بحر الذكريات

مشاكل جديدة

شيماء:

يوم ثاني من زواجنا خفت اطلع من غرفتي لا تتهجم علي ام حسين ...للظهر يلا دخل للغرفة حسين جان يمه ضيوف وما كدر يجيني ...دخل لكاني كاعده وحاطه ايدي على خدي وصافنه
-ليش هنا ؟ ؟

-وين اروح
-يم امي والبنات ..يم جداتي اطلعي حبيبتي لا تبقين وحدج كاعده وتضوجين
-يعني عادي اروح يمهم
-ليش مو عادي مو كلنا بيتج واهلج هذوله بعد صاروا يلا حبيبتي يسالون عنج جداتي

اخذني من ايدي وطلعنا يم اهله ..امه شافتني صدت عني ودخلت بغرفة وسدت بابها وزعلانه على حسين وياي ...كعدني يم جداته بالهول وراح ...باوعت الهن اثنينهن يباوعن الي مبتسمات ...ام جدته جانت ماكو ...بس جداته...
-حليوة يولي شوفيها جنها العافية

-اي حليوة كون حظه يطلع احسن من حظ ابوه بيها ولو حسين ما عنده حظ المسكين
-كون الحنين يطول عمره ..هذا الحنين ربج يجازيه 

التفتت الي وسألتني بصوت ناصي عود ما تريد اخواته يسمعن
-شلونج يمه هسه خوما بعدج متأذيه
شيماء:لا بيبي ما بيه شي

غطن وجوهن اثنينهن وضحكن على كلامي
-ولج شنهي بيبي...كولي حبوبة ...جدة
شيماء:ان شاء الله

دخلوا البقية خوات حسين وام جدته مسنداتها الظاهر جانت بالحمام ..كعدوها وكعدن يمي ...
سألت الجدة الجبيرة
-وين ازهار

جاوبوها بالمطبخ ....ازهار هاي عمة حسين الغير متزوجه واللي فهمته بهاليومين بان هي ما تغادر المطبخ وكل الاكل واعداده عليها

رجعت سالت
-وين ام شاكر..جاوبوها بغغغرفتها وضلت تحجي عليها مو راضية عن تصرفاتها....
كعدت اسمع منهن واني مو فاهمه شي يحجون عن الناس اللي اجوي بالعرس والنسوان وسوالفهم ..كنت بس اسمع ...

تقربت يمي اسراء اخته الجبيرة وحجت وياي
-بعدج جديده تتعودين علينا ...تره امي عصبية لا تاخذين حجاياتها بخاطرج قلبها ابيض ونظيف بس ما تعرف لا تجامل ولا تغطي

شيماء:لا والله ما ماخذه ولا شي عادي بس اني مو فاهمة الاسباب
-ماكو اسباب هاي اخوي المكرود مشاكلهم القديمة تطلعهن براسه هو ..ما يستاهل حسين والله انت صيري سباعية واحتويه وخلصيه من هالقهر عاد

استحيت اسالها عن مشاكل او اتدخل
-هو ليش امج يصيحوها ام شاكر وهي عدها بس حسين
-سالفة قديمه ...شاكر اخويه الجبير واول خلفتهم واجيت اني وراه ووراي صارت زنوبه بصغرنا شاكر جان وكح حيل ..صعد على شجرة بالحديقة ووكع على راسه ..وضل مريض فترة وراها ربج اخذ امانته

انقهرت كلش وبقت عيوني مفتوحه اريد بس ابجي غوشت عيني
-ياا شلون وخاله خطيه شصار بيها
-خالتج ضلت اشهر فاقدة وراه ...واللي زاد حالها ابوي جان يعاتبها عليه ويحملها مسؤوليته يكولها انت كتلتيه باهمالج ...وبيوم اجا وجايب خبر خطبته من ام احمد كعقوبة لامي وهنا كل حياتنا انقلبت واني من يومها ما شافت راحه