عاينت لقيت الدرب في يدي سهاد كانت بتبكي من صحيت جات قريبه مني
- رفاء انتي كويسه؟
-اي كويسه أمي وين؟
-خالتو السكري تعبها وأسي هي في الغرفة التانيه معاها أمي
-مالها أمي فيها شنو كويسه هي؟
-اي كويسه كويسه ما فيها حاجه انتي اسي خليكي مرتاحه.
- لا عايزة أشوفها بس
صهيب جاء قعد في طرف السرير
- رفاء خالتو كويسه والله ما فيها حاجه انتي اقعدي ارتاحي وانتظري الدرب دا لحدي ما يخلص
-طيب انا عايزه أشوف أمي
-حاتشوفيها قلت ليك بس خلي الدرب يخلص
تاني سكت ساي ما جادلتهم بس بقيت شايلة هم لأمي وللحصل قبيل معقولة كلام ميمونة دا يطلع صاح وانو أبوي قبل ما يتوفى ما كان معترف بي أصلا طيب ليه انا بنت منو طيب عايزة افهم حاجه وليه أبوي ما كان معترف بي انا ما حاقدر أعرف الحاجات دي كلها الا من أمي بس هي الوحيده الممكن تجاوبني رفعت راسي عاينت لصهيب لقيتو بعاين لي اتذكرت انو الحصل قبيل داك كلو هو كان موجود وحاضر المشكلة وحتى سمع كلام ميمونة كلو بالجد خجلت منو شديد قلت أكيد حايكون فهم غلط ولا أي حاجه كنت عايزه اتكلم معاه قلت لسهاد تجيب لي موية عشان اقدر اتكلم معى صهيب هي طلعت وهو قاعد
-صهيب انا عايزة أقول انو قبيل انا ما
قاطع كلامي
- ما تقولي حاجه خلاص ارتاحي بس وما تفكري في أي شي
- انا ما عارفة حاجه من الكلام القالتو ميمونة دا انا برضو مستغربة زيك واول مرة اسمعو
- رفاء انا فاهمك وعارف اي حاجه انتي بس أسي ارتاحي بعد تبقي كويسه وتطلعي من المستشفى كلو بتحل تمام؟
- طيب
خلصت الدرب بعدين طلعو لي وقمت عشان أشوف أمي لقيت نفسي ما قادرة أمشي راسي لف تاني قعدت في السرير سهاد وصهيب جو سندوني
- رفاء ما تقومي عليك الله اقعدي ارتاحي عشان تقدري تمشي
- لا انا كويسه بس عايزة اشوف أمي
- انتي لو ما قعدتي ارتحتي حتقدري تمشي ليها كيف بس
-حامشي بس انتو خلوني مافي زول يسألني
تاني قمت من السرير عايزة أمشي جيت واقعه الا صهيب مسكني قام صرخ فيني
-ياخ اسي نحنا ما قلنا ليك اقعدي ارتاحي يعني عاجبك تقعي كدا انتي ليه ما بتسمعي الكلام
-صهيب خلاص خليها
هو طلع مشى ينادي الدكتور
- رفاء عايني خالتو كويسه بس جاها انخفاض في السكر وأدوها دربات بتاعة سكر وأسي هي كويسه بترتاح بس معاها أمي قيل شوية انا مشيت شفتها
-جد؟يعني هي كويسه
- والله كويسه انتي بس ارتاحي
- طيب
صهيب جاء ومعاهو الدكتور قال ليهو انها حاولت تمشي ووقعت قام الدكتور كتب لي درب تاني وركبو لي لقيت نفسي نمت شكلي نمت كتير سهاد كانت بتصحي فيني عشان نمشي بعد صحيت قالت لي انتي خلصتي الدرب من قبيل وخالتو قامت يلا عشان نمشي البيت
أنا كنت نعسانة شديد ما قادرة أفتح عيوني حتى سهاد سندتني قمت من السرير طلعنا بره لقيت أمي وخالتو نجلاء أمي مسكتني حضنتني وبقت تبكي عيونها كلها كانت خوف انا عارفه انها خاتة في راسها كلام ميمونة واني حكون صدقتو وأجي أسالها من الحصل لكن انا ما حبيت أذودها عليها قلت لحدي ما نصل البيت وأسالها براحه.
خالي جاء من الشغل على المستشفى ورجع معانا البيت ناس خالتو نجلاء ما قصرو مننا نهائ وقفو جنبنا شديد اما ناس عمي مافي زول منهم فكر يجي يتحمدل لينا السلامة حتى الشامي مع اني كنت فاكراهو حيجي يشوفني لأني فاكرة انو أحسن منهم لكن للأسف كلامي عنو زمان طلع في محلو😪
وصلنا البيت أنا وأمي وخالي مافي زول كان بتكلم مع التاني خالي قال لينا تصبحو على خير وطلع فرش بره في الحوش ونام أمي بقت ترفع في الحاجات وانا مراقباها وهي ماشه وجاية كانت خايفة ومتوترة متوقعه اني أسالها في أي لحظه في النهاية قلت ليها
-أمي ممكن تقعدي شوية عايزه اتكلم معاك
بقت ترجف سبحان الله اول مرة اشوف أمي خايفه من حاجه زي أسي كنت حاسه انو موضوع أبوي دا وراهو حاجه المهم جات قعدت جنبي في السرير
-يا أمي انا من اتولدت عرفت انو انا أسمي رفاء عثمان سيد أحمد واسمي دا على اسم خالي ما على اسم أبوي وكنت دايما بسألك عن أبوي وانتي بتتجاهلي سؤالي وما بتجاوبيني انا حتى اسمو ما عارفاهو بس عارفة انو هو اتوفى قبل ولادتي بشهرين أنا اسي عايزة اعرف اي حاجه وحتى كلام ميمونة القبيل عايزة ليهو تفسير
أمي فجأه بقت تبكي شديد كأنو مان ليها زول انا نا عرفت هي ليه فجاه كدا بقت تبكي انا بقيت اهدي فيها مشيت جبت ليها موية شربت وجيت قعدت جنبها
في جهه تانية..
صهيب كان خاتي راسو في المخدة لكن ما قادر بنوم بس بفكر
-معقولة الدنيا دي البنت المسكينة دي ذنبها شنو ليه تتعذب كدا ما عارفة أبوها منو وبعد السنين دي كلها يقولو ليها أبوك ما معترف بيك أصلا ليه بحصل معاها كدا هي قدر شنو البنت دي بريئه وما بتقدر تستحمل دا كلو قاسي عليها والله
بقى يفكر انو عايز يطمن عليها لكن ما عارف كيف مشى غرفة سهاد لقاها نايمه شال تلفونها براحه براحه طلع منو رقم رفاء وسجلو في تلفونو لكن كان متردد يضرب ليها ولا لا
أمي بعد هدت شوية قالت لي انا حاحكي ليك أي حاجه لكن بس بوريك أبوكي ما معترف بيك ليه وما بزيد من الكلام دا وانتي ما تسأليني اب سؤال تاني قلت ليها طيب
-أبوكي كان بسافر كتير وكان بخليني مع أمي لأنو شغلو كان في الخرطوم أكتر شي مرة هو كان في الخرطوم وقعد زي ٤ شهور كدا بعدين انا اكتشفت اني حامل بيك بشهرين ابوكي لما رجع وانا كلمتو اني حامل كنت فاكره انو حيفرح قام أداني كف وقال لي انتي وحده خاينه يعني فاكرة اني ما عارف خيانتك دي وطلقني وانا ما عارفه حاجه ولا فاهمه هو قال كدا ليه وقال لي انا مستحيل أقبل بولد ما ولدي انا الكلمة دي وقعت فيني زي الصاقعه بعدين اكتشفت انو دا كلو بتخطيط من ميمونة كانت بتقول لأبوكي انو في الفترة الهو كان فيها في الخرطوم كانو بجونا رجال في البيت انا وأمي بالفعل انا وأمي كنا برانا في البيت لأنو خالك كان الفترة ديك مشى الدهب وما كان معانا زول عشان كدا هي استغلت الفرصه واتهمتني وأبوكي صدق
