بحر الذكريات

برد حضنك يدفيني🤕

نهلة:
دخلت للغرفة اتفقد طارق لساه نايم لو كعد ...لكيتهم هو وايمن كاعدين يسولفون عالسرير وطارق حاط ايده على كتفه ويحجون بصوت ناصي ...فتت مبتسمه استحي افرض روحي وياهم ...سويت نفسي اعزل بالغرفه واذني يمهم ولا اسمع شيحجون بس ضحكهم يوصلني ....كاموا طلعوا للهول وتركوها للغرفه الي ...ادركت شغلة لحد هسه اني وايمن نايمين بنفس الغرفه...مرات نفس السرير عمره ١٥ احد هسه ما مفكره نستقل بغرف منفصلة لحد هسه انيمه بحضني هسه تكولون ابالغ بس هو شعندي غيره هو محور حياتي ...بس بعد ما ترهم...رجعة ابوه حتغير هواي اشياء..

طلعت وراهم كاعدين يم البقيه ...انتبهت لطارق ما يحجي الا اذا انسال ومرات يغلس اذا ما يريد يجاوب ...كانت عيوني ما تغادره ولا لحظه اريد اشبع منه مدا اكتفي وهو كل شوي يرفع عيونه ويباوع الي ويرجع يصد بساع ...

صار الليل وبيومها فرشت بالكاع فراش لايمن ..اول ما فات طارق بلا كلام راح تمدد عليه ...كعدت على طرف السرير يم راسه وحجيت بهدوء وياه
-تعال نام هنا هذا فراش ايمن

-لا ما ازعجكم واقلق راحتكم اخذي راحتج
نزلت وكعدت يمه اريد احجي وياه
-طارق حبيبي كوم شتقلق من راحتي هو انت وراحتي واحد اليوم يلا ارتاحيت اني

باوع بعيوني باستغراب ويتهرب بنظراته مني
-اريد انام ..كالها بحزم ولف الغطا على كتفه زين
-نوم العافية عيوني ..ارتاح 

-اني اكره الصوت لا تطكطكين
-لا ابد نام ولا تحس بوجودي اصلا
-ليش ما تطلعين مو احسن

سكتت ولميت فشلتي وطلعت بره ...ايمن كاعد ويه عمه عارف يسولف بره كعدت بعيد عنهم ..عمتي ام طارق مرت صدفة من الهول تروح للمطبخ شافتني اجتي الي مستغربه كعدتي بره
همست حتى لا يسمعوها

-شعندج كاعده هنا يمه كومي يم رجلج
-عمه تعبان يريد ينام وطلعت

-كومي ولج ايمن كلت اله ينام يمي هالايام منا لما نرتب اله غرفه الفوك...جاوبتها بصدمه وكأنها كالت نسفره مو نحطه بغير غرفه ..متعودة ابني يمي
-يا عمه عليش نعزله

هزت ايدها ومشت خازرتني ما عجبها كلامي

وره وين بقيت كاعده تشجعت اروح لغرفتي لكيته كاعد ومكابل المرايا ما نايم ...باوع بوجهي ورجع دنك ساكت ...
-هااا كاعد بعدك
-ما نمت ...وين ايمن

-بره يم عمه عارف
-ما يجي ينام
-ينام يم عمتي 

تضايق من الكلام بس سكت ...وكف وراح تمدد بالفراش اني هم نزلت فراش وحطيته يمه وتمددت وجريت غطاه وتغطيت وياه ..اندار عليه باستغراب

-شكو وين جايه كومي بمكانج
-هذا مكاني شنو ناسي

كعد لحيله فرك وجهه قوي واني كعدت وياه
-نهلة كومي لمكانج ولا تعيدين هالحركه ابد...ومن اكولج ابد يعني ابد..مدا اطيق نفسي ولا اطيق احد عوفيني الله يوفقج