بحر الذكريات

سباق الكبرياء🙄

وفاء:

كعدت وره مدة كنت بالافاقة ويمي نهلة ...اول ما وعيت سالتها عن مازن وخايفة منه...
-وين مازن

-بره واكف ..ليش هيج وفاء جان موتي نفسج منو اليسوى واذا صار الولد واذا ما صار فكري ببناتج خمسه وفاء خمسه ايتام ..ما تفكرين بيهن ما جربنا اليتم تريديهن يجربن حظنا مثلا
سكتت ما جاوبتها ما الي حيل 

-وكع
-اي طبعا شتريدين يبقى رحمج نازل حيل وضغط ورحتي حبلتي
-كافي نهلة 

-لا مو كافي انت الكافي تره
غمضت عيوني عنها وهي تحجي وتحجي لحد ما ملت ...

وره ساعتين اجتي الطبيبة فحصتني ماكو نزف ...كتبت خروج من الليل لهسه اني بالمستشفى ما ادري بروحي ..وقت غروب وطلعوني من الصاله ...اول ما شفت مازن عيوني غوشت بالدمع ...وهو اخذ راسي باسه عكس ردة الفعل اللي كنت متوقعتها وخوفي منه خلاني ابجي بقوة اكبر ..كنت متوقعته يعصب لو يصيح او عالاقل يزعل 

-كافي يا عيني دكافي
-مازن ااانن..اني ارييي...د اخلف الولد الك

-انعل ابوها للخلفة ولج شلي بيهم بعذابج هذا ليش تخلينا بهالنار عليج وفاء لو صاير الج شي شلي بيهم بعد اني 
-ما تتزوج عليه
-لا حول ولا قوة الا بالله رجعنا

-يعني انت ما متزوج احلف بداعتي... اذا تحبني كول مازن
-اووف منج ولا تعقلين امشي تره واصله وياي حدها والدنيا طلعت من عيني ولج طلعتي من الموت يا زواج هذا
مشاني بنفاذ صبر وما برد ناري ولا طمني

طلعنا للبيت ...البنات موجودات يعني عمتي عدنا ..خفت كلش خفت من المواجهة...اذا كالت ما تخلفين ولد يجوز اتخبل هالمره ..ما اتحمل احد يلوم ولا يحجي ..الغريب محد يكول ليش ولا على شي حجوا ساكتين واني سكوتهم دمرني...بقت عمتي وياي اسبوعين كاملات والبنات وياها

رجعنا لحياتنا ..مازن دوامه اسبوع باسبوع ومرات ما ينزل حسب شغلهم ..صرت مجنونه بمسالة زواج ثاني ...يرجع من دوامه افلس ملابسه واتفقدهم قطعه قطعه ...اموت اذا لكيت شي ناقص لو متغير اتخيله عنده بيت ثاني ومباشرة اكوم اربط احداث واحلل بكيفي...ما وصلت لشي ...حلفت جدتي ونهلة يعرفون عنه متزوج او لا ..كان جوابهم النفي ويضحكون على تفكيري لحد ما يوم حطيت بالي ويه صفاء وما حصلت شي منها وصلت بيه حتى اطفال استجوبهن  ...فترة بقيت الح ياخذني هناك واخذني وبقيت اسبوع يمهم واجازتي خلصت وناري ما تخلص...ما متزوج ولا عنده شي ببغداد ليش ما يهتم وليش هيج يعاملني ...طبعه البارد وحبه لبناته يزيد نار غيرتي اكيد عنده البديل ...اباوع اله حاط سديم ويوكل بيها ..لو يكعدنا بالحديقه ويشوي ويوكلني اني وبناتي بحلكنا ..كل هاي واني نار غيرة تسعر جواي ..جيبوا اللي يقنعني بان هالدلال ما وراه شي خفي ..فكرة حطت ببالي مثل بومه على خراب