بحر الذكريات

جزء بلا عنوان 42

اللي طلبتوا بيت الشعر بالجزء اللي قبل هذا...تره هو مو كل شي ينذكر اكو شغلات خاصة يحبون ابطالنا يحتفظون بيها لروحهم بس جبت الكم شي مقارب اله...يكول بي
ناذر نذر لو طاح حلكي بحلكها
ما هدها لو صوبين ثارن تفگها🙈🙊(منقول)

بالليلة اللي سبقت عقدي لابو ميسرة كاعدة عمه دلال ويمها سديم يحضرن التوزيعات من كيك وعصاير ويشدون بالجكليت بالتوزيعة وهم يضيفون وياهن الشوك والقشات (الممصات او القصبات )يرتبوهم بصورة حلوة عصرية ويحطون وردة وعليها شريط ملون ...حضروا كل شي من قبل بيوم بسلات ملونة ومزينة بايديهن ...اباوع الهن فرحانة بالترتيب هاي فوائد الاخوات الهواية وهم وياهن عمات هوايه وبالتالي بنات عمات هم هواي هههه احسبوا بيت مزوني شكد بي عنصر نسوي بهالليلة ...بين ما كاعدات ومتونسين باللمة اجا اشرف وضل واكف الهن بالباب الا يروحن وياه خرب على سديم اللمة واخذها وما يرضى يفوت لبيتنا واخذهن اثنينهن طلعت سديم الا شويه تبجي تسحل باغراضها وتعد وتحجي عليه والظاهر برجعتهم صارت مشكلة ما خلاها لسديم تحضر وابنها ضل يمنا لان فحط مو راضي يروح ويه امه ويترك اللعب 

صفاء كانت تشتغل بوحدها على ترتيبات ميز المهر والصواني اللي عليه ماما رادتها تضل بوحدها ما تتواجد ويه خالة نهلة وهدير اللي اجتي بعد ملحة مني ومن شيماء ما نريد المشاكل تزود ونريدها تضل صديقة وبنت خال كل حياتنا احنا حبايب هسه نتخارب طبعا اريج هم حضرت وحفلتها بالاسبوع اللي يلي حفلتنا انقرت فاتحتها لابن عمهم ....

بعد السهر والضحك لوقت متأخر اجا ايمن ياخذ امه وزوجته واريج وهنا صارت مشادة كلامية بين ماما وصفاء لان رادت تحجي وياهم وماما منعتها ...

صار خصام بينهن تدخلت شيماء تحله وصفاء انهارت بجي وتحجي على ماما وامي دومها عصبية اكمشي شمعة ام الكلاص ثكيلة من الميز وضربتها بيها وانجرحت بايدها ....خابرت زوجها وطلعت من بيتنا باجية حلفت ما تجي بعد وامي تراجعت باخر لحظه رادت تصالحها بس صفاء من تقفل بعد ما تعرف ولا تشوف شي ...هي ما قصدها الاذية بس رادت تعتذر من خالتي لان احنا نعتبر خالة نهلة مكملة لامنا ما نرضالها الزعل عالاقل كان المفروض تخليها تعتذر منها .... ما سمحت الها حتى تطلع الهم

بالتالي اليوم ما راح احد وياي من اخواتي للصالون وكضيتها وحدي ويه عمتي مريم بعد ما خططنا كلنا نروح ...شيماء بقت ويه ماما تساعدها بالمعازيم وعماتي البقية كبار وما الهن واهس ...

بدت عوائلنا تتباعد بعد ما كنا بيت واحد بدينا نحس بفروقات وهالشي اثر على فرحتي بهذا اليوم وزاد هالشعور لما دخلوا اهل قاسم للحفلة نسوانهم اخذن الحفلة كلها ما شفت من اهلي شي بعد حتى ما خلوهن يكومن وكعاداتنا الدائمة ميصير اهل العروس يبينون فرح لان يحجون عليهم ويكولون ما مصدكين ...بعد ما تم العقد وقبل دخوله بنته احتلت حضني طاردة اولاد اخواتي عني ضربت مجتبى الباقي عدنا بايت ...ضربته بعينه بوكس وتسميني ماما وماخذتني مالتها ومالت ابوها صرت بعد ...