بحر الذكريات

المفقود

قصه من اصعب ما كتبت 💔
ابجي شويه وارجع اكمل وهالبارت دمرني😭

بحديقة كبيرة التقيت بي وكنت مشتاقه اله حيل ومثل كل مره اركض احضنه بكل قوتي عسى اكدر بحضني اكوله شكد احبه ... اخلي راسي على صدره اسمع دقات قلبه المتسارعه واللي تتخربط من احضنه صح ما يبين بس هذا دليل حبه الي ..شلت راسي اشوفه كلش مشتاقه اله ..لكن المنظر افزعني هذا طارق حبيبي بس مو نفسه بكل مره ...كان وجهه كله دم والدم يابس ..انفزعت واجيت اترك حضنه بسرعه واني مدمعه

-طارق حبيبي هاي شبي وجهك ؟؟تصوبت بالحرب ..شو شوفني وين اصابتك ..صرت اقلب بايديه وبجسمه اريد اشوف وين متأذي وهو بس يريد يرجعني لحضنه ..خايفه وابجي اريد اجيب شي واضمد جراحه ...حبيبي اللي وعيت وفتحت واني احبه ..اول قصص الحب واخرها

-طارق هاي شبيك شنو يوجعك حبيبي احجي ..وين صوابك؟؟طارق

-اششش اسكتي واسمعيني ..حبيبتي اني راح اتأخر عليج ...ابني هذا دير بالج عليه ...اشرلي على مهد بجانبنا ابنا بي ما ميزت شكله زين ...ورجعت ابجي بحضنه وعليه

-وين رايح طارق
-اروح هنا
-وين هنا

-قريب نهله ...بس ابني امانه لا تعوفيه...جلبت بي وهو يريد يطلع واني اتوسله اضمد جرحه وما قبل ...تركني والطفل اسمعه يصرخ واحتاريت ما بين الحكه وما بين ارجع لابني ..هاي اني شوكت جبته ؟؟؟؟

صحيت من النوم بدموع ...وكمشت صدري مختنكه ..اتلمس ببطني الحمد لله هذا حلم هياني بعد ما والده ...طارق ...تذكرت الحلم وبجيت وخفت ..بس وكفت وطلعت من الغرفة كان وقت غروب واني نايمه وكعدت بهيج حلم ...روحي مقبوضه ...صدح باذني الاذان ..حيل اذان المغرب هذا واني نايمه ....فتت للحمام توضيت وطلعت لغرفتي صليت ودعيت ربي يحفظ حبيبي وابو ابني ويرده سالم...

طلعت يم جدتي لكيتها كاعدة تسبح بسبحتها ...مددت على ضهري وحطيت راسي على رجلها وهي تمسد براسي اريد شويه ارتاح
-تعدلي وناني على صفاحج بطنج عاليه تخنكين الولد هيج تنامين

-جدة خليني هيج مرتاحه احسن
-شبيج اميمتي ليش هيج ضايجه

-جنت نايمه وشفت حلم مو زين ..دمعت عيني وهي كملت بهدوء

-مو كلت الج لا تنامين وكت الغروب ما يصلح ..يا جديدة (كنايه عن لقب الجدة )
-جدة مخنوكه اسولفه الج

-لا تسولفين مو زين ..احجي بينج وبين نفسج على جهتج اليسره واقري المعوذات وانفخي وتعوذي من الشيطان

سكتت ما كملت كلامها ..عمتي ام طارق كاعده تخيط عالمكينه وعارف ووفاء متعاركين بلعبة الطاولي غالبته مثل كل مره وهو يبغج عليها وجدتي ترزلهم ...عارف اصغر من وفاء بسنتين بس عبالك الفرق بينهم سنين مو بس هلكد حتى بعده بالليل يبلل فراشه ووفاء عود يريدون يزوجوها هذا اللي سمعته من كلام جدتي البارحه وهي تقنع بجدي لان مازن حيتخرج وهو وحيد اهله ويدورن خلفته....