اهلا وسهلا مجددا بمتابعيني الورود اللي هواي سألوا عني وافتقدوني ربي يحفظكم الي يا اطيب ناس
اعذروني ان ما رديت عليكم كلكم
...اشكر كل من سال وتحمد النا بالسلامة فترة انتكاسة صحية عائلية الحمد لله طلعنا منها باقل الاضرار
رجعت وياكم ويه قصتنا وحنزل بارتين بهذا اليوم ان شاء الله ...
محبتي لكم واشكر تفهمكم 😘😘
البارت منقول بدون تنقيح***
......
Rororose2
بحر الذكريات ...جزء البدايات الجديدة ..
برجعتي من الكلية صرت مقابيل مكتب بابا اللي فتحه باخر فترة خاص للسفر والسياحة والتزم حملات العمرة والرحلات الدينية لاهالي منطقتنا بجانب محلاته البقية ...مشيت باتجاهه يرجعني وياه تعبانه من حرارة الجو والدنيا ظهر وهو دام بعده بالمكتب من حسن حظي ابو الخط اليوم ماكو عطلان واجيت بالعبرية....
دخلت للمكتب وكفختني برودة السبلت وسخسخت كدامه ..المكتب فارغ جان ..جريت موبايلي من جنطتي اتصل بي اشوفه وينه وشمرت جسمي المتعب عالقنفات الجلدية بركن المكتب البعيد عن الواجهة الزجاجية ...
دك موبايلي على رقمه وسمعت الباب خلفي انفتح لما اجراس الباب المعلقة رنت ..اجيت اغلق الخط لان اكيد هذا بابا دخل وكفت اتلكاه بس انفتح الخط واجاني صوته وانصدمت بشخص غريب دخل للمكتب ويه بداية المكالمة ...حجيت ويه بابا بارتباك...وهذا عيونه تسمرت بوجهي رغم رجوعي وابتعادي...
-بابا انت وين اني بالمكتب كلت ارجع وياك شفت بابه مفتوح ....
طبعا ما اسولف الكم عركت من شدة الرزالة اللي ترزلتها منه لان هيج تصرفت من كيفي وكال ابقي بمكانج هسه راجع عليج ....وهذا واكف متكتف والهدوء حوالينا كفيل بسماعه كل شي هو اني بنص سمع انطرشت من عصبية مزوني شصار عليك يمه بانزين يكب بالوجه الله يساعدها لوفية عليك دردمت وسديته وهذا واكف بمكانه ومبتسم عابت ..سمع الرزاله كلها
سديته من بابا واخذت جنطتي اريد اطلع وهو وكفني بصوته
-وين رايحه ؟؟ بنت مازن انت؟ صفاء الصيدلانية انت؟؟لو غيرها
رفعت عيوني عليه باستفسار وجاوبته بتردد
-لا اني سارة
-هااا ...عبالي صفاء مو هو يسموه ابو علي وابو صفاء ....تشرفنا بمعرفتج اني قاسم صديق الوالد وشريكه بالمكتب؟؟
-شريك ؟
انسند بجسمه عالباب مالت المكتب ساد طريقي واني اريد اطلع هذا شبي ؟؟؟شكد عيب ما يستحي هيج يوكفني ؟؟
كان بعمر متوسط اربعينات او نهاية الثلاثينات لابس بدلة رسميه بدون رباط وفاتح دكم قميصه وزنجيله الذهبي احلى من زنجيل كلادتي ...شكله ابد مو مريح..
أنت تقرأ
بحر الذكريات
Chick-Litقصة باللهجة العراقيه .....من الزمن الجميل وبين صفحاته سطور ذكريات لامرأتان عراقيات دارت بهن الحياة وطحنت رحاها شبابهن ...فكيف سيكون مستقبلهن ....؟؟؟؟
