بحر الذكريات

مشاعر متضاربة

تصويتكم وينه 🧐🧐🧐تخلون الواحد يطلع اسلحته عليكم😡

وفاء :

بناتي وهوستهم والحوار بينهن طلعني للحديقة اشوف شكو كانت شيماء تبجي وساره شكلها مصدوم وصفاء بيدها شي بمجرد طلعت حاولت تخفيه عني 

-شبيكم
صفاء:ما بينا شي شيماء وساره متعاركات ..كانت مخليه ايدها خلف ضهرها ...تقربت جريتها ظنيت الموضوع مختلف بس انصدمت من شفت بايدها طلقات اثنين وياهم رسالة تهديد لابوهن 

ما عرفت شلون اتصرف ولا افتهمت ...لبست عباتي كبل وطلعت للمحلات بالسوك ...مازن من طلع من السجن بدا يشتغل ويه طارق ...وصلت لهناك كانت ظهرية حاره ونفسي من مشيتي السريعه احسه صار كلش قليل مدري ضاق النفس مدري ضاقت دنيتي بيه ...ما صدكت يطلع من المعتقل ويرد لبناته تطلع هيج سالفه النا...

وصلت للمحل فحطت ببابه وكعدت كدامه ابجي ...هو شافني وانخذل اجاني يركض مناك وطارق انتبه وياه واجوني ...
-وفاء خير واج شبيج البنات بيهن شي شبيج احجي

كنت اريد احجي بس احس شي كاتم صدري والحجي انكتم بس دموع تجري ..طارق افتهم صعب عليه النطق بهيج حال ..هدأني وانطاني ماي ومازن يغسل بوجهي واني ادعي يكون يومي قبل يومه ولا اتلوع بمر فراقه نطقت بصعوبة وطلعت الهم الطلقات والظرف ...شافهم طارق واخذهم مني ...كنت ميته وجلبت بايد مازن ما اقبل يكوم ولا يطلع من المحل مكمشه ايده احسهم يتربصون بينا ...

-فدوة مازن ما بيه حيل بعد شلون بينا شنسوي
مازن:انعل والديهم شنو واذا يهددون اعوف ديرتي اني

طارق:يابه مو وكتها هالسوالف الوكت تبدل ... مازن الحذر واجب واذا ما تفكر بينا فكر بعائلتك الوكت كلش مو زين
-بجيت وجلبت بايده اقوى وهو صاير نار توسلته يطلع اليوم من ديرتنا ما يبقى بيها...مازن فدوة روح لبغداد يم مريم
-انت كل عقلج

-اي لعد شايفهم يتشاقون وياك
بالكوة قنعناه يطلع لبغداد وبقى فترة يم مريم لحد ما عمي قنعه يسافر هالفترة بلكت تهدأ الاوضاع...

كنت بنار محد يعلم بيها ما عشت مرتاحه ابد ولا تهنينا لا اني ولا هو ...نادمه على ايام مرت ونادمه زعلت وبعدت عنه ...بيوم سفره اخذت البنات لبيت عمتهن ويه جدهم نودعه وهنا صدك الكل كان متدمر ..بناتي كلهن يبجن صفاء الوحيدة اللي ساكتة بيهن بس هم سكوتها كان بقهر ...

بيومها ما صار مجال اودعه مثل ما اريد ودمعي ما نشف نهار كامل وقت العشا والكل مشغول بتعزيل المطبخ ناداني بغرفة جهال مريم 

دخلت وسديت الباب وراي واركضت لحضنه اشهك وابجي حاجاني بحزن وكتمة نفس وقهر شديد
-ما مكتوب النا الفرح اني وياج وفيه
-لا ان شاء الله تمر هالايام وننجمع بخير مره ثانيه