بحر الذكريات

مخطوبين

هلو حبايب تطلبوني على باجر بعد بارت طويل 😘😘

وفاء:
التحاق مازن وفر الي وقت ارتاح بي قبل العرس ..كملوا كل شي عمتي ام مازن ونهلة من جهاز وملابس وخياط ..كنت اتفرج عليهم يلمون بالغراض ويصصفوها بغرفته بيت اهله ..شكد حاولوا يخلوني اهتم واني ابد مو كادرة ....النداف جابوه للبيت يسوي الفراش وعمتي ام مازن خيطت فراش كامل للبيت كله ..ابنها الوحيد ورادت كل شي من احسنه ..جدتي ونهلة فرحانات وراضيات كلش ويمدحون باللي يجيبوه

ما باقي الا القليل وين اروح وشلون اتحمل مازن والعيشه وياه ...قليلة حيلة
الي الا السكوت وتقبل نصيبي وقسمتي...

تقربت ايام العرس كنت متمددة بفراشي بلا روح يوميه اكعد الصبح ابجي لان راح يوم ..انفتحت الباب نهلة وخوات مازن فاتوا فرحانين شايلين بايدهم ملابس وراهم جدتي وعماتي ام طارق وام مازن وهلهلوا ..

فرشوهم بالسرير على اللحاف اللي متغطيه بي
نهلة:شوفي وفاء ...شوفي يا روحي بدلاتج مال العرس اكعدي مازن اجا..شو كومي

كعدت بملل وكلهن فرحانات وجدتي تشيل بدلة وتنزل الثانيه
الجدة:واااي واي شوفوا جايب شكثر ..ولج اكعدي وفيه كدريهم تا نشوفهم عليج ...

وكفت من الفراش وطلعت اغسل وجهي وارجع الهم ..طلعت اعدل بكفشتي وااافرك بعيوني ....غسلت وطلعت ارجع يمهن تلاكينا اني وهو كان ..ابتسم وتقرب مني بفرح ..باس راسي وبهدوء ورزانه حاجاني متردد او مستغرب ما اعرف
-شلونج؟
-الحمد لله 

-حبيبتي ...وسكت صافن بعيوني دنكت رفع راسي ...اكلتي لو بعد
-لا توه كعدت
-اي همزين جبت وياي كيمر عرب على طريقي صاروا وكلت وفيه تحبه وهسه بعد ما كعدت من النوم جبت واجيت
-شششكرا..من شوكت طالع ومن الصبح وصلت

-طلعت ويه اذان الفجر مشتاق ما كدرت اصبر هههه
-حمد لله عللل...على سسسلامتك

-الله يسلمج حبيبه...يلا تعالي نتريك سويه بيتنا هناك عفت دلال تسوي الي
-هااا..خفت من كال دلال عزاا غير تذبحني اذا كعدت اكل وياه وهي مسويتلنا الاكل
-للا لا عفيه هنا ناكل اني اسوي خطيه

-لا هي هم تتريك ويانا
-هااا ...هنا ناكل؟؟
-خوش اجيبه وناكل سويه هنا ولو تمنيت وحدنا بغرفففتنا ..ابتسم على اخر كلمه واني صوفرت ومغصتني بطني منا بعد ما متريكه ومنا قبل بيوم كاانوا مسولفين الي عن الزواج والبلاوي مالته ...كبل عفتههه وانهزمت لغرفتي وهو يضحك بصوت

فتت يمهن شفت اااالبدلة البيضه فارشاتها ومتعجبات بنزاكتها وجمالها ما كانت البدله منفوشه على وقتنا بس مرتبة وانيقه وياها ماشات كرستال جانت وحذاء ابيض ..شلته مقاس ٣٧ هذا شلون يعرف هالكثر عني

حلم كل البنات كعدت عالحافه واتلمس قماشها جان تول منقش وبيها وردات عالخصر والردن شفافه ..ابتسمت لجمالها
شالت نهلة الثانيه كانت حمره ووحدة وردي والباقيات كل وحده بلون سبع بدلات ..مو شي اعتيادي ابد اصلا العرايس على وقتنا كلهن يتشاركن ببدله وحده كل وحده تطلبها وتلبسها على كد العرس وترجعها لصاحبتها ..اني صاروا عندي سبع بدلات !!