجعة فاهم؟وانا ما حاسمح ليك
-يا أمي عليك الله ما تعملي كدا هنا الشغل ما نفع معي هناك شغلي كان أحسن بالجد ما بقدر اقعد هنا
عم ابراهيم جاء خاشي
-خليه يا نجلاء على راحتو وما تضغطي عليه
-كيف يعني أخليهو على راحتو يا ابراهيم انا ما صدقت انو جاء وقعد في نصنا كيف أخلي يرجع تاني بس
