بحر الذكريات

البدايات

بحر الذكريات ....

الجزء ١....
اعادة النشر بطلب المتابعين
.......

الصباح بكل مكان جميل لكن بقريتنا هو الاجمل ... جميل جدا لدرجة لا توصف ...صوت العصافير والحمام والبلابل يخطف الالباب ..

شروق الشمس ببدايات نهارنا وتخلل اشعتها للمطبخ تنطي دفئ مريح وتمتلئ ارواحنا بالطاقات الايجابية ...كنت عالطباخ واقفه احضر مخلمة البيض اللي علمتها الي زوجة عمي وياها الشاي الحار يتصاعد بخاره ويملي النفس سرور بالمنظر ....ريحة البيت كلها بخور اثر جدتي وكعدتها وعاداتها اللي اكيد حنتوارثها اني واختي

.....

كملت كل شي وحضرت صينبه مرتبه وشلتها وطلعت ...جدتي واختي الكبيرة نهلة وزوجة عمي ام طارق كاعدات وفارشات بظل شجرة السدر العظيمه بفناء منزلنا الامامي ..كعدة من العمر ويه الاحباب...بهالوقت يكونون الرجال ما متواجدين جدي وعمي ابو طارق من الفجر يطلعون لاشغالهم ونبقى بس النسوان...ابتسمت وصبحت عليهن
-صبحجن الله بالخير
الجدة:هلا بهالصباح يا حلوة
ام طارق :هلا بنيتي صباحج ورد مثل خدودج

دنكت محرجه من كلامها ..اني اخجل من اقل كلمه طبع بيه ما اكدر ابدله هذا طبعي وجدتي تكول خجل البنية زينتها

...باوعت لنهلة اختي كامشه معدتها اكيد عدها غثيان الصباح اللي تعانيه كل حامل ضحكت عليها وحجيت وياها

-نهوله يلا مدي ايدج حبيبتي اكلي وياي شوي واشربي جاي يكعد نفسج

-ما بيه
جدتي وعمه ام طارق التفتوا الها
ام طارق :يااا شلون ما تاكلين على بختج يمه انت
ضعيفه ومنا ما تاكلين بيش طالبتنا توكعين علينا وطارق يتخبل غير اذا رجع شافج مريضه

نهله:اليسمعكم يكول يحبها هو وين لاكيني اشو ينزل يكضيها بالبستان ويه جدي وكلمه ماكو
الجدة:عاب حلكج يولو شلون ما يحبج عجل منهو اللي راد يذبحنا لما البو هاشم رادوج

ابتسمت ودنكت التهي باكلي خجلت لان اعرف جدتي وسوالفها مرات تدوس ويه نهلة لاجل تعلمها وتسمعني عود كبرت ولاحكتها لاختي ...اختي بعدها عروس ما صار الها هواي من تزوجت ابن عمي الجبير طارق ..فرق العمر بينهم جبير بس الظاهر صدك اكو عاطفه من الرجل القاسي لاختي الحلوة ...

اسولف الكم عنا وعن كل اللي بهالبيت ...اني اسمي وفاء وهاي اختي نهلة الاكبر مني ...ابونا متوفي وامنا متزوجه لزوج ثاني بنفس منطقتنا...قليل تمر تشوفنا والها حياة ثانيه ..بما معناه يتيمات الطرفين

..ربينا عند جدتنا وجدنا وبين عمامي الثلاث الكبير ابو طارق واولاده الاثنين طارق وعارف وعمي الثاني ابو مازن وبناته الخمسه وعمي الصغير اسمه كمال بعده شاب ما متزوج عمره بعمر طارق ابن عمنا ....