Bachelor's Pad series book 13: THE MYSTERIOUS HEIR

Part 50

Isang linggo na mula nang huli sila magkita ng dalaga. Bukod sa siniguro niyang nasa loob siya ng Bachelor's Pad para may nakakausap si Montes ay kinailangan din niya tapusin ang maintenance security na ginagawa niya para sa Empress Bank at iba pang kompanya na nasa ilalim ng St. Clair Holdings International.

Kahapon hindi na talaga niya natiis at nagbihis na para lumabas at puntahan si Allen. Kaso naglalakad pa lang siya sa ground floor hallway ay tumawag na sa cellphone niya ang kanyang adoptive mother, sinasabing paalis na ang eroplano nito papunta ng Manila. Mahigpit na utos nito na dapat naka-standby siya kasi kapag tumawag ito kailangan magkita sila agad. Ganoon ka-tight ang schedule nito. Kaya hindi natuloy ang balak niyang paglabas.

"Balak mo ba talagang sabihin kay Matilda ang tungkol kay Allen? I don't think it's a good idea, though. Overprotective sa'yo ang nanay mo at marami siyang plano para sa'yo. Hindi na ako magtataka kung pati mapapangasawa mo planado na niya kung sino."

Mariing tumiim ang mga labi ni Maki. "I owe her a lot but I don't intend to follow all her plans. Lalo na pagdating sa babaeng gusto kong makasama sa buhay. Kung magmamatigas siya, magmamatigas din ako."

Ngumiti si Keith, sinulyapan siya at tinapik ang balikat niya. "You're really a grown up now, huh."

Sasagot pa sana siya nang biglang tumunog ang cellphone niya. Sabay silang napatingin sa gadget. Pangalan ni Matilda ang nasa screen. Nagkatinginan sila ni Keith bago siya huminga ng malalim at sinagot ang tawag.

"Open the entrance door."

Napatayo si Maki at manghang nilingon ang pader kung saan nakakabit ang screen ng mga CCTV camera na nakakalat sa loob at labas ng Bachelor's Pad. Sa entrada ng building na halos hindi nila ginagamit nakatayo si Matilda St. Clair at ang private secretary nito. Sa background nakikita niya ang itim na limousine at tatlong body guard na nakatayo sa gilid niyon. Ibinaba niya ang cellphone, napamura at sumenyas kay Keith.

Napangiwi ang kaibigan niya. "Anong iniisip niya? Sa nakaraang mga taon never niya tinangka pumasok sa Bachelor's Pad. Wait, susunduin ko siya." Mabilis itong lumabas ng penthouse. Bumuntong hininga siya, nanghihinang ibinulsa ang cellphone at pabagsak na umupo uli sa couch.

"YOU BOTH look well," komento ni Matilda St. Clair. She was regally intimidating while standing in the middle of the living room and looking down at Maki and Keith. Nakasimangot ang una habang ang pangalawa naman ay halatang pilit ang ngiti pero hindi rin komportable. Ngumiti ang matandang babae. "What? Hindi niyo gusto na dinalaw ko kayo ng personal? I am a very busy person but I made time to see the two of you. Be thankful."

Tumikhim si Keith. "Matilda. We appreciate your visit pero para sa mga lalaki lang ang building na 'to, remember? Bawal ang babae. You just broke one of the most important rule."

Tumaas ang kilay ni Matilda. "Really? Pero may babaeng labas pasok sa building na ito gabi-gabi. O akala niyo ba hindi ko alam?"

Na-tense at nagkatinginan ang dalawang lalaki. Umismid si Matilda. "Look at you two. Akala niyo may maitatago kayo sa akin? Pinapabayaan ko lang siya kasi hindi ko siya nakikita as a threat. But once I see that she's no longer harmless, you know what I can do, right?"

Kumuyom ang mga kamao ni Keith. Naging matalim naman ang tingin ni Maki sa matandang babae. Hindi niya gusto ang pasimpleng pagbabanta nito. Tama ang kaibigan niya, hindi niya basta masasabi sa adoptive mother niya na seryoso siya kay Allen. The old lady might do something that will make him hate her. Ayaw niya mangyari iyon. Masyadong mataas ang respeto niya rito. "Ano ba talagang ipinunta mo rito?"

Namaywang si Matilda St. Clair. "It's time to stop hiding from society. Few months from now, sa birthday party ko, pormal kong ipapakilala ang mga anak ko. At kung kailangan kita ipahila papunta sa party ay gagawin ko, Maki. You are my oldest son so you have the responsibility to represent me in the future. Ngayon pa lang dapat masanay ka nang lumabas at makihalubilo sa iba."

"No," mariing sagot ni Maki. Alam niya walang silbi magmatigas pero nakasanayan na niya gawin kaya iyon ang automatic niyang reaksiyon.

Naningkit ang mga mata ng matandang babae. "Don't disobey me. Pinagbigyan na kita sa mga nakaraang taon. You cannot hide here forever."

"No."

"Really? I will make you change your mind, Maki. At hindi mo magugustuhan ang paraan ko."

"Go ahead," hamon pa nito.

Tumaas ang kilay ni Matilda. Mukhang napansin ni Keith na nagpaplano na ng kung anu-ano ang matanda kasi inakbayan nito si Maki at tinapik ang balikat. "Don't worry. I will convince him."

"No. This time he should decide for himself. Besides, may iba akong ipapagawa sa'yo, Keith. You see, my other sons are all over the place and I need someone to bring them all back before my birthday."

Napatitig si Keith sa matandang babae. "When you say all over the place... it's all over the world, right?"

"Yes. Don't worry ipapahiram ko sa'yo ang isa sa mga personal assistant ko. Siya ang makakasama mo sa pagpapauwi sa kanila. This is also a chance to leave Maki alone. Kailangan niya ng independence."

Nagkatinginan na naman ang dalawang lalaki. Halatang hindi gusto ang desisyon ni Matilda.

"Maki, you cannot protect someone as you are now. Or do you really want me to show you so that you will understand?"

Nanlaki ang mga mata ni Maki na biglang tumayo at kumuyom ang mga kamao. "Don't you dare do anything to her. Don't you dare."

Ngumiti si Matilda. "At least you know what I can do. Good. And Keith? Huwag mo isipin na ipapahanap ko sa'yo ang mga anak ko na walang kapalit. I already have the information that you've been looking for. Ibibigay ko rin sa'yo sa birthday ko." Pagkatapos kung gaano ito kabilis dumating ay ganoon din ito kabilis umalis.

Napatayo rin si Keith at pareho silang napatitig sa direksiyong tinahak ni Matilda. Nagkatinginan uli sila at parehong napahinga ng malalim. "Well, there's no harm in doing what she wants for now."

Frustrated na bumuntong hininga si Maki at naglakad palayo, pabalik sa opisina niya. Pero bago siya tuluyang pumasok sa loob ay lumingon siya. Nakita niyang nakatayo pa rin sa living room si Keith, nakatitig sa view na makikita mula sa floor to ceiling glass wall. Parang may biglang naalala bago umiling at naglakad na palabas ng penthouse.

Napasunod na lang siya ng tingin sa papalayong likuran ng kaibigan niya. Hindi niya alam kung ano ang mga sikreto ni Keith o kung ano ang pinagdaanan nito bago sila nagkakilala pero kahit kailan hindi siya nagtanong. Ni hindi niya alam kung paano nito nakilala si Matilda St. Clair. Palagi itong nakangiti at madaldal kaya mas mukha itong friendly. Pero ang totoo, mas mataas at makapal ang defenses nito kaysa sa kaniya. Tumatawa ito at nangingielam sa buhay ng iba para hindi ma-focus rito ang atensiyon ng kahit na sino. Masyado rin nitong sineseryoso ang pagiging caretaker niya kaya malabong mag rely ito sa kaniya.

Bumuntong hininga si Maki at umiling. He knew he was running away all these years but he cannot do that anymore. Kailangan na talaga niya harapin ang responsibilidad bilang anak ni Matilda St. Clair. Isa pa hindi magandang suwayin ito ngayon lalo at alam pala nito ang tungkol kay Allen. Kung gusto niyang matanggap ito ng adoptive mother niya, kailangan niya patunayan na hindi magiging hadlang ang relasyon niya kay Allen para magawa ng maayos ang tungkulin niya bilang tagapagmana nito.

Kailangan niya gumawa ng plano at paghahanda. Pero bago ang lahat may mas importante muna siyang gustong gawin sa araw na iyon. He must see Allen.