جاد : تم يا حلو انت ، خش للكوجينة وكيف فتح التلاجة
هنادي : اهلين جاد
جاد تلفت بسرعة : ءءء اهلين هنادي شنجوك
هنادي : الحمدلله وانت ؟؟
جاد : تمام الحمدلله شنجو الامتحانات معاكم ؟
هنادي : كويسة حق عندي مسائل رياضيات صعبة تقدر تشرحلي ؟
جاد : تمام عادي ايه
هنادي : تمام امتى نجيبهملك
جاد مش ناوي الخبث اما هنادي ..! : اني طالع توا بعدين توا نقريك
عائشة خشت فجأة : في شن بتقريها ؟
جاد : قالت رياضيات غدوا عندهم
عائشة : علاش الادبي عندهم رياضيات !!
هديل بضحكة : اني خشيت ادبي بش ما نقراش رياضيات شنجوك جودي
جاد : قصدك انتي ومرام تقرو ادبي وهنادي علمي ولا كيف ؟
هديل : لا نقرو..!
هنادي : تليفوني يرن
عائشة : مش مرتاحتلها البنت هادي
جاد : عادي المهم انتي توا واتية نطلعو ولا كيف ؟
عائشة : ايه هي ، هديل بنتي كان بتقرو خليكم في المربوعة بس
هديل : حاضر يام
-
سندس : ههههههه باهي يا حنة اني كملت امتحاناتي عادي نجي نبات عندك
مرام : تعالي بس غدوا عندي امتحان وجاد قاعد
سندس : قصدك جي ؟
مرام : ايه
سندس : مالا خليها غدوا احسن بش تكوني معاي
مرام : تمام اصلا الخميس مسافرة اني
سندس : وي وي وي لوين يا الحب
مرام : ههههه ما تقوليش لحد مافيش حد يعرف
سندس : باهي قولي
مرام : ماشيين اسبوعين لامريكيا
سندس : اضرب ياا جودتنا طلع مش ساهل
مرام : عههههههه هوا اني اخترته
سندس : شن قصدك
مرام : قالي اختاري ونمشو قتله لوس انجلوس
سندس : حي ع الحمارة
مرام : خيرني
سندس : راك قلتي المالديف يا بنتي
مرام : تي غالية هلبا فوتي
سندس : اهم شي مروم
مرام : عيونها
سندس : فرصة جت لعندك
مرام : مش عارفة مترددة حتى نمشي معاه بروحي
منال خشت لدار سندس فجأة وسندس كانت تقول : خليها غدوا
منال : وووه وووه شن هوا الي غدوا انتي تانية في من تكلمي
مرام : خيرها خالتي
سندس : يام نكلم في مرام خيرك انتي
منال : هاتي تراه ، خدت التليفون ، الوو
مرام : هاا خالتي خيرك شن فيه ؟
منال تلفتت لسندس : ولا شي يا بنيتي هكي وخلاص
مرام فهمت انها ماتبيش تقوللها : تمام معاش تندبي تاني حرام راه
منال تنهدت : ان شاء الله ان شاء الله
مدت الفون لسندس وشبحتلها وبعدها ضبطتها
سندس : ماما خيرك ؟ حسيت روحي بنموت !!
منال ضربتها ع راسها بالشوية : بعد عمر طويل نبي نهدرز معاك بعد تكملي مع مرام
سندس : ميرو نكلمك بعدين اني تشوقت من توا هههههه
مرام : هههه تمام سلام
-
سندس : هي نسمع
منال : يا بنتي تكلمي في واحد ؟ عندك علاقة قوليلي مش حنديرلك شي اني !
سندس : ما عنديش حد والله
منال : كان جي يوم واحد قالك نحبك طول قوليلي باهي مش حنقولك لا نبي ننصحك يا بنيتي
سندس : حاضر حنقولك بس اني مش في علاقة والله
منال خدتها في حضنها : ياريتها اختك قتلي ياريته لحقت عليها
سندس : خلاص اوينه بعد غدوا بتزفيها وتمت معش تبكي
منال : وياشينك زفة
سندس : الله غالب هذا ربك وما كتب :(
-
هنادي : مرااام
مرام : نعم
هنادي : شنجوك
مرام : تمام وانتي
هنادي : تمام بنقولك
مرام : نعم
هنادي قعمزت جنب مرام في مربوعة حوشها : نحب واحد
مرام : الله ومن هوا
هنادي : خليك توا من من هوا بس هوا مش شايفلي بكل
مرام : امممم قصدك حب من طرف واحد
هنادي : ايه قوليلي شن ندير
مرام : مرات عنده حبيبة
هنادي : متزوج بس ما يحبهاش مرته
مرام : شنووو متزوج وحاطة عينك عليه ؟
هنادي : نحبه من قبل ما يتزوجها والمشكلة ان قبل ما يتزوجها كان يحب بنت ما تحباش
مرام : هنود ما دخليش روحك في مشاكل لو كان ليك مش حيكون لغيرك ولو مش ليك وكان ركبتي للسماء ما يصير ليك هي نصيبات راه
هنادي : افففف بناخده منها هذاك هوا نحبه اني ونغار حتى عليه
مرام : ربي يهديك يا بنتي سيبي الراجب في حاله
هنادي شافتلها : هئه يا اني يا هي
مرام : استغفر الله اني طلعيني برا المشاكل بالله
هنادي : هه تمام
طلعت من المربوعة ومشت ولت لهديل وقعدو يقرو وهكذا
-
العصر ❤
هديل : هنو اني بنوض نصلي العصر
هنادي : تمام
ناضت هديل ومشت للحمام { عفاكم الله } اما هنادي ....!
-
في سيارة جاد
جاد : عيب عليك يام ما تشوفيش فيا راجل قدامك ؟
عائشة : راجل يا وليدي وسيد الرجالة لكن خلي نقيم معاك
جاد : خلاص مدامك قلتي راجل والله ماك واخدة حاجة قيمي شنطك بس حلفت قبلك راه
عائشة : يا نجيهولي يا ربي باهي حاضر مالا
جاد ضحكلها : ههههه وينجيك لينا يا غالية
-
مرام " اففففف ملل خلي نوض نكسد مع هديل " وناضت تكمت روحها ومشت
-
هديل كملت صلاتها تسمع في امها جت مشتلها
هديل : يا هلا بست الكل
عائشة : اهلين بيك
هديل : شن شريتو
عائشة : كل الي محتاجاته الكوجينة سلم وليدي ما نقص عليا حاجة
هديل : اني فهمت عليك انك تلقحي
عائشة : باهي صار منك وقعدتي تفهمي
هديل : شكراً يا دنيا
عائشة : ههههه روحت هنادي مالا ؟
هديل : لا قاعدة غر كنت نصلي خلي نمشي نكمل قرايتي ونشوفك غدوا بعد ما نكمل
عائشة : امشي ان شاء الله بالشهادات العليا ❤
هديل سمعتها وعلت صوتها : اميييين
خشت للدار ما لقتش هنادي ..!
-
مرام كانت شادة فونها وشوية تسمع في صوت بنت تتجدا وتبكي
-
هنادي تبكي : اني نحبك يا جاد اني نحبك من قبل ما تعرف مرام حتى
جاد بتردد : هنادي انتي اختي اما مرام هادي مرتي
هنادي : اصلا انت ما تحبهاش ولا هي تحبك انتو اصلا متزوجين بالغصب
جاد : هنادي احترمي نفسك
هنادي : كذب كلامي ؟
جاد : ايه كذب اني مشيت خطبتها بإرادتي وهي وافقت بإرادتها وهي مرتي بمعنى الكلمة وحتكون ام صغاري وما حد حياخد مكانها انتي اختي وصاحبة مرتي غير هكي ما تكونيليش شي
هنادي : معقولة ؟؟
جاد : ايه وكانك مش مصدقة اسأليها
هنادي : جودي نعرف انك تحبني وتقولي هكي فوق من قلبك يعني اني احلى منها واذكى منها وهي ولا حاجة قدامي
جاد : لكن هي كل حاجة في عيوني خلاص انهي النقاش معش تجي جيهتي
وفجأة شرين فون مرام هنادي انخلعت بس جاد ما عدلش لان هوا ما قالش حاجة غلط
هنادي بتوتر : مرام ؟؟
موبايل مرام يشرين مزال بس هي تشبح مصدومة
جاد : ميرو تليفونك يشرين
مرام ولا حرف تشبح وبس
جاد تقدملها وضبطها قدام هنادي عمداً
هنادي : حبيبي !!
مرام دفت جاد ومشت بسرعة قدام هنادي وشادة دمعتها : وثقت فيك !! دخلتك حوشي !! بيتك ع فراشي !! هذا جميلك ؟؟ بتدمريلي حوشي جميلك ؟؟
هنادي : انتي دمرتيلي حياتي اصلا
مرام : شن دنبي اني ؟؟ انتي ما قلتيليش باش نكون خنتك !! هنادي معش نبيك تخشيلي حوش تمام واقطعي علاقتي بيك لا عاد نعرفك ولا تعرفيني
هنادي : وبينك وبين نفسك تقولي المهم خديت حبيبك وامشي بعيد عليا
جاد بعصبية : خلااااص
مرام تلفتتله وهنادي تشبحله
جاد : خلاص هنادي كلمي حد من خوتك يجي يروح بيك حتى هديل اقطعيها وانتي خشي للحوش
مرام : حاضر
هنادي مشت بتاخد دبشها وخشت ع هديل في الدار
هديل : وين كنتي ؟
هنادي : معش تكلميني
هديل : خيرك ؟
هنادي : انتي كنتي تعرفي
هديل : بشنو
هنادي : كنتي تعرفي ان اني نحب خوك وكنت نتمنى ينفصل ع اسراء { حبيبته الاولى } بش نقدر نتقرب منه لكن شنو ؟؟؟
هديل : انتي قلتي تحبي جهاد
هنادي : ايه مش هذا اسمه جاد او جهاد
هديل : عندي خوت واحد جاد وواحد جهاد
هنادي : قصدك !!
هديل : اني كنت نضمنلك في جهاد طول عمري واصلا حتى هوا يحبك لكن بينك
هنادي : قصدك جهاد يحبني قصدك في حد في الدنيا يحبني ؟؟
هديل : ايه لكن بينك ع كيفك يعني
هنادي : خوك لزني توا
هديل : خلاص ننصحك روحي مش حيعجبك عصبيته
هنادي : بس اني نحب جاد
هديل : هناااادي جاد متزوج صاحبتك رااه
هنادي : صاحبتي متزوجة حبيبي
هديل : مش حبيبك هوا وانتي اصلا ما كنتيش تحكيلها
هنادي : اصلا معش تكلم فيا
هديل : شن فاتني ؟
هنادي : سمعتني نعترف لجاد
هديل : شن شن شن درتي ؟؟
هنادي :..
-
أنت تقرأ
طفلة ولكن ...
قصص عامةكنت مجرد طفلة ! فأصبحت عروس ، مشقة الطريق للوصول للاطمئنان كان طويلاً. لقد كانت العوائق في طريقي هي نصف العائلة. ولكنني نجوت ♥️
