أنا ما كنت متخيلة انو أبوكي ممكن يصدق حاجه زي دي لكن هو صدق وما كفاهو كدا وبس زلاني وأهاني يمكن عشان حتى لما نحنا اتزوجنا هو ما كان راضي وزواجنا كان تقليدي لكن دا ما بديهو الحق انو يتهمني في شرفي وبعد الحصل دا انا جيت عشت في بيت أمي وولدتك وسجلتك باسم خالك بعد فترة أمي اتوفت وخالك جاء من الدهب لكن ماكان معاهو قروش ونحنا كناا قاعدين في بيت ايجار وماقدرنا ندفع قروشو تاني انا مشيت اترجيت عمك عشان نجي نسكن معاهم وبعد ذل واهانة خلا لينا الغرفة دي عشان نعيش فيها وانا ما كنت عايزاك تعرفي اي حاجه عشان ما تتأثري وبقيت حريصة اني ما أجيب سيرة أبوكي ولا حتى بالغلط😪
أنا بعد كلام أمي دا عرفت المعاناة العاشتها وقدر شنو هي اتحملت بسبب أبوي وبسبب مرة عمي😪
مسكتها حضنتها بقينا نبكي نحنا الاثنين بالجد حارة لما أبوكي يتهم أمك باتهام زي دا وما يعترف انك بنتو بس عشان كلام وحدة منافقة🥺قعدنا كدا لحدي ما أمي نامت ختيت ليها المخدة تحت رأسها وغطيتها وشلت لي فرش عشان أنوم في الحوش فجأه تلفوني دق كنت مستغربة دا منو البدق لي في الزمن المتأخر دا لما شلت التلفون لقيتو رقم غريب عشان كدا ما رديت قلت يمكن زول عايز يشغلها لي ولا حاجه والزمن متأخر شلت الفرش ختيتو بره دخلت جوه الغرفة جبت لي مخدة اتوضيت صليت لي ركعتين بقيت ادعى لأمي وانها تقدر تتحمل الجروح العاشتها دي قمت من المصلاية تاني الرقم ضرب لي اضطريت أرد المرة دي
-ألو
ماكان في زول برد
-ألو ألو
-ألو رفاء
دا صوت زول بعرفو اي دا صهيب
-ايواا اهلين
- معاك صهيب معليش ضارب ليك في زمن متأخر بس حبيت اطمن عليك وعلى خالتو
- لا مافي مشكلة كويسين نحنا الحمدلله
-طيب انتي ممكن تاخدي راحه ما تجي الشغل
-بس
-أمين انا بكلمو ما تخافي
- طيب تسلم يا أستاذ
-أستاذ؟رفاء انا ود جيرانكم نسيتي قولي لي صهيب بس شنو استاذ وما عارف ليه انتي فاكراني زي أمين حاقعد أهددك اني حاطردك وأنقص ليك المرتب😹😹
طبعا ما كنت عايزة اضحك لكن موتني ضحك😹😹قعدنا نضحك في التلفون ياخ طلع مرة ظريف🤭والله كأنو ما عرفتو أول أمس بالجد كأني بعرفو من زمان ما كنت متخيلة اني حاتونس معاهو وأضحك كمان😹والله خلاني انبسط شوية وأنسى الفات اتكلم معي كداا بعدين قفلت منو عشان انوم في النهاية قال لي ما تشيلي هم لحاجة وانا اديتك إجازه وقت ما تكوني جاهزه للشغل تعالي وتصبحي على خير.
ياخ بالجد شال مني هم كبير لأني ما جاهزه عشان أمشي الشغل نهائ مشيت نمت بمزاج😴
سلطنة عمان..
-بكرة القضية يا حاج
-ربنا يوفقك ان شاء الله تنجح
-النجاح دا بس بجي بدعواتك انت
-ان شاء الله يا ولدي اي قضية تمر عليك تنجح فيها ودايما أشوفك متفوق
-تسلم يا حاج كنت عايزك في موضوع كدا
-خير
-اي خير انا عايز أعرس
-عرس؟ههههه هو انا من زمان بنق عليك عشان العرس وانت رافض أسي كيف جات منك؟
-😹😹والله شايف نفسي عجزت ياخ
-ههههه خلاص بس انت قول لي العروسه شاور لي عليها بس وانا بجيبها ليك لحدي عندك
-هي العروسه موافقة أصلا بس عايزك تمشي معي لأهلها عشان نتقدم ليها رسمي
-خلاص عايز نمشي متين
-بس القضية دي تخلص
-ان شاء الله أنا عايز أفرح بيك ياخ وأشيل اولادك في يديني
-ان شاء الله يا أبوي
-بس ان شاء الله العروسة دي كويسه وأهلها كويسين
-والله ما عندهم أي مشكلة حاتشوف براك
-كويس الله يقدم الفيهو الخير
الصباح في مكتب أستاذ أمين.
- رفاء دي وين البنت دي انا الا افصلها جد جد المرة دي ما ممكن معاها
- رفاء الليله ما حتجي
-ما تجي ليه؟
- والله يا أمين حاصلة معاهم مشكلة في البيت عشان كدا وامس كانو في المستشفى هي وأمها
-سلامتهم وانت عرفت دا كلو من وين
-عشان انا ساكن جنبهم بيتهم فاتح في بيتنا
-ايواا وأسي هم كيف
-كويسين أحسن انا قلت ليها أخدي إجازه لحدي ما تبقي كويسه
-لحدي ما تبقى كويسه؟طيب اسي لو قعدت شهر
-هههه والله يا أمين انت اتغيرت شديد دي شنو الجدية الخشيت فيها دي
- ما جدية ولا شي لكن انا ما بهظر في شغلي مهما يحصل
-يا راجل؟😹😹💔
-صهيب انت حتبقى جادي متين
- والله ما عارف😹كدا اسي خلينا في خطتنا
-خطة شنو؟
-خطة نجيب بيها فرذدق هنا
-فرذدق دا ما حيجي عشان كدا اكسر حنكو
- لا حيجي بس انا عايز مساعدتك هو بكرة عندو قضية بعد القضية تخلص نحنا نعمل خطتنا
-والله انت من وراك ما بجي خير كلو كلو
-😹😹انت ما بتعرفني كويس ولا شنو
أنا قمت الصباح كسلانة من سهار امس والتعب😪لكن كنت مبسوطة وشغالة اتبسم من الصباح يمكن عشان تلفون صهيب😹لقيت خالي مشى الشغل وأمي شغالة في المطبخ جيت صبحت عليها ومشيت خشيت الحمام وصليت جيت شربت لي شاي وجهزت الفطور وفطرنا
-انتي الليله مالك ما مشيتي الشغل
-أخدت إجازه لحدي ما انتي تبقي كويسه وانا كمان أبقى كويسه
-يعني مديرك خلاك تاخدي اجازة عادي كدا؟
طبعا حتى أمي عارفاهو صعب قدر شنو😹😹
-دا ما مديري زاتو دا صهيب
-صهيب الدخلو شنو في اجازتك
-يا أمي صهيب اشتغل مع استاذ امين في المكتب
- انتي جاده؟والله كدا كويسه معاك على الأقل ود جيرانا وزول كويس ومحترم وما عندو اي مشكلة ومناسب شديد
- ليه قال ليك انا عايزة أعرسو يا أمي بس بربطنا الشغل
طبعا انا عارفاها فكرت في شنو😹😹
-اي انا ما قلت حاجه يعني قصدي كويس يكون في زول تاني في المكتب بدل استاذك الغليظ داك
