طفلة ولكن ...

20

مرام تبكي بس ناضت ومشو للغرفة وقعدو يستنو لين ركبو الطيارة جاد متعفلق وكان الكراسي مش جنب بعض جاد كان قدامها بتلات مقاعد واما هي كانت التالي وجنب الروشن فتحت الروشن وكملت بكي بس بدون صوت دموع بس " أمي يا أمي أني شن درت بش الناس يقسو عليا هكي أني يا أمي ما نكرهكش أني نكره الحياة الي مافيهاش إنتِ اني ما نعرفكش لكن اني نعرف انك انت طيبة وحنينة ولو كنتي معاي كنتي حتحبيني 😞 الله يرحمك يا غالية "
وطارت الطيارة بعد تمانية ساعات وكان قريب الفجر في ليبيا وصلت الطايرة 💔
جاد خدي سيارته من البركيدجو متاع المطار وروحو وصلو للحوش خشت مرام وكانت تعبانة بدلت وكملت وهي قدام المراية تساوي في شعرها خش جاد
جاد بعصبية : هاتي التليفون
مرام بخلعة : بسم الله خيرك
جاد : وين تليفونك ؟؟
مرام : في الشنطة خيرك ؟؟
جاد : خدي التليفون وطلع وسكر الباب بالمفتاح
مرام بصدمة : شنوو ؟؟
جاد مشي للصالة ورقد غادي وقعد يراجي في تليفونها يشريين
-
تاني يوم الصبح
جهاد : اني طالع يا يام تبي حاجة ؟
هند طلعت تجري : اني نبييي
جهاد : شن تبي ؟
هند : جهاد وراس جهاد جيبلي بكلاوة وانت مروح بالله عليك
جهاد : باهي ان شاء الله
هند : بااهي ايااامك يا غزالنا
جهاد ابتسم وتلفت لهاجر وكانت منكدة وقالبة وجهها : وانتي تبي حاجة ؟؟
هاجر سارحة غادي مش معاه بكل
جاها قدامها وصفق في وجهها نطت من الخلعة
جهاد : خيرك لين تلات ايام مش ع بعضك
هاجر : لا شي
جهاد : باهي تبي حاجة نجيبلك معاي ؟
هاجر : لا شكراً
جهاد : اممم عفواً { تلفت ماشي للباب } هي اني مشيت مالا
خش جاد لجنانهم : صباح الخير
تلفتو كلهم انخلعو
هديل : جاد ؟؟؟
جاد : شنو ؟
هديل : لا شي صباح النور
عائشة : امتى جيتو ؟
جاد : امس في الليل
هند : اسم الله ما قعدتوش حتى اسبوع
جاد : مرام تضايقت جينا
هديل : اشييي شن عاجبها في ليبيا بالله
جاد : يلا عادي مش مرحب بينا ولا كيف ؟
عائشة : لاا مرحبتين وقوللها ما تطيبش تعالو تغدو اهني
جاد : لالا اني طالع قوليلها هي كان تبي
عائشة : وانت لوين ؟
جاد : عندي وين نمشي
عائشة : باهي بالسلامة
جاد شاف لجهاد وما عبراش تلفت لهاجر كانت سارحة من جديد : وخيرها هادي ؟
هند : اشبح خيرها سارحة في عالم تاني من لما جت
جاد : هاجر ؟ هاااجر
هاجر : ها ها نعم ؟
جاد : خيرك ؟؟
هاجر : ولا حاجة مريضة بس مرام نايضة ؟
جاد : خليتها راقدة لكن اكيدة ناضت شوفيها اوينه
هاجر : تمام اني ماشية مالا
هديل : جاية معاك
هاجر : لا ما تجيش نبي البنت بروحها
عائشة : في شنو تبيها ؟
هاجر : علاش قتلكم نبيها بروحها ؟؟
جهاد : قوليلها كان تبي حاجة قوليـ...
جاد : ما تبي شي
جهاد : قلت هكي يعني كان جي خاطرهـ..
جاد : ما خاطرها في شي
هاجر : اني مشيت
عائشة : ياساتر الي يسمع يقول هذا مش متجوز
جاد شاف لجهاد نظرة استحقار : تمام طالع اني
عائشة طريق السلامة
-
فتحت عيونها وتشوف للسقف شوية شرين الحوش شافت للباب ناضت فتحت لقاته مفتوح بينما امس مسكر بالمفتاح نزلت فتحت الباب لقتها هاجر
هاجر : عادي نرقد معاك ؟
مرام تنهدت : عادي
خشت هاجر وتكت ع السرير اما مرام خشت توضت وصلت ومشت تكت جنب هاجر
مرام : وانتي همك اكبر من همي
هاجر : وانتي شن صارلك تاني
مرام تنهدت : يشك فيا نخون فيه
هاجر : ايه وانتي ما تخونيش يعني وقت بيكتشف الحقيقة بيلقاك ما تخونيش وتعيشو ايام حلوة
مرام : شكلك شكوكك في مكانها
هاجر : كان يقوللها مليت من مرتي
مرام : هه وخيرك تطلبيش الطلاق ؟
هاجر : الولد الي في بطني ما يهونش عليا نخليها من غير اب
مرام : من غير اب لكن مع خواله وحيقعدوله تقول بوه مش خواله
هاجر : خايفة من ردة فعل امي وخوتي
مرام : ما اعتقدش انه امك ولا خوتك حيلزوك لانهم اصلا يحبوك يعني هاليومين بايتة عندهم ما قالولكش امتى بتروحي
هاجر ابتسمت : وجهاد توا قالي تبي حاجة نجيبلك معاي
مرام : شفتي خوتك قداش يحبوك ؟
هاجر : قتله اني تعبت اهني نبي نمشي لحوش امي نرتاح وجابني ع طول من يوم جابني لا سأل لا شي
مرام : اخخخخ والله ما يستاهلك اطلقي احسن
هاجر : وكلام الناس ؟؟
مرام : كلام الناس خليه للناس انتي هادي حياتك مستقبلك هادي نفسيتك مش عدل تقعدي معاك بش ترضي الناس والناس اصلا حيدوو عليك بعد يتمادى والناس تعرف حيقولو اشبح تلقيها منقصة عليه وهوا ما قدرش يقعد معاها بروحها اما بعد تطلقي حيقولو اشبح شن دارت من عملة طلقها وخلاها هي وولدها في حوش امها هما مش حيعرفو الحقيقة مهما درتي
هاجر : خايفة ع امي وخوتي ما يستقبلونيش
مرام فتحت عيونها بصدمة وناضت قعمزت وقابلتها : كيف ما يستقبلوكش بينما انتي تجيهم وقت ما قلبك يتعبى تجيهم لما تتعبي ويرحبو بيك وحاطينك في عيونهم اني شن تقولي عليا بوي بايعني ؟؟ بوي ما يندريش عليا حية ولا ميته ولا خوتي تعرفي حالفين عليا ما عاد نخطي خطوة للحوش تاني يعني ما نعباش نجيهم مطلقة اني الي بتتحمل لو خاني جاد اني الي بتتحمل لو ضربني اني الي بتعيش مع مأساتها لان في كل الاحوال مش عايشة اني ميتة اني ميتة مانيش حية نفسيا راني جثة تتكلم قلبي ميت عندي خوي الكبير يحبني اوك هوا يستقبلني عنده لكن اني بنتحشم هذا متزوج وبناته صغار هلبا ومرته تبي ترتاح في حوشها ما نقدرش نمشي نسكن عندهم ونولي حمل ثقيل عليهم مش انتي انتي عادي اني نستقبلك حوش خوك والحوش كبير وخوك يخدم بالاسابيع تعالي اقعدي معاي عادي بس ما تدمريش نفسيتك حرااام والله
هاجر نزلت دموعها : يعني كلامك نقول لجاد ؟
مرام : قولي وعيونك مغمضة توا تشوفي يخي مش حتهوني ويمشو يعطوه طريحة وانتي في عز شبابك مزال الف من يتمناك يجو ويعاودو يخطبو وتعيشي حياتك مع الباهي
هاجر : يا سعد هند اختي
مرام : لا عادي توا يجيك الي تقعدي في كل مشية وجية تاكلي غير في العسل زي اختك انتي لازم تنهي كل شي من البداية قبل لا تتطور الحكاية
هاجر : ان شاء الله
مرام : خلي نبدل ونمشو لامك استاحشتكم
هاجر : باهي هي
ناضت بدلت ومشو لحوش ام جاد
-
اميرة مقعمزة تاكل خش عليها طارق
طارق : صباح الخير
اميرة : صباح النور
طارق : صحتين
اميرة : سلمك
طارق : خيرها مرتي ؟
اميرة : لا شي عادي
طارق : امممم باهي الشركة قالت حصلت حد تاني
اميرة : يعني ؟
طارق : بنبدو من الصفر
اميرة : وبتحاربو بوكم ؟
طارق : لو حد حيحارب هوا بوي اني ما نحاربش في حد
اميرة : ربي يكون معاكم يارب
طارق : امين ، خلي نمشي نكلم الاولاد ونقوللهم
اميرة : ايه تمام
-
في حوش ام جاد
خشت مرام قابلتها هديل : معقولة يا حمارة تقلقي وتبي تروحي وجاد قالك باهي طول جيتو تي انتي امتى مشيتي بش تقلقي
مرام عرفت ان جاد قايل انها قالقة : يلا البلاد تقعد ديما بلادي
هديل : ريت هالبلاد بالله خاشة في ستين حيط
مرام تنهدت : الحمدلله ع كل حال
هاجر : مش ناوية تسيبي البنت تخش ؟
هديل : اسم الله عليا خاشات منكدات انتو الزوز خليني نمشي نطير اني رايقة الحمدلله
هاجر : باهي اقلبي هي
خشو البنات للصالة لقو هند ترقد في ولدها وامهم دايرة عالة شاهي ويتفرجو
مرام وهاجر : السلام عليكم
هند وامها : وع السلام
عائشة #ام جاد : اهلا اهلا يا بنيتي كيف حالك حمدلله ع سلامتك
مرام : الله يسلمك يا ميمة الحمدلله وانتي
عائشة : الحمدلله خشي خشي قعمزي
مرام جت جنب هند سلمت عليها
مرام : اعطيهولي شوية استاحشته
هند : خودي ها نبي نشوف الغدي بالله كان عندك جهد رقديه
مرام : تمام حاضر
بدت تلعب فيه وتبوس فيه
عائشة مبتسمة : نشوفوه عندكم ياربي
مرام حست بغصة في قلبها وردت فوق من قلبها : ان شاء الله يا ميمة
هند من الكوجينة : يام عندكش سلاطة ؟
عائشة : لالا تمت ابعتي هديل تجيب ولا كلمي جهاد
ع خشت جهاد : خيره جهاد
هاجر : اذكر القط يجيك ينط
مرام : هههههه والله جديات
جهاد اول ما سمع صوتها عيونه ولو قلوب " يا ويل قلبي الحب قاعدة عندنا " : اهلا اهلا عاش من شافك مرت خوي
مرام مبعدة عيونها ومخليتهم مع ولد هند :...