طفلة ولكن ...

15

المجهول : كيف بنوصل فيها توا هادي ؟
.....: نراقبوهم
المجهول : كيف ؟
.....: تعال نقولك
-
مرام : هيا نروحو ؟
جاد : ما عجبكش الجو ؟
مرام : لا غر البنات يراجو وخوك بنكملو داره اليوم
جاد : اممممم باهي نوضي هي
مرام ناضت من ع الشط وضحكتله سكرو الكوخ وروحو لقو هديل نايضة وسندس راقدة
هديل : طيب فيكم جيتو اني امي بتقتلني ع دار خوي
مرام : يلا عادي نضموها توا
هديل : تمام هي اني سبقتك
مرام : جاية وراك هي
جاد : بيجي جهاد بيقلبها طول ههههههه
مرام : احني نديرو واجبنا وما دخلناش في الباقي
جاد : ايه صح كلامك هههههه اني شوية وماشيله
مرام : امباهي رد بالك ع روحك
جاد : حاضر اي امر تاني ؟
مرام : ياسرك
جاد : هههههههههه
مرام : تراجينيش بعدين
جاد : علاش ؟
مرام : بايتة مع هديل
جاد : وسندس ؟؟
مرام : ناضت مشت لدار هديل غادي
جاد : باهي تمام
-
هديل بدت في الدار جتها مرام وكملو وطلع جاد للمطار وكلهم راقدين عدا هادو الاربعة
هديل طاحت ع ظهرها : يا ماما
مرام لحقتها : اسم الله عليك خيرك
هديل بدت تبكي بصوت واطي : ظهري
مرام : ياربي نوضي بالشوية عليك
هديل : تمام
نوضتها بالشوية لدارها ورقدت وقعدت مرام تضم بروحها
-
نسبقو الأحداث فات الوقت ومرام مازالت تضم وكانت حاطة سماعات لا باب الحوش سمعاته ولا قاراج حوشها
-
جاد : باهي تصبح ع خير نتلاقو غدوا
جهاد : وانت من اهل الخير
خش جهاد للحوش وركب لداره سكر الباب وتلفت ع باله هديل
جهاد : دودي
مرام حست فيه صوت من غير الاغاني بس تسحاب روحها تتوهم ما دارتش اعتبار
جهاد : يا هدولة
مرام تلفتت ونطت من الخلعة نحت السماعات : ءءء جـ جـ جهاد؟؟
جهاد نصدم : مرام ؟
مرام : ءءء حمدلله ع سلامتك هههه 😅
جهاد : الله يسلمك " نعترف توا ؟؟ ولا نخليها "
مرام : باهي اني كنت نضم في دارك وكملتها اصلا ، خود راحتك توا تصبح ع خير
جهاد بدون ما يحس بروحه : علاش هكي اديري فيا ؟
مرام : فهمتش ؟؟
جهاد : مدامك تحبيني علاش تزوجتي خوي
مرام فتحت عيونها
جهاد : تزوجتيه بش تحرقيني
مرام : جهـ..
جهاد سكرلها فمها : ولا حرف حتطلقي منه واني مستعد ناخدك من غدوا عادي
مرام زي الي حد طعنها في قلبها لكن استقوت عليه ودفاته : من قال نحبك ؟؟
جهاد : واضح تحبيني وانك تكوني في داري وقت اني مروح مش صدفة
مرام بصدمة : لالالا تفهمش غلط اني وهديل كنا نضمو هي طاحـ...
جهاد سكرلها فمها تاني : اسسس ولا حاجة اسسسس ما تكذبيش ع روحك
مرام نزلو دموعها وقلبها ينادي يا جاد
جهاد : نخلوه بيناتنا تمام
رخي ايده شوية
مرام بدهش : شن هوا
جهاد : الي بيصير توا
مرام : لالالالالالا مستحيل لا حول لا جاااد هديل سنددددس يا مامااااا
-
جاد مشناه السرير من غيرها خلي نمشيلهم بلكي نايضة ناض ولبس شبشبه وطلع
-
مرام : لااا حوووول حووول
جاد خش للكوجينة ولقي عشي محطوط كيف بيقعمز حس فيه صوت مش طبيعي ناض وكل ما يركب درجة يقرب الصوت ويقرب لين فتح الباب
مرام : اططططلللقققنييييي
جاد 😡😡 : جههههاااد
جهاد اخلع وتلفت للباب : ج ج ج جاد ؟؟
مرام رخاها ناضت تجري ورا جاد
جاد خلاها وراه وقعد مفنص في خوه
جهاد : اني نحبها وهي تحـ..
مرام : لالا مانحبكش ولا عمري حتى فكرت اني نحب جاد وطول عمري حنقعد نحبه هوا بس
بدت تبكي وشادة في بدي متاع جاد
جاد ولا حركة واقف عاطي ايده للورا كأنه يحمي في مرته دقايق وسكر الباب وضبطها وروح بيها
جهاد بخوووف : يا ويليييي
-
مرام ترعش ع بعضها قعمزت ع سريرهم
جاد خش للحمام { عفاكم الله } وطلع لقاها نفس الوضعية
مرام شافاته : والله ما درت حاجة اني قتله ابعد بس ما باش والله هوا الي ...
جاد : شششش
نهارت مرام وهوا مضبطها وقعدت تبكي وخلاص جاد قاعد مصدوم هوا مصدق مرته بس مش مصدق خوه الي من لحمه ودمه مرام بعد بكي هلبا خداها النوم وكذلك جاد اما جهاد كل الي في راسه كلام مرام < لالا ما نحبكش ولا عمري حتى فكرت اني نحب جاد وطول عمري حنقعد نحبه هوا بس >
-
يوم الخميس 🏙 الصبح
-
عائشة خشت بتساوي دار جهاد لقاته راقد ع السرير زغرتت : روروروروروري وليدي روحلي
جهاد سمع التزغريته بس في حلمه
{ واقف وجنبه مرام عروسة وامه تزغرت }
عائشة نوضاته : جهاد جهاد
في الحلم { يسمع في جاد ينادي في اسمه خاف ناض خلع }
عائشة : اسم الله الرحمن الرحيم خيرك يا ضناي شن فيه
جهاد لقي امه وحس انه مستاحشها ضبطها طول : استاحشتك يا الغالية
عائشة : اخخخ يا وليدي اني الي استاحشتك
جهاد باس راسها وايدها : كيف حالك شن دايرة
عائشة : الحمدلله انت شن حالك
جهاد نزل راسه : الحمدلله الحمدلله خليني نوض ندوش وهكي لبين لا ناضو الباقي
عائشة : تمام خود راحتك
خش بيدوش وهي طلعت
-
واقف ع الروشن يتذكر
< جهاد : اني نحبها وهي تحـ..
مرام : لالا نحبكش ولا عمري حتى فكرت اني نحب جاد وطول عمري حنقعد نحبه هوا بس >
مرام تحلم بس تكلمت وجاد سمعها
{ ماما ؟؟ ماما علاش ما خديتينيش معاك ؟؟ اني تعبانة يا ماما روحي تبي تطلع بس مش قادرة انقديني وخوديني ليك يا ماما خوديني ليك ياماما }
اتكا جاد فوق راسها وقعد يمسح ع راسه وتكلم بصوت واطي : بعيد السوء واني لمن تخليني بعدين ؟؟ هاا قولي لامك تخليك ليا اني توا نحميك واسندي عليا ظهرك مش حنطيح خليك جنبي بس
مرام لما سمعاته ناضت بس ما فتحتش عيونها : بس تعبت
جاد : اني جنبك
مرام : وعد ؟؟
جاد : وعد
مرام فتحت عيونها وضبطاته طول : ربي يحفظك ليا
جاد : ويخليك ليا ❤ ولي ارقدي ارتاحي وبعدين نوتو رواحنا طيارتنا ع العصر فنطلعو من اهني بكري نضهورو شوية بعدين نمشو للمطار
مرام : تمام
-
أميرة ناضت الصبح وقعدت تتفكر في الكلام
الي قالتهولها المجهول وبدت تبكي " حرام عليكم والله حرام "
-
نسبقو الاحداث للساعة 11 الصبح
-
هديل في سابع حلمة مزالت بس سندس ناضت وشافت لفونها معبي مسجات من موعا # إسماعيل ( بنختصره من اليوم الاسم تمام )
[ وين رحتي يا بنت ، شكلك رقدتي ، اممممم ، معناها تصبحي ع خير ❤ ، صباح الورد يا ورد ]
ابتسمت ابتسامة عريضة وردت [ صباحك سندس 😍😂 ]
انبعت بس موعا نته مسكر ناضت ومشت لحوش مرام بدون ما حد ينتبهلها وخشت للحوش لقت جاد يفطر
سندس : صبااحوو
جاد : صباح الورد
سندس : كيف الحال
جاد : الحمدلله وانتي
سندس بإبتسامة عريضة : تمام بخير الحمدلله
جاد ما باش يعكرلها جوها ضحك : دووم مش يوم
سندس : ههههههههههههه
سمعت فونها صوت رسالة جتها نطت قاماته
سندس : عن اذنك
جاد : يا لطيف ههههههه
سندس عيونها قلوب قلوب تفتح الرسالة [ الليبيانا باعته مسج ] سندس تنحت منها الضحكة وشافها جاد كيف انعبست فجأة
جاد : هههههههه شكلها الرسالة ما تفتحش النفس
سندس : توقعتها من حد لكن طلعت الليبيانا سيبو اليوم كله وجوني ع صباحات ربي
جاد : ههههههههههه لعبو بمشاعرك
سندس شبحتله : طلعت تفهم والله
جاد : نعجبك ايه هههههه
سندس : ههههههههه البنت الي عندك ما تفهم في شي
مرام وهي نازلة في الدروج : امتى ما فهمت شي يا خاينة
سندس : اوووبسييي جاد رقعهالنا بالله
جاد : ههههههههههه { تلفت لمرام } صباح الورد
مرام : صباح النور
جاد : كيف حالك اليوم
مرام غمضت عيونها بحسرة : الحمدلله
سندس حست الامر خصوصي نسحبت مشت للمربوعة
جاد : انسي الي صار
مرام : حاضر
جاد : يحضرلك الخير
وضبطها بالقوة
-
عائشة خشت ع هديل لقتها راقدة طبعاً تعرفوه نقان الأمهات كيف انتو فتحت البرسيانات والرواشن وبدت تنوض بصوت عالي
هديل راقدة
عائشة : هدييييل
هديل راقدة
عائشة : نوضي يا فرخة
هدييل بصوت تعبان : ماما
عائشة : نوضي بالك
هديل : ضهري
عائشة : مافيك شي نوضي وتي الفطور خوك روح
هديل : ماما ضهري والله
عائشة : ....
-