Bachelor's Pad series book 13: THE MYSTERIOUS HEIR

Part 71

TAONG ninety ninety five nang maging laman ng balita ang tungkol kay 'miracle boy'. Namatay ang issue na iyon bago pa man masagot ang mga misteryong bumabalot sa balita na iyon. Sa paglipas ng mga taon, nawala na sa isip ng mga tao ang tungkol sa batang lalaking natagpuan sa loob ng cargo ng mga illegal na gamot. Ang mga nakakaalala na lang rito ay ang mga taong naging bahagi ng buhay ng lalaki mula pa noong bata ito. And maybe that is a good thing. Kasi pagkatapos nila malaman ang buong katotohanan sa tunay nitong pagkatao, mas makakabuti nga na hindi na naaalala ng mga tao ang tungkol kay miracle boy.

Kumatok si Allen sa pinto ng VIP suite ng ospital. Hindi na niya hinintay sumagot ang pasyente sa loob. Pumasok na siya at napasimangot nang makitang nakaupo pasandal sa headboard ng hospital bed si Maki. May nakapatong na laptop sa kandungan nito at mabilis nang tumitipa ang mga daliri sa keyboard.

"Anong ginagawa mo?! Mabibinat ka," reklamo niya.

Huminto ito sa ginagawa, tumingala sa kaniya at malawak na ngumiti. Uminit agad ang pakiramdam niya at lumobo ang puso niya sa pagmamahal dahil sa ngiting iyon. Simula nang magising ito pagkatapos ng operasyon, napansin ni Allen na may naiba sa binata. Mas kuntento na ito. May peace of mind. May sense of completeness. Lalo tuloy lumakas ang pheromones nito. Lalong kuminang ang kaguwapuhan. It's as if there is light radiating from inside him. Lalo na kapag ngumingiti ito ng ganoon.

Nawala tuloy ang inis niya na nagtatrabaho na ito kahit hindi pa tuluyang magaling. Lumapit siya rito at umupo sa tabi nito. Umakbay agad ito sa kaniya at mabilis siyang hinalikan sa mga labi.

"I'm way behind schedule for this project. Masyadong hectic ang nakaraang dalawang linggo kaya hindi ako nakapagtrabaho.Kailangan ko 'to matapos bago ang birthday ni mamma next week. Hindi na nga ako nakakatulong sa preparations."

Sa mga nakaraang araw kasi palaging may bumibisita kay Maki; mga kapatid nito na isa-isa na bumabalik ng Pilipinas para sa nalalapit na birthday ni Matilda St. Clair at mga residente ng building na tinatawag pala ng mga ito na Bachelor's Pad. Mayroon din silang naging bisita na hindi nila inaasahan, si Shannon. Umiyak ito at humingi ng tawad kay Maki sa lahat ng mga nagawa nito noong nakatira pa ang binata sa pamilya Angeles. Hindi na rin daw nito kailangan ang proteksyon at abogado kasi patay na ang asawa nito at nabuwag na ang sindikato. Pupunta na lang daw ang babae sa Amerika, sa poder ng parents nito at doon magsisimula ng bagong buhay.

Bumuntong hininga si Allen at hinaplos ang dibdib nito, pababa sa tiyan nito na may benda pa rin hanggang ngayon. "Ang trabaho mo ay magpagaling ng husto. That's the least you can do for scaring the hell out of us."

Naging payakap ang akbay nito at hinalikan ang noo niya. "I know. I'm sorry. I will make it up to you for the rest of my life."

Tiningala niya ito. Pinagtama ni Allen ang mga paningin nila at seryosong sinabi, "You are not allowed to die before me, understand? Para makabayad ka sa takot na pinaranas mo sa akin dapat mabuhay ka ng mahabang mahaba."

Ngumiti ito at masuyong hinaplos ang baba niya. "I promise. I'm not going to leave you. Not after your father saved me again. Hindi niya hahayaan na umiyak at maiwan uling mag-isa ang unica hija niya."

Kumirot ang puso ni Allen at uminit ang kanyang mga mata. But it was a good kind of ache. Sinabi kasi sa kaniya ni Maki na habang wala itong malay, napanaginipan daw nito ang sandaling iniligtas ito ng papa niya. Pero hindi katulad sa totoong nangyari, may binulong pa raw ang kanyang ama sa panaginip nito. Go back. Hinihintay ka niya. Saka raw ito nagkamalay.

"Hindi lang ako ang hindi mo dapat pinapaiyak. Pati ang mamma mo."

Tumango si Maki. Nagkangitian sila at parehong natahimik. Alam niya katulad niya naalala nito ang mga inamin ni Matilda St. Clair sa kanila nang araw na magkamalay ang binata.

Nasa late twenties pa lang si Matilda ay kilala na ito biglang isa sa mga pinakamaimpluwensiya at pinakamayang babae sa Asya. A half-filipina, half-italian, she gained the respect of the men in the business world through her genius level intelligence and ruthlessness when it comes to business dealings. Pero pagtuntong nito sa thirties, narealize agad nito na may kulang. She knew marriage is not for her but she wanted to have children.

Pagdating ng thirty three, habang nasa Hongkong si Matilda, may nakilala itong isang lalaki. A Chinese hollywood actor so beautiful that even she could not resist. Nagkaroon ng affair ang mga ito. They both know that what they have is not forever. Pero para kay Matilda, iyon ang chance na hinihintay nito. So she took advantage of it. Maayos ang naging paghihiwalay ng dalawa. Ang lalaki bumalik na sa amerika dahil naroon naman talaga ang buhay nito. Si Matilda bumalik sa pagiging jetsetter at itinuon ang buong atensiyon sa trabaho. Pero sa pagkakataong iyon, mas may sigla at determinasyon na ito. By that time, she was already pregnant.

Itinago nito ang tungkol sa pagbubuntis kasi ayaw nitong mabalutan ng kontrobersiya ang magiging anak nito. Nang lumalaki na ang tiyan, bumili ito ng isang resthouse sa malayong village sa Hongkong na malapit sa dagat. Doon ito nanatili hanggang manganak. She said the baby was her greatest treasure, a gift from God. So she named him Nathaniel.

Planado na raw ni Matilda ang magiging paglaki ng anak. Pero hangga't wala pa ito sa hustong gulang, nagdesisyon itong itago ang bata. Pinili nito ng husto ang mga kasambahay at maging ang yaya ni Nathaniel. Pero nalusutan pa rin ito. Ang baomu ng bata, isa palang miyembro ng chinese mafia na matiyagang naghintay ng limang taon para maisagawa ang mga plano ng mga itong kidnapin ang nag-iisang tagapagmana ni Matilda St. Clair. Pero lingid sa kaalaman ng yaya, maraming secret guard na nagpapanggap na hardinero at tauhan sa resthouse na nagbabantay sa bata. Nakatunog agad ang mga ito sa ginawa ng babae. Nahabol ang mga ito sa pantalan at kalaunan ay naparusahan. Pero wala na roon si Nathaniel.

Maraming barko ang umalis sa pantalan na iyon sa maiksing sandali bago makarating ang secret guards. Mayroon ding mga sasakyan at truck na naglabas pasok doon para magbaba at kumuha ng mga cargo na dadalhin naman sa iba't ibang lugar sa Hongkong. Sa kasamaang palad, ang sinundan agad ng secret guards ay ang mga nasabing sasakyan at truck. Walang nakaisip ng posibilidad na baka napasama sa kung saang cargo ng barko ang bata at kasalukuyang papunta sa kung saang bansa. They failed to find the child because they were looking at the wrong places.

Pagkatapos isang araw, sa kalagitnaan ng paghahanap kay Nathaniel, nagkaroon ng balita sa Hongkong news na may isang katawan ng bata ang natagpuang palutang-lutang sa dagat. Muntik na magkaroon ng panic attack si Matilda sa takot na baka iyon na ang anak niya. Pero nang puntahan nito at malamang mali ito ng hinala, magkahalong relief at takot ang naramdaman nito. Relief na hindi si Nathaniel ang batang nalunod at takot na baka ganoon din ang nangyari sa anak pero hindi pa lang lumulutang ang katawan. Kaya sunod nitong pinasuyod ang karagatan. Tumagal ng isang buwan ang paghahanap pero walang nakita ang coast guard.

Sa puntong iyon ng buhay ni Matilda, narealize nito na kahit gaano pala katalino at kautak ang isang tao, nabablangko ang isip kapag nawalan ng mahal sa buhay. For some reason, she just can't think properly. For someone so used to being strong on her own, she became weak and helpless against grief and lost. Lalo at wala naman siyang ibang masabihan ng tungkol kay Nathaniel dahil inilihim nga nito ang tungkol sa bata. If only she was as sharp as usual, she should have thought of asking the Chinese embassy for help. Kung sakali, nalaman sana nito na may isang bansa ang nakatagpo ng isang batang lalaki sa loob ng isang cargo ng mga pekeng gamot.

Pagkalipas ng ilang buwan, dineklara ng Hongkong government na malaki ang posibilidad na patay na ang anak ni Matilda. Sa sobrang pagluluksa, ibinuhos nito ang atensiyon sa trabaho. Nagbabad ito sa Singapore kung saan may headquarters ang kompanya nito. Hindi na rin ito bumalik sa Hongkong. Maraming beses pa nga na muntik na nitong ibenta ang bahay kung saan niya nakasama ng limang taon si Nathaniel. Pero sa huli, hindi rin nito nagawang bitawan ang nag-iisang koneksiyon nito sa nawalang anak.