شظايا شيطانية~للكاتبة صرخة المُشتاقه

٦٦والأخير

◦•✖ || البآرت السادس والستون || ✖•◦•.

وحيد .. عمته هي كُل حياته ..
عمه مُعاقه لا تقدر تأخذ وتعطي معاه بالكلام ولا تساعده كُل ما إحتاجه لمُساعده ..
من صغره .. إعتمد على نفسه ..
كبر .. وقرر يتزوج بوحده ... يضمها لعيلته الصغيره وتلبي له الأشياء اللي إحتاجها بحياته ..
حينها كانت المره الأولى اللي يحس فيها بالراحه التامه ..
إعتمد على زوجته بكُل شيء يخص عمته ..
ما صار يضطر كُل يوم يهتم فيها ويلبي إحتياجاتها كإطعامها الأكل أو أخذها لدورة المياه كُل ما إحتاجت وتغيير مستلزماتها كُل ما إحتاجت ..
الراحه هذه .... كانت نوع جديد من حياته ما جربه ..
بدأ يأخذ راحته في الروحه والجيه ما بين أصحاب وصار حتى ينام عندهم بالإستراحات والسفرات ..
هالحياه والمرح مع الأصدقاء كان يتمناه بس كان يختار الاهتمام بعمته على هالأشياء ..
ما حس أبداً بالضغوط الكبيره اللي عطاها لزوجته الجديده ..
عروس جديده بدل لا تستمتع بالسفر والإهتمام والحُب لقت نفسها مسؤوله بشكل كامل على وحده مُعاقه ..
زوجها كان يلاطفها بالأيام الأولى لكن فجأه بدأ شوي شوي يبعد عنها ..
يتأخر ويسهر ويسافر ونادر ما يجلس معها هذا وهي وافقت تتزوجته رغم عن أهلها ..
لو فكرت تتشكى لهم ما بتلقى الرد اللي يرضيها ..
كرهت حياتها .. حست حالها خدّامه مو زوجه ..!!!
نفسيتها كُل مالها تقلب وتقلب ..
لسى هي صغيره بالعُمر وتفكيرها لسى ماهو عاقل حتى تصبر ..
في عز ضيقتها كنت دايم تصير مشاكل بسبب عمته هذه ..
تكسر لها مزهريات ..!! تعفس لها الأثاث ..!! وغير كِذا تعدم نفسها بالقذاره ..!
هالحرمه ... كانت الوحيده اللي تطلع كُل كبتها فيها ..
ما تقدر تسيطر على أعصابها ودوم تنفجر في وجهها ..
مخنوقه ولا حولها أحد ..
جت الخدامه الجديده فصارت دوم تخليها هي تهتم بهالعمه ..!!
ومع هذا الخدامه طلعت غبيه بشكل وغير كِذا حضرتها كانت تتقرف وما تحب بنفسها تدخل العمه للحمام ..
زادت المشاكل بينها وبين زوجها .. دووم تتشكى ..
لا ... مو هذه الحياه اللي تخيلتها لما وافقت على الزواج ..
مو هذه الحياه اللي المفروض تعيشها ..
هذا عقاب .. تزوجها عشان بس تخدمه هو وعمته ..
كبرت المشاكل يوم عن يوم ونفسيتها كُل مالها تصير في دمار تام ..!!
وتدمرت أضعاف لما سمعت بزواجه من الإندنوسيه هذه ..!
بعدها إختفى هو وهالزوجه وعمته وصار نادر يجيها ..!
حتى لو جاء تكون نفسيته معها شوي زفت ..
وهي بسبب نفسيتها اللي تدمرت يوم بعد يوم صار صعب عليها تتحكم في أعصابها وعشان كِذا كُل ما جاء كان يشوف بوجهه النكد والهم والمشاكل فعشان كِذا صار يقلل من جياته ..
يمكن هذا هو السبب .... ويمكن لأنه بنفسه قد شاف معاملتها القاسيه لعمته المريضه ..
حتى إنه ركب كاميرا بس عشان يقاضيها على هالمُعامله ..
كُل شيء إلا عمته .. هنا فيه خط أحمر عريض يخليه يقلب شيطان ضد كُل من يسيء لها ..
إنشغل وقتها بجية أول فرحه له بالدنيا .. بولده يحيى وشوي شوي نسي موضوع معاملة زوجته الأولى لعمته ..
ويمكن بردت السالفه فعشان كِذا قرر يحتفظ فيها لبعدين ..
لكن ... فتح بيتين بالنسبه له كثير .. وبدأت حالته الماديه تنزل عالقاع ..
لهنا حتى إقترح عليه واحد من أصحابه يشوف له وحده شبعانه فلوس ويتزوجها ..
وهذا اللي صار ..
وتمر السنوات .. زوجته الإندنوسيه كثرت طلباتها للسفر وهو يرفض لأنه يبغاها تظل تهتم بعمته ..
لكن .... هي من كُل هالضغط شافت هالعمه جبل كبير بوجهها وحمل ثقيل ..
فما كان قدامها غيرها تفرغ فيها كبتها وقهرها ..
واللي صار مع الزوجه الأولى تكرر مع الثانيه ..
وكمان تكرر في الثالثه ..
والرابعه .. كانت الوحيده اللي قدامه وأمّنها على عمته وهو ...
متأكد إنها بتكون مثل اللي قبلها ..
كِذا هم الحريم .. أنانيات حقودات وقاسيات بشكل كبير ..
يكرههم ويحقد عليهم لدرجة الرغبه في تحطيمهم بشكل مؤذي ومُتتالي ..
بس النتيجه ..... صدمته ..
هي الوحيده .... اللي كانت غير ..
وحسسته إن الحريم مو مثل بعض .. وإنها الوحيده المُميزه فقط ..!
بس ..... ماتت بع أسبوع واحد فقط من إعلانه لزوجاته بحقيقة زواجه منها ..
مافي أي شك .. وحده منهم أكيد سوتها ..
اللي بقلبها قسوه تآذي مُقعده مُسالمه مالها علاقه فيها .....
طبيعي تقتل وحده بريئه شاركتها بزوجها ..!
وبدون مُقدمات .... مر عليهم كُلهم ووجه أصابع الإتهام ناحيتهم بعدها إختفى ..
الثالثه كانت الوحيده اللي كان يزورها رغماً عن إرادته ..
الفلوس وحدها اللي أجبرته ..
سافر مكسور القلب ..
زوجته حبيبته الفريده بهالعالم ماتت ..
وعمته غادرت العالم كمان ..
وكُل الأشرطه والتسجيلات اللي من بعد موت جواهر قرر يقاضي زوجاته فيها .... إختفت ..
ولا لقى فُرصه ينتقم منهم غير بتركهم كِذا ..
بدون لا سند ولا حتى سؤال ..!!
زُجاج ..... وكسره بعنف متجاهل حقيقة إن هالزجاج ..
راح يخلف الكثير من الشظايا اللي هو مسؤول تماماً عنها ..
شظايا مُشتته بزوايا مختلفه واللي لازم تتجمع لتُعيد الزجاج لحالته السابقه ..
وإلا إلتقطتهم الحياه ورمتهم بحاوية الضياع ..