بحر الذكريات

شميته بحرورة گلب🙈

لا تألف الروح الا من يلاطفها 😍😍

                                   ...ويهجر القلب من بالصد يلقاه💔💔

فلا وصال لمن بالوصل قد بخلوا😏

                                  ...ومن تناسى فانا قد نسيناه😒😒

..........

نهلة :
صبح الصباح واليوم عرس وفاء ومازن ...اخويه واختي والاثنين واحد اغلى من الثاني ...فرحانه لدرجة البكاء كل شويه اشوفهم عيوني تدمع ...عندي خلل يمكن عهه...

افتر وارتب البيت والصاله للنسوان لان عرس النساء بيتنا والزلم ببيت عمي ابو مازن ...كنت لابسه فستان اني خيطته اسود وحوافة مشغولة ذهبي القماش تطريزه منه وبي وقطعتين شيفون وجواه كشمير ساده فصاله كان بوقتنا يسموه هاشمي وطرزت رسمة ورد بقصب ونمنم على طول صفحة وبالردان ...كنت جميلة ويحق للجميلات القول بانهن جميلات هههه ...لاكذب بس الثوب طلع عليه تحفه فنيه ااتفاخر بان تكون شغل ايدي...وهواي سمعت كلمات توصف جماله ..

كملوا تزيين عروستنا الحلوة بغرفتنا كل شويه افوت اباوع الها واطلع ..اختي الصغيره عروس يا ربي مو مصدكه والفرح ما يسعني والكاع ما تلمني ...بقيت اهوس الها واركص اني واخوات مازن كلهن وكانت فرحتهن مثلي واكثر باخوهن الوحيد .....

اول النساء الحاضرات كانت امي وبعض النساء وياها من عيالها وعمتها مره جبيره بس قويه بعدها بحيلها ...هلهلت امي وطشت الحلو على وفاء اللي لحد هاللحظة شكلها ينطي انطباع بعدم موافقتها وعدم رضاها..شكد حجيت وحاولت وياها خوفها كان اقوى من تقبلها...

مر الوقت حلو بين اغاني الجدات وصفكاتهم ..دخلت شايله الشربت اوزعه على عيال امي وباقي نسوان الجيران ...افتريت عليهن كلهم وصلت للحجية الجبيرة كاعدات هي وبنتها حماتها لامي ...دنكت عليهن وصوت الهوسات عالي ومحد منتبه ...الحجيه حجت وياي

-يوم عرسج ان شاء الله
-هههه حجيه تره اني زوجة طارق
-الله يرحمه لساج زغيرة والحياة ما توكف وره احد ووليدج يريدله ابو ..لهجتها مال عرب ولابسه كيش وعبايه ...انزعجت منها مو كافي ابنها؟ 

ابتعدت اقدم لبنتها وهي كملت توجه الكلام لبنتها
-هاي نهلة اللي اخوج رادها قبل وانطوها لابن عمها وهسه يريدنا نرجع نمشي عليها ...تهمس لبنتها على اساس بس تسمعني

انصدمت وكلامها كان واضح ما بي لف ودوران ...وكفت عدلت نفسي وحجيت وياها
-حجيه اني زوجة طارق وام ابنه ما اتزوج غيره ولا افككر بهاي اربي ابني وابقى عليه اعذريني بس قبل لا تمشون وتصير مفاشل...اني ما اتزوج وزوجي بعده عايش تره

عفتهن ومشيت قبل لا اسمع الرد والله يا الله شلون لزكه ...نزعولي فرحتي وتكدرت ورحت بجيت على حبيبي ..لساه عايش بروحي واحسه عايش ما مات ..لا دفنته ولا لكيت اله اثر واكطع الامل ...حبيبي يا طارق لو ابقى للعمر كله احبك ما اوفيك حقك...هذوله مشكلة واذا اجوي جدي لو يجبرني اتزوج عارف لو ينطيني لاحد اووف شلون هاي؟؟؟اهلنااا‌يكرهون المرررره تضل تجيها ناس وتخطب لو ينطوها لو يخفوها عن البشر