بحر الذكريات

استقرار ام انهيار

تصويتكم حبايب لان التصويت جدا قليل 😕

وهم فد طلب اللي ما مسوي متابعة لحسابي خل يتابع من فضلكم 😘😘محتاجه ست متابعين فقط حتى اوصل ١٨ الف متابع😍😍

شيماء:
بقيت ببيت اهلي لحد ما خلصت حفلة سديم وعرس ايمن وحضرت الحفلتين ...حسين صار يتأخر بجيته النا منا شغله ومنا اهله والبيت اللي بناه النا منفصل بس قريب كلش لامه وابوه ...

بين زعله مني لان رافضه ارجع ويكول تتحججين وبين كلام امي الرجال مل منج ومن التواسيل واحتمال تزوج عليج هسه ...خلتني ليل ما انامه ...تخيوا امي نفس افكارها بشبابها بدت تزرعها بداخلي ...اني مقصرة اعترف وبعدت بنتي عن ابوها بس مو بيدي وضعي خاص ولا عندي خيار ولا حالي يسمح بالضغط على نفسي ..اخاف من كل شي واتحرص لكل شي ...والهم الاكبر كان شلون اشوف حسين رجلي هاي الفكرة كانت ماخذه من عافيتي صح هو يعرف وشافها بايام عمليتي بس اكو جانب ثاني مني يحسب لغير حسابات ...راح يضوج يمكن يتفشل مني ...رجلي واثرها النفسي عليه كان كلش جبير شلون هو حيتقبل ...المهم بعد هالصراع الطويل لاشهر طويلة انطيته وعد بأن تنتهي الحفلات يم اهلي واني ارجع وياه لديرته او ديرتنا لان مكاني الصح هو يمه وذيج صارت ديرتي ...

كان موجود اجا بيوم حفلة سديم شفته لو عبالك هم وانزاح من دخل النا ما شايفته من يوم عرس ايمن وهدير واجا بيومها لخاطر ايمن وبقى وياه لان بينهم صداقة تكونت وقوت بهالفترة اللي فاتت ما بقى يمنا بوقتها بس اليوم جاي يبقى لبعد الحفلة حتى نرجع سويه ...

دخل الظهر متأخر تعبان من الطريق الطويل استقبله بابا من الباب يرحب بي ...دخله للاستقبال واني بقيت بالطرمه بس سلام من بعيد حصلت ؟؟؟شال زهورة ويمشي ويبوس بيها جايب الها ولاحمد ابن صفاء العاب وحلويات هوايه حتى تقنع عنده وما تبجي مثل كل مره تشوفه ولو تعودت عليه وعرفته بعد ما كبرت شويه ...

فتت للاستقبال وياهم وماما اجتي مناك ترحب وفرحانين بي اقاربنا موجودين حاضرين للحفلة اللي موعدها عالعصر ..ماما وبابا يحبوه حيل لحسين لان ما شفنا من جانبه غير الطيب وكل الخير ...
توني ااكعد صاح بيه بابا

مازن:كومي يابه جيبي ماي لرجلج وحضريله ملابس وحمام شنو كعدتي يلا بساع...
خجلني كدامهم واجيت اوكف بسرعه اختل توازني ورجعت كعدت بسرعه صارت مثل الوكعه بمكاني كمشت حافة التخم لا اوكع كلش ...حسين من مكانه نهض واجاني وكفني وبابا انحرج من كلامه وياي واني هم كلش فشلت من روحي ما اعرف لكل الناس ما اهتم بس حسين حتى الزلة برجلي احسب الها حساب يمه وكدامه ...

دمعت عيوني من الفشلة واني اباوع عليه محاوطني من خصري ويعدل وضعي ..
-ما صار شي شبيج؟؟توجعج
هزيت راسي بلا كلام وهو بين عليه متأثر..