بحر الذكريات

وماذا بعد الحب

كوه يلا كدرت انشر عدنا خلل بالنانو 😭😭طبكت الكم بارتين مع بعض😘😘

وماذا بعد الحب؟؟؟

احببنا وانتهى بنا الامر لا ندري ما التالي وماذا بعد هذا الحب  ....انترك عواطفنا تذبل ومشاعرنا تشيخ ام نخلد شبابها ونجعلها زاهية كربيع شبابنا.....

ايمن:
كاعد يم والدي ببيت خوالي واعرف هالشي صعب عليه ولخاطري فات بيوتهم واجا لهنا ابويه من وعيت لحد هسه واني ادري عنده مشاكل ويه هالعائلة وما يطيقهم ومع ذلك ما منع امي ابد من مواصلة اخوتها ...

جدي كان منفعل وابوي يفرك بسبحته ضايج ويضرب بيها على رجله ....كلام عمهم ثائر صدم كل الكاعدين هو اصغرهم عمرا واخوانه الكبار انطوا وهو اليوم يلا اعترض وكال عنده ولد هواي واي واحد منهم حيكون اولى مني ببنت عمهم حسب قوله ...

طلعنا منهم للباب امي تبجي زعلانه من اخوانها وهمه لاحكينا يتعذرون وصلونا للباب عمامهم بقوا جوه يتجادلون تركناهم رد ثائر كان فشلة الهم لان المشية هاي كانت رسمية وهو سمع وجان ساكت قبلها....جدتي طلعت من باب المطبخ رغم تعبها وعمرها الجبير وضلت تحجي وياها وتراضي خاطرها ...لمحت بهالاثناء هدير كانت بالمطبخ وفاتحه الستارة وبالشباك وكأنها تناديني وتشوفني دموعها ...

ما كدرت اطيل النظر لا ينتبه احد الها ويأذوها ...اختها تجرها تريد تسد الستائر وهي معاندتها ...ما تحملت ابقى ترخصتهم سابقهم لبيتنا..هي كوه اني ما مكتوبلي الفرح ...

رجعت للبيت قبل اهلي ورحت لغرفتي قافل بابها عليه ...بين تقلبات افكاري والحالة المزعجة اللي اني بيها غفيت بلا ما احس ...نومي ثكيل واهلي لحد ما كعدت لكيتهم باخر نفس ...امي وابويه اثنينهم واكفين بالباب ويدكون ..اول ما فتحتها صاح بيه ابويه بتوتر ممزوج بخوف

-ولك يابه ليش قافل بابك ناقصين احنا ..امك رادت تموت
اباوعلها كعدت على فراشي وكوه تجر النفس ...رحت يمها بوستها بس تبجي
-يمه كولي يا الله يمعودة شوفيني ما بيه كل شي بدلت ملابسي ونسيت افك الباب وغفيت وراها خو ما متت وهيج تسويها واذا متت هم ما تسوين بنفسج هيج ما ارضى هاي امانتي ووصيتي الكم انت وابويه

نهلة:ولك يمه كافي تريد تموتني اسم الله عليك وبعيد هالسيرة عنك ...مو بيدي اخاف والله وانت ادك وما تفتح اجت ببالي صارلك شي

رحت جبت الها ماي ورجعت لكيت ابويه كاعد يمها محاوط كتفها بايده ويبوس براسها
-هااا يمعودين ابو ايمن تراني هنا وهاي غرفتي روحوا عاد بغرفتكم
ضحك وجاوبني بشقى

-هي نهولة وين ترضى يمعود لا تقلبها عليه دوم حتطتك انت واختك حجج
نهلة:لابو ايمن عاد مو هيج تحجي كدامه يااا شصارلك 

ايمن:ربي يحفظكم ودوم اشوفكم مرتاحين واذا عليه احسبوني ما موجود ...هاا اطلع واسد الباب حاجيتهم بمزح وهمه يضحكون ...بالاخير رجعنا للجد وسالني ابويه
-يابه خو ما ضايج خلكك من الموضوع ..لا تهتم ابد نخطبها مره واثنين ولا تشيل هم