طفلة ولكن ...

22

ع المغرب 🌄
-
رجع جاد للحوش وكان تاعب هلبا لوح روحه ع الصالون خداته نومة تقيلة في الدار الي مسكر عليها بالمفتاح كانت مقعمزة ع السرير وتشهق من البكي وفجأة هرب الضي مرام نوعها خوافةة نطت من سريرها بتفتح الباب مسكر بالمفتاح من برا رجعت لسريرها وخايفةة وبدت تبكي تاني
-
هاجر : انت الي خنتني راه
راجلها : ع خاطر ولدك ارجعي
هاجر : لا ولدي نربيه بروحي عادي
راجلها : راك تندمي بعدين !
هاجر : مش حنندم ومانيش راجعة خلاص
راجلها : تمام بما إنك هكي إنتِ طالق
هاجر حست زي الي حد صب عليها تلج
راجلها : سلام
سكر في وجهها ومزالت في الصدمة ناضت مصدومة لمكانها لقت ان ماليها مخليين دارها زي ما هي وسريرها وحاجاتها كلهم في مكانهم ومشت لامها
هاجر بصدمة : امي
عائشة : هييي هالبلاد الغبرة يا بنيتي ما يعرفو كان يهربو علينا الضي
هاجر بلعت ريقها : بنقولك حاجة
عائشة : قولي
هاجر : حوشك مزال مفتوح ليا ؟؟
عائشة : اكيد لكن علاش الكلام هذا
هاجر ابتسمت : يعني لو قتلك ان بنرجع نعيش معاكم بتستقبليني ؟
عائشة : تيما ترعشينيش يا بنت ادوي
هاجر بغصة خانقتها : خانني وانا معش بنوليله
عائشة : حيييييي علينا خيره هذا في شن قصرتي حتى انتِ
هاجر بدت تبكي : ياام انتي عارفة ماهو الرجالة ما يملا عينهم كان التراب
عائشة : اخخخ يا كبيدتي باهي يا بنتي هذا مش مشكلة لكن الولد يقعد بروحه ؟
هاجر كانت متكية في حجر امها وتبكي ناضت : لا علاش اني قاعدة وخوتي قاعدين انتي قاعدة علاش يقعد بروحه
عائشة : مش هذا قصدي يا كبيدتي قصدي يقعد بلا بو
هاجر : تبي حفيدك يربيه واحد يخون في مرته ولا كيف ؟
عائشة تنهدت : ااه يا بنيتي امشي اركبي تريحي في دارك وغدوا يجيبو حاجاتك من حوشه وارجعي عيشي معانا كملي قرايتك جنبي وجنب خوتك ومعش تفكري في الباقي بإذن الله الحي يعيش ولدك معانا اهني بيناتنا واحسن
هاجر مسحت دموعها وباست راس امها : حقق اني لو ما جيتوش عيلتي مش عارفة شن صار فيا
عائشة ضمتها لحضنها : فلذة كبدي من ليها غيري ومن ليا غيرها ما تحيريش تعيشي حياتك معززة مكرمة عندي احسن بهلبا
هاجر : ربي يخليك لينا يا احلى عويشة خلي نركب نرقد لاني صدعت ❤️
عائشة : تعالي اسنديني بنركب نرقد حتى اني
هاجر جت سندتها ورقدو
-
بعد ما رقدو الناس الكل تقريباً الساعة اربعة ونص مازال ما جاش الضي مرام جيعانة وعطشانة مشت للباب قعدت تحاول طقطق لعل وعسى حد يسمعها بس مافيش فايدة طقطقت حاولت وكانت تبكي بصوت عالي لين ساخت تلوحت ع الارض
-
الصبح 🌆
-
بدت شركة الاولاد في العمل اليوم الاول ليهم
ناضو خولة وايمن
ايمن وهوا واقف ع المراية يساوي في شعره : ديريلنا بازين ع الغدي اليوم
خولة : حاضر
ايمن : مانبيش نروح نلقا الدنيا مقلوبة
خولة : حاضر
ايمن : انزلي ديري الفطور قبل ما ينوضو
خولة : حاضر
نزلت دارتلهم فطور وفطرو بعدها طلعو ضمت وكملت كل شي وحطت الغدي ع النار وقعمزت شدت تليفونها وفتحت رسايلها لامها الي معش ردت عليها بكل الي تجدتها ودارت كل شي بش تسامحها ما سامحتهاش وهي كيف بتكتب رسالة طقطق الباب ناضت فتحت الباب
خولة : اهلا اهلا خشي
....: اهلا بيك بس قبل كل شي تم كل شي
خولة : هههههه خلي يحسها في كبدته شوية
.....: ايه واصلا انا نبي وغمزتلها
خولة : هههه خشي خشي
-
في حوش تاني مرام ما زالت طايحة ع الارض ع طولها كيف ناض من النوم متشكل مشي غسل وجهه وفطر وتفكرها مشي فتح الباب بس ما قدرش يفتح لانه كان في حد شاد من ورا دف دف زاد ودف بالقوة وإذ بـ مرام ع الارض نخلع ونزل ينوض فيها ما بتش تنوض مشي فتح السيارة بسرعة ومشي قامها ومشو للمستشفى
-
في حوش طارق
أميرة : نبي نقولك
طارق : نعمين
أميرة : طارق شوف البنات يقرو واني ديما مكسدة الصبح نقعد بروحي شن رايك نخدم معاكم في الشركة نساعدكم بس ونمشي وقت نكون فاضية
طارق : فكككرةةة
أميرة فرحت : جدد ؟؟
طارق : خيرك انتي تقول مانعك من الخدمة عادي تبي تخدمي اخدمي
أميرة : جد تدوي ؟؟
طارق : والله العظيم واساسا احني ندورو في محامي للشركةة شن رايك ؟
أميرة : درت شيب وطلعت من القانون وتقولي شن رايك
طارق : هههههه خلاص مالا وتي روحك نمشو نقدمو شهادتك للدولة وبعدها نخصصولك مكتب جنبي في الشركة
أميرة : ههههه تم دقايق بس
طارق : ههههه بسرعة هي
-
في حوش سندس
-
سندس : ماما !
منال : نعم ؟
سندس قعمزت ع الطاولة متاع الكوجينة : استاحشت خولـ..
منال : مانبيش نسمع اسمها حتى
سندس : بس يا ماما ما يجيش هكي
منال : سندس كلمتي وقلتها مانبيش نسمع اسمها لو هي تحبنا كانت دارتلنا الف حساب خلي تحب لكن مش { تنهدت } مانبيش ندوي خليني في حالي ارجوك
سندس : باهي حاضر
-
في المستشفى 🏥
-
طلعت الدكتورة مبتسمة
جاد حاط يده ع قلبه : ها دكتوره فيها حاجة ؟؟
الكتورة : صارلها هبوط بس مع هذا فيه بشارة
جاد استغرب : شنو هي ؟
الدكتورة : مبروك عليكم مرتك حامل 😊😍
جاد نصدم بس جامل الدكتورة : الله يبارك فيك نقدر نشوفها ؟
الدكتورة : هي راقدة توا بس تقدر تقعد جنبها ايه
جاد : تمام شكرا دكتورة
الدكتورة : العفو والحمدلله ع سلامتها من جديد
جاد : الله يسلمك شكرا
خش جاد لقاها راقدة قعمز ع الصالون ويراجي فيها
-
في حوش ام جاد ❤️
-
ناضت هاجر طلعت للجنان لقت ساكوات كبار حاطينهم في الجنان استغربت مشت بتشوفهم لقت ورقة مكتوب فيها { جبتيه الطلاق لروحك ومشيت خطبت بنت تانية وانتي اقعدي تحسري يا #هاجر ههههه } تنفست هاجر وعفست ع قلبها نادت ع جهاد الي كان مقعمز جنب امه يهدرز عليها
هاجر من الجنان : جهااد
جهاد : ايوا ؟؟
هاجر : تعال شوية
عائشة : نوض شوف اختك
جهاد : هيا هي نايض ، جاي اهو
هاجر تحاول تكر الشناطي داخل
جهاد : خلي خلي توا نقيمهم اني
هاجر : سلم خوي ياربي
جهاد وهوا يقيم فيهم : خيرك تقول حاطة فيهم قنابل
هاجر : قنابل شنو وقف وقف
طبيت فتحت الشنطة لقت فيها حوايج
هاجر : اسسمعع قيم فوق مافيهاش لا قنابل لا شي
جهاد : تي تقول بتحولي عندنا
هاجر بغصة : ايه بنحول عندكم فيه مانع ؟
جهاد : علاش مدايرينلك راجل مالا
هاجر حستها رزينة ع قلبها : غر قيم انت ما خصكش في الباقي
جهاد : باهي وانتي تنقي
ركبهم جهاد وطلع وفتحت هاجر الشناطي وبدت تساوي في دواليبها وترد كل شي وكذا
-
الفجر 🎀
ناضت وكانت دايخة وراسها يوجع مزال وهي تشوف للسقف حست انها مش في حوشها تلفتت يمين لقت جاد راقد ع الصالون شافت ليدها لقت يبرة وفيه تغدية وكيس دم ارتعبت شوي حولت البطانية وكانت رح تنوض للحمام { عفاكم الله } نحت اليباري ووقفت خشت وطلعت وبدت الدنيا تسواد في عيونها حاولت انها تسند روحها ع حاجة بس قبل لا تسند طاحت تاني ولما طاحت دفت طاسة مرش طاحت تكسرت نخلع جاد لقاها طايحة ناض يجري قامها للسرير وبعدها طلب المناوبة وجت رجعتلها التغدية والدم وقاست ضغطها
الممرضة : هي لازم ما تنوضش من مكانها لين تاكل
جاد : اني خداني النوم ما نندريش عليها امتى ناضت لما طاحت دفت الطاسة تكسرت خلعت بس ما نندريش ع شي اني
الممرضة : اوك تمام اني حنكلم الخدم يجو ينظفوها بس ياريت تخليك مراقبها ما تنوضش من سريرها لين تاكل
جاد : اوك بارك الله فيك
الممرضة : من واجبي
-
بعد ساعتين
-
فتحت مرام عيونها وكان جاد يشرب في قهوة ويفطر ما انتبهلهاش شافت الماكلة وجي في خاطرها وقعدت تبي تتكلم بس كلامها مقطع وصوتها واطي بسبب التعب
مرام : ص ص صببااحح الخخيير
جاد قام راسه : صباح الورد نضتي
مرام هزت براسها بمعنى ايه : وجججييعاننة
جاد : ايه ايه شريتلك بريوش بالشكلاطة وهذا عصير طبيعي قالت الدكتورة اول ما تنوضي ضروري ما تاكلي شريتهملك
مرام : شششكراا تعببت رووحكك
جاد جاب كرسي وقعمز : شوفي ما تخافيش تمام ؟
مرام : بباهي !
جاد : إنتِ حامل !!
مرام فتحت عيونها وابتسمت : جد ؟
جاد : ايه 😄
مرام شدت يده : وخيرك مش فرحان ؟
جاد نزل راسه :....
-
#يتبع