بحر الذكريات

مستجدات

-وفية !
ناداني بصوته الحنين اللي ولا تغير ولا تغيرت نبرته الحلوة من ايام شبابنا لهسه
طلعت من غرفتي استقبله من شغله وسبقتني ضي بنت علاوي الوكيحة تركض على رجليه شبكتهن وهو دنك شالها ويبوس بيها
-عيون جدج يا عيني
وكفت اتفرج عليهم اول حفيدة لاولادنا وساكنة ويانا بالبيت فطبيعي تكون محط اهتمامنا وحب الكل ...من لمحني كام يحاجيها
-هاي جدتج الحلوة يمكن غارت اني لمحت نظرات غيرة يمكن
-اغار من حفيدتي؟؟
-التحب تغار حتى من نفسها
-هااا وطلعت ما احب همين
-دتعاي بوسيني عليش غيرانة
نطاها خده وباسته هي وهو ميت ضحك لان تشبكه حيل وتشمه بعد مزوني منو ما تحبه ؟؟
صغرت عيوني وصغر عقلي وياهن
-شووو نزلها ثكيلة خلصت افادك كمت تلهث
-هااا هاا الغيرة
-يمعود وكت غيرة هسه دنزلها
دنك ونزلها ومشى وياي وهو يهمس
- اخاف تريدين اشيلج
باوعت اله مو راضية عالحجي فات بالغرفة واني وراه يبدل ويسولف حجي ما يليق بعمرنا ابد واني اغلس مره ومره اكوله كبرنا وعيب وهو يجاوبني انت كبرتي اني بعدني

لحد ما صار وقت الاكل وفاتت ضي تركض فاتحة الباب على وسعها واني متحاوطة بكلامه الغزلي بعفوية وخدودي حومرت عبالك تونا متزوجين كطعت علينا حفيدته اللحظات القليلة المثل هاي ...اول ما شافها عاط بيها
-دنعل ابوج لابو جلاب اهلج ولج منو الدزج عليه بهالساعة
ضحكت وسكته اخاف سوسن تسمع عيب شيكولون
كمت من يمه
وهو ضايج
-علميها لا تسوي مداهمات حفيدتج
-هههه صارت حفيدتي
-اي وطالعة عليج بكل شي هااه شوفيها برطمت بس صحت
-لا تصيح احد كال الك تصيح
-اني وين وفية وحدة شيبت الخلفوني استلمتني هاي

طلع وطلعنا وراه اني وياها زعلت تغدينا وكملنا ورحنا ننام جابها ويانا نامت الظهر والعصر طلعنا اني وهو وياها اخذها يفرفرها لان صاح بيها وامها كيفت اندارت راحت يم اهلها هم حامل وهم هاي وكحه ما تصدك ناخذها

رحنا لبيت سديم دلال مريضة ومازن تخبل من سمع تلكانا اشرف جان نازل بنفس اليوم هم لان سامع بامه ما الها خلك دخلنا مرحب عكس بدايات زواجه بسديم تشرف تغير هواي وحتى سديم احسها نضجت وياه وصارت اعقل ...وهناك اشيل حفيد وانزل حفيد ما شاء الله صاروا اربع اولاد وكلهم كمشتهم ضي الكفخ حتى مجتبى الاكبر منها هم كام يبجي خزتني واني استحيت من اهلهم شلون يرضون ابتليت على عمري كلت شكو جبناها يمه مويزن ولا يتحمل كام يقسم اشكال واخته الوجعانة على اساس استلموني هي وياه وكلها فزعت لضي خانم

سكتت وكمت يم سديم اللي انشغلت من هسه تريد تعشينا رحت اشوف شخبصت روحها وخبصت رجلها خطيه الرجال تعبان توه نازل وكت عشاوات!

دخلت للمطبخ واشوف الكم شوفه لنها بنتي الفالتة نازله بوس بالرجال بالمطبخ اجيت ارجع لو ما هو انتبه وبعدها عنه وخجل خطيه وهي هم سوتها عادي يعني

ترخص مني وطلع بره البيت هج الرجال خطيه واني لزمتها
-هاا ولج يولي شلونه وياج
جاوبت بسكوت واختصار شديد
-زينين
-اي مدي بوزج بنت وفيه خلفت اربعة وتشكي
-يمه والله مشاكل
-خيرج شكو هالمشاكل راح يهج الرجال
-يمه يتمزعل على كل شي ومن يجي لما يروح يدور مداراه وحنان واني بين البيت وبين الجهال اشك هدومي يعني ...شمرت من ايدها السجين بعصبية وعلى صوتها ما رضيت عليها ونهرتها بصوت ناصي
-يولي عيب عليج هيج تسوين رعنة هو شوكت ديجي اشو دوم دوامه انذار وبمكانات بس الله حافظهم بيها تريدين الله يطير نعمتج انت
رفعت عينها حمرة دم باجية هوايه من اجينا انتبهت وهسه تأكدت
-يمه اخر من ينصح انت !
سكتت وانصدمت من ردها واجيت انسحب اطلع من يمها كمشت ايدي وتبوس بيها وتبجي حضنت راسها بعد ما شفتها تعبانة ...رحت يم ابوها كتله نرجع لبيتنا واني محملة قهر هو هم وكف ديطلع دلال جلبت بينا وسديم هم ونفس الوقت دخل اشرف حلف علينا محد يطلع ...كعدت مقهورة حيل على بنتي وعلى حياتها وعلى اخطائي القديمة وصدك هو اني اخر من ينصح