بحر الذكريات

متاهة

طارق:
ماشي وراها بالسوك لان رادت تاخذ قماش ومستلزمات خياطه الها ...وصلتها ونزلنا سويه لمحلات القماش اللي تاخذ منهم...فتنا محل جبير بي رجال جبير وياه ولده يشتغلون
عرفته عليه وعرفتني عليه وهو كام لحيله وتقدم بوسني مرحب بيه

-يا هلا يا هلا بابو ايمن ...يابه الحمد لله على سلامتك ..وانت بويه قرة عينج بي
ضحكت هي بوجهه وتشكرته

-الله يسلمك حجي ربي يحفظك
-اكعد وليدي استريح يا ولد جيبوا الجاي لو شربت والله فرحت صدك بشوفتك سالم رغم ما عارفك اني قبل
-تسلم حجي ربي يحفظك ....بس مستعجلين والله رادت قماش وتكول اخذ دوم من الحجي
-اكعد خل تختار براحتها ..يلا بنيتي اخذي راحتج المحل الج واخوانج يخدموج ..اشر على ابنه الواكف مبتسم من دخلنا لهسه ودي اضربه بوكس افلش خلقته...تقرب يسالها عن طلبها وراحت وياه وعيوني تتبعها

...ضيفني وكعدني يمه بين ما هي تعامل وتختار اليناسبها ...عيوني تمشت وراها....حلوتي ومدللتي صايرة احلى بعد ال١٥ سنه سمنانه ومتعدله اكثر ...كنت ميت بنار واني اشوفها هيج وما اكدر اقربها ولا اكدر اصير الها مثل ما تتمنى...

كاعد وصافن عليها ويمي الحجي ..
-يابه والنعم منك ومن بنت عمك ...اصيله ١٥ سنه صانت غيبتك ..يابه هاي تحطها بعيونك هالوفية
باوعت اله مستغرب مديحه

-ام ابني التشوفها... حجي بيمن دتوصيني؟؟
-ادري يابه بس هاي بنيتي حاسبها ...شوف اول ما اجتي للمحل تشتري مني شفت اخلاقها ورزانتها والثكل...فكرت كلت اخطبها للولد ورحت وسالت والنشده اجتي هالمره مناطره رجال غايب صار سنين ...يابه انت جنت مفقود مو اسير وهي تكول زوجي ويرجع بالسلامه ما كطعت ابد هالسالفه ومرات اسألها مو مره وتأكد انت ترجع رغم ماكو خبر منك..من يومها صرت اعدها بنت من بناتي واتمناها لو جانت صدك بنتي..

تقربت هي يمنا والحجي يجاملها ويضحك وابنه حاسبنا وكطعوا من حسابها هواي وهي تتشكر من الحجي ...اني كنت على اعصابي حلفت نطلع منا بعد تحلم اخليها تخيط ...

طلعنا للشارع نتمشى واني متضايق وودي اخذها لداخلي واخفيها عن عين البشرية كلها...شويه وتلاكينا ويه هذا السااافل ثائر ...منا سولفوا الي شكد خاطبها من كنت بالاسر ومنا هو المنافس الاول كان ...سحبتها وراي وعيونه تتبعها سلم وردينا واختصرت الكلام وياه ما اريد علاقة وياه حتى لو زوجته من عدنا...وصلنا السياره واشوفه لاحكنا ...
ما تحملت وصعد الدم لراسي ...رجعت اله وبعيونه ضحكه سافله مثله بلا وعي كمشته من زياگه وركعته بالحايط الوراه
-تصير ادمي لو ادفنك والله

-يابه شمسويلك وتدفن ...وشكد دافن قبل وتدفني دروح امشي روووح؟..دفعني ورجعت اله الدفعه
-بسيطه يا ثاير الكلب اني الك ...مشيت وعفته وراي دباره عندي